തരൂര്‍ ഇത്തവണ കൂടി വിജയിച്ചാല്‍ പിന്നെ പിടിച്ചാല്‍ കിട്ടില്ല. തിരുവനന്തപുരത്തെ അനിഷേധ്യ നേതാവായി മാറും. മാത്രമല്ല ഹൈക്കമാന്‍ഡില്‍ നല്ല പിടിയുള്ളതിനാല്‍ ക്യാബിനെറ്റ് മന്ത്രിവരെ ആയേക്കും. അതെല്ലാം മനസിലാക്കിയാണ് തലസ്ഥാനത്തെ ചില കോണ്‍ഗ്രസ് നേതാക്കളും പ്രവര്‍ത്തകരും അടിപ്പണി തുടങ്ങി. ശബരിമല ഇഫക്ടില്‍ കുമ്മനം കൂടുതല്‍ വോട്ട് പിടിച്ച് ജയിച്ച് കയറിയെന്ന് വരുത്തിതീര്‍ക്കുകയാണ് ഇവരുടെ ശ്രമം. ഇതോടെ ശക്തമായ താക്കീതുമായി കെ.പി.സി.സി രംഗത്തെത്തി. തിരുവനന്തപുരത്തെ യുഡിഎഫ് സ്ഥാനാര്‍ത്ഥി ശശി തരൂരിന് വേണ്ടിയുള്ള പ്രചാരണ പ്രവര്‍ത്തനങ്ങള്‍ തൃപ്തികരമല്ലെന്ന് കെപിസിസി. തരൂര്‍ തോല്‍ക്കുന്ന സാഹചര്യമുണ്ടായാല്‍ ജില്ലയിലെ പ്രചാരണ ചുമതലയുള്ള നേതാക്കള്‍ക്കെതിരെ നടപടിയുണ്ടാകുമെന്ന് കെപിസിസി അന്ത്യശാസനം നല്‍കിയെന്നാണ് സൂചന.

തിരുവനന്തപുരത്തെ മുന്‍ എം.പിയായിരുന്ന വി.എസ് ശിവകുമാറും തമ്പാനൂര്‍ രവിയും അടക്കമുള്ളവരാണ് ഇതിന് പിന്നില്‍ കളിക്കുന്നതെന്ന് ആക്ഷേപമുണ്ട്. കഴിഞ്ഞ നിയമസഭാ തെരഞ്ഞെടു്പില്‍ കുമ്മനം രണ്ടാമതെത്തിയ വട്ടിയൂര്‍ക്കാവ് മണ്ഡലത്തില്‍ ശശിതരൂരിന്റെ പ്രവര്‍ത്തനങ്ങള്‍ ഒട്ടും കാര്യക്ഷമമല്ല. നോട്ടീസ് വീടുകളില്‍ എത്തിക്കാന്‍ പോലും പ്രവര്‍ത്തകരില്ല. ബൂത്ത്തല പ്രവര്‍ത്തനങ്ങള്‍ നിര്‍ജ്ജീവമാണ്. തീരദേശമേഖലകള്‍ കേന്ദ്രീകരിച്ച് മാത്രമാണ് തരൂരിന്റെ പ്രചാരണം ശക്തമായി നടക്കുന്നത്. വട്ടിയൂര്‍ക്കാവ് മണ്ഡലത്തിലെ കുടപ്പനക്കുന്ന് ഭാഗത്ത് തരൂരിന്റെ തെരഞ്ഞെടുപ്പ് പ്രവര്‍ത്തനങ്ങള്‍ പേരിന് പോലും ആരംഭിച്ചിട്ടില്ലെന്ന് പ്രദേശത്തെ കോണ്‍ഗ്രസ് അനുഭാവികള്‍ പറയുന്നു. തങ്ങളുടെ ചെലവില്‍ തരൂര്‍ ജയിച്ച് കയറണ്ടെന്നാണ് തലസ്ഥാനത്തെ പല കോണ്‍ഗ്രസ് നേതാക്കളുടെയും നിലപാട്. അപകടം മണത്തറിഞ്ഞാണ് കെ.പി.സി.സി ഇടപെട്ടത്. ഇത് സംബന്ധിച്ച് തരൂര്‍ കേന്ദ്രതെരഞ്ഞെടുപ്പ് സമിതിക്ക് പരാതി നല്‍കുമെന്നും അറിയുന്നു.

