മാധ്യമപ്രവര്‍ത്തകര്‍ക്ക് നേരെ കയർത്തു സംസാരിച്ച മുഖ്യമന്ത്രി പിണറായി വിജയന്റെ സമീപനത്തെ രൂക്ഷ ഭാഷയിൽ വിമര്‍ശിച്ച്‌ കോണ്‍ഗ്രസ് നേതാവും എം.എല്‍.എയുമായ വി.ഡി സതീശന്‍ രംഗത്ത്. കേരളത്തിലെ വോട്ടിംഗ് ശതമാനം കൂടിയതിനെ കുറിച്ചുള്ള മാധ്യമ പ്രവർത്തകരുടെ ചോദ്യത്തിന് മാറി നില്‍ക്ക് എന്ന് വളരെ ദേഷ്യതോടുകൂടിയാണ് മുഖ്യമന്ത്രി പിണറായി വിജയന്‍ പ്രതികരിച്ചത്. ഇതിനെതിരെയാണ് സതീശന്‍ രംഗത്തെത്തിയത്.

മുഖ്യമന്ത്രിയുടെ മുഖംമൂടി അഴിഞ്ഞു. ഇപ്പോള്‍ ശരിയായ മുഖം വെളിവായിരിക്കുകയാണ്. നല്ല രാഷ്ട്രീയ പ്രവര്‍ത്തകനായ മുഖ്യമന്ത്രിക്ക് പോളിങ് ശതമാനം ഉയര്‍ന്നതിന്റെ കാര്യം മനസിലായി കഴിഞ്ഞു. തെരഞ്ഞെടുപ്പിനായി മിനുക്കി നടന്ന മുഖം അദ്ദേഹം ഉപേക്ഷിച്ചതായും സതീശന്‍ പരിഹസിച്ചു. മുഖ്യമന്ത്രി മര്‍ക്കടമുഷ്ഠി ഉപേക്ഷിക്കാന്‍ തയ്യാറാകണമെന്നും ആത്മപരിശോധന നടത്തണമെന്നും മുതിര്‍ന്ന കോണ്‍ഗ്രസ് നേതാവ് എ കെ ആന്റണി ആവശ്യപ്പെട്ടു.

ലോക്സഭാ തിരഞ്ഞെടുപ്പിൽ സംസ്ഥാനത്ത് 77.68 ശതമാനം പോളിങ് രേഖപ്പെടുത്തി. സംസ്ഥാനത്ത് 30 വര്‍ഷത്തിനിടയിലെ റെക്കോര്‍ഡ് പോളിങാണിത്. എട്ടു മണ്ഡലങ്ങളില്‍ പോളിങ് ശതമാനം 80 കടന്നു. ത്രികോണപ്പോരാട്ടം നടന്ന മണ്ഡലങ്ങളില്‍ പോളിങ് ശതമാനം കൂടി. കണ്ണൂർ, വടകര മണ്ഡലങ്ങളാണ് വോട്ടിങ് കണക്കുകളില്‍ മുന്നില്‍. ഇന്നലെ രാത്രി പത്തു മണിക്കും പല ബൂത്തുകളിലും വോട്ടിങ് അവസാനിച്ചിരുന്നില്ല.

കേരളത്തിലെ വോട്ടര്‍മാരില്‍ ഭൂരിപക്ഷംപേരും അഭിപ്രായം വ്യക്തമാക്കിയിരിക്കുന്നു. എല്ലാ മണ്ഡലങ്ങളിലും 70 ശതമാനത്തിൽ കൂടുതൽ പേർ വോട്ട് ചെയ്തു . പ്രതീഷിച്ചതുപോലെ വടക്കന്‍ജില്ലകളില്‍ വോട്ടുചെയ്തവരുടെ എണ്ണം ഉയര്‍ന്നു. വോട്ട് രേഖപ്പെടുത്തിയവരുടെ കണക്കിൽ ,കണ്ണൂർ ഒന്നാമതും വടകര രണ്ടാംസ്ഥാനത്തുമാണ്.

അതേസമയം തെക്കന്‍ജില്ലകളില്‍ അപ്രതീക്ഷിതമായി വോട്ടിംങ് ശതമാനം ഉയര്‍ന്നു. പത്തനംതിട്ട, ആറ്റിങ്ങൽ , തിരുവനന്തപുരം മണ്ഡലങ്ങളിൽ 70മുതല്‍ 75 ശതമാനം വരെ വോട്ട് പെട്ടിയിലായി. ഈമണ്ഡലങ്ങളില്‍ ശക്തമായ ത്രികോണ മത്സരം നടക്കുന്നു എന്നത് പ്രധാനമാണ് . ശബരിമല പ്രശ്നം മറ്റ് പ്രദേശങ്ങളിലെക്കാള്‍ ഇവിടുത്തെ വോട്ടര്‍മാര്‍ക്ക് മുന്നില്‍ സജീവവുമാണ്.

സംസ്ഥാനത്താകെ ന്യൂനപക്ഷ വോട്ടുകള്‍ വന്‍തോതില്‍ പോളുചെയ്യപ്പെട്ടു. അതുപോലെ മധ്യകേരളത്തിലും മിക്ക മണ്ഡലങ്ങളിലും കഴിഞ്ഞ തവണത്തെക്കാള്‍കൂടുതല്‍ വോട്ടുകള്‍ പോൾ ചെ യ്തു. കടുത്ത ത്രികോണമത്സരം ഉണ്ടായ മണ്ഡലങ്ങളിലും രാഷ്ട്രീയ പോരാട്ടം കടുത്തയിടങ്ങളിലും വോട്ടിങ് ഉയര്‍ന്നു എന്നത് ശ്രദ്ധേയമാണ്. മോദി സർക്കാരിന്റെ വിലയിരുത്തൽ, ബിജെപി നയം, ശബരിമല എന്നിവക്കൊപ്പം സംസ്ഥാന സർക്കാരിന്റെ പ്രവർത്തനവും ഈ തിരഞ്ഞെടുപ്പിലൂടെ വിലയിരുത്തപ്പെടുകയാണ്.