തിരുവനന്തപുരം ലോക്‌സഭാ മണ്ഡലത്തില്‍ ന്യൂനപക്ഷ വോട്ടുകളുടെ ഏകീകരണം ഉണ്ടായിട്ടുണ്ടെന്നും എങ്കിലും എന്‍ഡിഎ സ്ഥാനാര്‍ഥി കുമ്മനം രാജശേഖരന്‍ വിജയിക്കുമെന്നും ഒ.രാജഗോപാല്‍ എംഎല്‍എ. കൊച്ചിയില്‍ ബിജെപി സംസ്ഥാന കോര്‍ കമ്മിറ്റി യോഗത്തിനെത്തിയപ്പോഴായിരുന്നു അദ്ദേഹത്തിന്റെ പ്രതികരണം.

ലോക്‌സഭാ തെരഞ്ഞെടുപ്പില്‍ എന്‍ഡിഎ സ്ഥാനാര്‍ഥിയെ തോല്‍പ്പിക്കാന്‍ തിരുവനന്തപുരത്ത് ക്രോസ് വോട്ടിംഗ് നടന്നുവെന്ന ആരോപണം വിശ്വസിക്കുന്നില്ലെന്നും അദ്ദേഹം പറഞ്ഞു.

തിരുവനന്തപുരം ലോക്‌സഭാ മണ്ഡലത്തില്‍ ബിജെപിക്കെതിരെ ന്യൂനപക്ഷങ്ങള്‍ക്കിടയില്‍ ശക്തമായ ഏകീകരണമുണ്ടായി എന്ന് ആര്‍എസ്എസും അടുത്തിടെ വിലയിരുത്തിയിരുന്നു. ബൂത്ത് തലത്തില്‍ നിന്ന് ശേഖരിച്ച വിവരങ്ങളുടെ അടിസ്ഥാനത്തിലാണ് ആര്‍എസ്എസ് ഈ നിഗമനത്തിലെത്തിയത്. എന്നാല്‍ കുമ്മനം രാജശേഖരന്‍ മികച്ച വിജയം മണ്ഡലത്തില്‍ നേടുമെന്നും ആര്‍എസ്എസ് വിലയിരുത്തി.

ബൂത്ത് തലങ്ങല്‍ നിന്ന് ആര്‍എസ്എസ് വിശദമായ വിവരങ്ങള്‍ ശേഖരിച്ചു. പത്തനംതിട്ടയില്‍ സുരേന്ദ്രന്‍ വിജയിക്കുമെന്നാണ് ആര്‍എസ്എസ് വിശ്വസിക്കുന്നത്. തൃശൂരില്‍ മികച്ച മുന്നേറ്റം നടത്തുമെന്നും യോഗം വിലയിരുത്തി. മൂന്നിടങ്ങളിലും ശബരിമല വിഷയമാണ് ബിജെപിക്ക് തുണയായതെന്നും യോഗം വിലയിരുത്തി. 

തിരുവനന്തപുരത്ത് കുമ്മനം രാജശേഖരന്‍ 20,000 വോട്ടിന്റെ ഭൂരിപക്ഷത്തിന് വിജയിക്കുമെന്നാണ് ആര്‍എസ്എസ് വിലയിരുത്തുന്നത്. നാല് ലക്ഷം വോട്ട് വരെ കുമ്മനത്തിന് കിട്ടുമെന്നും അവര്‍ കണക്കുകൂട്ടുന്നു. യുഡിഎഫും എല്‍ഡിഎഫും മല്‍സരിച്ചത് ബിജെപിക്ക് നേട്ടമായി.

ന്യൂനപക്ഷ വോട്ടുകള്‍ കൃത്യമായി ബിജെപിക്കെതിരെ രേഖപ്പെടുത്തിയെന്നാണ് സംഘടനയുടെ വിലയിരുത്തല്‍. എന്നാല്‍ ഈ വോട്ടുകള്‍ ഒരുപെട്ടിയില്‍ അല്ല വീണതെന്നും അവര്‍ കരുതുന്നു. പകരം ശശി തരൂരിനും സി ദിവാകരനുമിടയില്‍ ന്യൂനപക്ഷ വോട്ടുകള്‍ ഭിന്നിച്ചു.

ബിജെപിക്ക് ലഭിക്കേണ്ട വോട്ടുകള്‍ ഭിന്നിച്ചില്ല. എന്നാല്‍ ബിജെപിക്കെതിരെ പോള്‍ ചെയ്ത വോട്ടുകള്‍ ഭിന്നിക്കുകയും ചെയ്തു. ഇതോടെയാണ് കുമ്മനം രാജശേഖരന്റെ വിജയം എളുപ്പമായതെന്ന് ആര്‍എസ്എസ് നേതൃയോഗം വിലയിരുത്തുന്നു.

ബിജെപിക്ക് സ്വാധീനമുള്ള നേമം, വട്ടിയൂര്‍ക്കാവ് നിയമസഭാ മണ്ഡലങ്ങളിലെ വോട്ടുകളാണ് കുമ്മനത്തിന്റെ ജയത്തില്‍ നിര്‍ണായകമാകുക. ആര്‍എസ്എസ് നേരിട്ട ഇറങ്ങി പ്രചാരണത്തിന് ചുക്കാന്‍ പിടിച്ച മണ്ഡലങ്ങളാണിവ. മുഴുവന്‍ സംഘടനാ സംവിധാനങ്ങളും കുമ്മനത്തിന് വേണ്ടി ആര്‍എസ്എസ് ഉപയോഗിച്ചിരുന്നു.

ന്യൂനപക്ഷ വോട്ടുകളുടെ ഏകീകരണം, വട്ടിയൂര്‍ക്കാവിലും തിരുവനന്തപുരത്തും പ്രതീക്ഷിച്ച പോലെ പോളിങ് നടക്കാതിരുന്നത് എന്നിവയാണ് ആര്‍എസ്എസ്സിനെ ആശങ്കയിലാക്കുന്നത്. ശക്തമായ അടിയൊഴുക്കുകള്‍ക്ക് ശബരിമല വിഷയം തുണയായി എന്നും സംഘടന വിലയിരുത്തുന്നു.