ഓണാവധിക്ക് ശേഷം സംസ്ഥാനത്തെ സ്‌കൂളുകൾ ഇന്ന് തുറക്കും. സ്കൂൾ തുറക്കുന്നതിനോടൊപ്പം നേരത്തെ മാറ്റിവെച്ച ഒന്നാം പാദവാർഷിക പരീക്ഷയും നടക്കും. ആ​ഗസ്ത് 21ന് നടക്കേണ്ട എട്ടാം ക്ലാസ് പരീക്ഷ അവധിക്ക് ശേഷം നടത്താൻ തീരുമാനിച്ചിരുന്നു.

ആ​ഗസ്ത് 14 മുതൽ 20 വരെയായിരുന്നു ഓണപ്പരീക്ഷകൾ. തുടക്കത്തിൽ ആ​ഗസ്ത് 21 ന് ഓണാഘോഷ പരിപാടികൾ നടക്കുന്ന ദിവസം പരീക്ഷ നടത്താനായിരുന്നു വിദ്യാഭ്യാസ വകുപ്പിന്റെ തീരുമാനം. എന്നാൽ സ്കൂളുകളിലെ ഓണാഘോഷ ദിവസം പരീക്ഷ നടത്തുന്നതിനെതിരെ വിദ്യാർഥികളും അധ്യാപകരും വിമര്‍ശനവുമായി രംഗത്തെത്തുകയായിരുന്നു.

കുട്ടികൾക്ക്‌ ഓണാഘോഷത്തിന്‌ അവസരമൊരുക്കണമെന്ന്‌ ആവശ്യപ്പെട്ട്‌ കെഎസ്‌ടിഎ വിദ്യാഭ്യാസമന്ത്രിക്ക്‌ നിവേദനം നല്‍കുകയും ചെയ്തു. തുടര്‍ന്നാണ് പരീക്ഷാ തീയതി മാറ്റിയത്. 21 ന് ഓണാഘോഷം നടത്തി സ്കൂൾ അടയ്ക്കുകയും ചെയ്തു.

മാറ്റിയ പരീക്ഷ സെപ്തംബർ ഒന്നിന് നടത്താനാണ് തീരുമാനം. ആ​ഗസ്ത് 22 മുതലായിരുന്നു സ്കൂളുകൾക്ക് അവധി നൽകിയിരുന്നത്. ഇത്തവണ ഒൻപത് ദിവസം മാത്രമാണ് വിദ്യാർഥികൾക്ക് അവധി നൽകിയത്.

അതേസമയം എട്ടാം ക്ലാസുകാർക്ക് 21ന് നടത്താനിരുന്ന മലയാളം പേപ്പർ - രണ്ട് പരീക്ഷ നാളെ നടക്കും.