പോലീസ് ഉദ്യോഗസ്ഥര്‍ക്കുളള സര്‍വീസ് വോട്ട് സംഘടനാ നേതാക്കള്‍ ശേഖരിച്ച് വോട്ട് രേഖപ്പെടുത്തുന്നതായി വന്ന വാര്‍ത്തകള്‍ക്ക് പിന്നാലെ സംസ്ഥാനത്തെ വിവിധ ഓഫീസുകളിലും സര്‍വീസ് വോട്ടുകള്‍ അട്ടിമറിക്കപ്പെടുന്നു. പോലീസിലെ അട്ടിമറിയെ അന്വേഷിച്ച് എത്രയും വേഗം റിപ്പോര്‍ട്ട് നല്‍കാന്‍ ഇന്റലിജന്റ്‌സ് വിഭാഗം എ.ഡി.ജി.പി യ്ക്ക് സംസ്ഥാന പോലീസ് മേധാവി ലോകനാഥ് ബെഹ്‌റ നിര്‍ദ്ദേശം നല്‍കിയെങ്കിലും മറ്റ് വകുപ്പുകളില്‍ തെരഞ്ഞടുപ്പ് അഴിമതി നിര്‍ബാധം നടക്കുന്നു. 

റവന്യു ഉള്‍പ്പെടെയുള്ള വകുപ്പുകളില്‍ നിരവധി ജീവനക്കാര്‍ തെരഞ്ഞടുപ്പ് ജോലികളില്‍ ഏര്‍പ്പെട്ടിരുന്നു. തദ്ദേശസ്വയം ഭരണം , ജലസേചനം, സെക്രട്ടേറിയറ്റിലെ വിവിധ വകുപ്പുകള്‍ തുടങ്ങിയ സ്ഥലങ്ങളില്‍ പതിനായിര കണക്കിന് ജീവനക്കാരാണ് ഇലക്ഷന്‍ ജോലിയില്‍ നിയോഗിക്കപ്പെട്ടിരുന്നത്. അവരില്‍ നിരവധിയാളുകള്‍ ഇലക്ഷന്‍ ഡ്യൂട്ടി സര്‍ട്ടിഫിക്കേറ്റ് വഴി വോട്ടു ചെയ്തിരുന്നു. ബാക്കിയുള്ളവര്‍ പോസ്റ്റല്‍ വോട്ടിനെയാണ് ആശ്രയിക്കുന്നത്. അങ്ങനെയുള്ളവരില്‍ നിന്നാണ് സര്‍വീസ് സംഘടനകള്‍ ബാലറ്റ് പിടിച്ചുവാങ്ങി വോട്ടുചെയ്യുന്നത്.

സര്‍വീസ് സംഘടനകള്‍ ഇത്തരത്തിലാണ് എക്കാലവും പ്രവര്‍ത്തിച്ചിട്ടുള്ളത്. അവര്‍ സംഘടനയില്‍ ഉള്ളവരുടെയും ഇല്ലാത്തവരുടെയും ബാലറ്റുകള്‍ ശേഖരിച്ച് ഒരുമിച്ച് വോട്ട് ചെയ്ത് കളക്ടറേറ്റുകളിലെ കളക്ഷന്‍ സെന്ററില്‍ നിക്ഷേപിക്കാറുണ്ട്. അതാത് കാലത്ത് ഭരണത്തിലിരിക്കുന്നവരുടെ സംഘടനയാണ് ഇത്തരത്തില്‍ വോട്ടുകള്‍ സമാഹരിക്കുന്നത്. ഇടതുപക്ഷ സര്‍ക്കാര്‍ ഭരിക്കുമ്പോഴാണ് ഇത്തരത്തില്‍ തപാല്‍ വോട്ടുകള്‍ കൂട്ടത്തോടെ ഇടതിന് വീഴുന്നത്. ലക്ഷകണക്കിന് വോട്ടുകളാണ് സംഘടന നേരിട്ട് ചെയ്യുന്നത് . അല്ലെങ്കിലും പോസ്റ്റല്‍ വോട്ടുകള്‍ ഇടത് ആഭിമുഖ്യം പുലര്‍ത്തുന്നവയാണ്. 