ആരുടെയും ഔദാര്യത്തിന് കാത്ത് നില്‍ക്കാത്തയാളാണ് തരൂര്‍. അതുകൊണ്ട് ഡി.സി.സി പ്രസിഡന്റ് നെയ്യാറ്റിന്‍കര സനല്‍ അടക്കമുള്ളവരുടെ ചൊല്‍പ്പടിക്ക് നില്‍ക്കാന്‍ തരൂരിനെ കിട്ടില്ല. അതൊക്കെ പല നേതാക്കള്‍ക്കും ഇഷ്ടമല്ല. രാഹുല്‍ഗാന്ധിയുമായും കോണ്‍ഗ്രസ് പ്രവര്‍ത്തകസമിതി അംഗങ്ങളുമായും അടുത്തബന്ധമുള്ള തരൂരിന് ഇവരുടെയൊന്നും അടുത്ത് തലതാഴ്‌ത്തേണ്ട കാര്യമില്ല. ഇങ്ങിനെയൊക്കെയുള്ള സംഗതികളാണ് ജില്ലയിലെ കോണ്‍ഗ്രസ് നേതാക്കള്‍ക്ക് പിടിക്കാത്തത്. തരൂര്‍ ശബരിമല പ്രശ്‌നത്തില്‍ ശക്തമായ നിലപാട് എടുത്തില്ലെന്ന് വരെ ചില നേതാക്കള്‍ പ്രചരിപ്പിച്ചു. അതിന്റെ ചുവട് പിടിച്ചാണ് ചില ബി.ജെ.പിക്കാര്‍ നായര്‍ വാട്‌സാപ്പ് ഗ്രൂപ്പുകളില്‍ തരൂരിനെതിരെ വ്യാജപ്രചരണം അഴിച്ചുവിട്ടത്. അദ്ദേഹം അതിനെതിരെ തെരഞ്ഞെടുപ്പ് കമ്മീഷന് പരാതിയും നല്‍കിയിരുന്നു. 

സ്വന്തം സ്ഥാനാര്‍ത്ഥികളെയും ഘടകക്ഷി സ്ഥാനാര്‍ത്ഥികളെയും കാലുവാരുന്നതില്‍ തലസ്ഥാനത്തെ കോണ്‍ഗ്രസ് നേതാക്കള്‍ പണ്ടേ വിദഗ്ധരാണ്. വീരേന്ദ്രകുമാറിന്റെ ജനതാദള്‍ യു.ഡി.എഫിലായിരുന്നപ്പോള്‍ നേമം നിയമസഭാ മണ്ഡലത്തില്‍ നിന്ന് കഴിഞ്ഞതവണ മത്സരിച്ച സുരേന്ദ്രന്‍പിള്ളയ്ക്ക് സ്ഥിരം വോട്ടുകള്‍ പോലും നല്‍കാതെ രാജഗോപാലിനെ വിജയിപ്പിച്ചവരാണ് അവര്‍. കെ.പി.സി.സി നിയമിച്ച അന്വേഷണ കമ്മീഷന്‍ ഇക്കാര്യം കണ്ടെത്തിയെങ്കിലും യാതൊരു നടപടിയും അന്നത്തെ സംസ്ഥാന അധ്യക്ഷന്‍ വി.എം സുധീരന്‍ കൈക്കൊണ്ടില്ല. അന്ന് കോണ്‍ഗ്രസിന് 20,000 വോട്ടാണ് കുറഞ്ഞത്. 2014 ലോക്‌സഭാ തെരഞ്ഞെടുപ്പില്‍ കോണ്‍ഗ്രസിന് നേമത്ത് 32,362 വോട്ട് കിട്ടിയിരുന്നു. ഇക്കാര്യങ്ങളെല്ലാം സുരേന്ദ്രന്‍ പിള്ള പുറത്ത് വിട്ടിരുന്നു.