തപാല്‍ വോട്ടുകള്‍ നേരിട്ട് സമ്മതിദായകന് നല്‍കണമെന്നാണ് നിയമമെങ്കിലും ചില പോസ്റ്റുമാന്‍മാര്‍ അത്തരത്തില്‍ പ്രവര്‍ത്തിക്കാറില്ല. പോസ്റ്റ് ഓഫീസിലെ രാഷ്ട്രീയവും ഇതിനു പിന്നിലെ ഒരു കാരണമാണ്. തപാല്‍ വോട്ടുകള്‍ കൂട്ടത്തോടെ സംഘടനാ നേതാക്കള്‍ വാങ്ങാറാണ് പതിവെന്ന് തലസ്ഥാനത്തെ ഒരു പോസ്റ്റ് മാന്‍ മലയാളിവാര്‍ത്തയോട് പറഞ്ഞു. പലപ്പോഴും സമ്മതിദായകന്‍ ഇക്കാര്യം അറിയാറ് പോലുമില്ലെന്നാണ് ഞ്ഞെട്ടിക്കുന്ന വിവരം. സമ്മതിദായകര്‍ക്ക് തപാല്‍ ബാലറ്റുകള്‍ നല്‍കിയാല്‍ അവര്‍ സ്വന്തം ഇഷ്ടപ്രകാരം വോട്ട്‌ചെയ്യുമെന്ന ഭയമാണ് ഇടതുസംഘടനാ നേതാക്കള്‍ക്കുള്ളത്. 

എന്നാല്‍ കോണ്‍ഗ്രസ് സംഘടനയും ഇക്കാര്യത്തില്‍ മോശമല്ലെന്നു റിപ്പോര്‍ട്ടുകളുണ്ട്. അവരുടെ സംഘടനാ നേതാക്കള്‍ പ്രവര്‍ത്തകരുടെ ബാലറ്റ് കൂട്ടത്തോടെ വാങ്ങി വോട്ട്‌ചെയ്യും. കോണ്‍ഗ്രസിന്റെ വോട്ടുകള്‍ ബിജെപിക്ക് ചെയ്യുമോ എന്ന ഭയമാണ് ഇതിനു പിന്നില്‍.

പോസ്റ്റല്‍ വോട്ട് രേഖപ്പെടുത്തുന്നത് സംബന്ധിച്ച് വളരെ നേരത്തേ തന്നെ പോലീസ് ആസ്ഥാനത്തുനിന്ന് വിശദമായ മാര്‍ഗ്ഗനിര്‍ദ്ദേശങ്ങള്‍ പുറപ്പെടുവിച്ചിരുന്നതാണെന്ന് ഉന്നത പോലീസ് വ്യത്തങ്ങള്‍ പറയുന്നു. അന്വേഷണത്തില്‍ പോലീസുകാര്‍ കുറ്റക്കാരാണെന്ന് തെളിയുന്നപക്ഷം കര്‍ശന നടപടികള്‍ സ്വീകരിക്കുമെന്ന് സംസ്ഥാന പോലീസ് മേധാവി വ്യക്തമാക്കി. എന്നാല്‍ ഇടതു സംഘടനാ നേതാക്കള്‍ക്ക് എതിരെ നടപടിയെടുക്കാന്‍ ബഹ്‌റക്ക് കഴിയുമോ എന്ന് കണ്ടറിയാം.

മറ്റ് സര്‍ക്കാര്‍ വകുപ്പുകളില്‍ ഇത് സംബന്ധിച്ച് ഒരന്വേഷണവും നടക്കുന്നില്ല. അന്വേഷണത്തിനുള്ള സാധ്യതയുമില്ല.