കേരളത്തിലെ തെരഞ്ഞെടുപ്പ് പ്രചാരണത്തില്‍ സുരേഷ് ഗോപിയും കെ. സുരേന്ദ്രനും ഉണ്ടാക്കിയ ഓളം ചെറുതല്ല. അതിന് പിന്നാലെ ഇരുവരേയും ഡല്‍ഹിക്ക് വിളിപ്പിച്ച് പ്രധാനമന്ത്രി നരേന്ദ്ര മോഡി. ഡല്‍ഹിയിലെ ബിജെപി സ്ഥാനാര്‍ഥികളുടെ പ്രചാരണത്തിനാണ് കേരളത്തില്‍ നിന്നു നേതാക്കളെ ക്ഷണിച്ചത്. കെ.സുരേന്ദ്രന്‍, സുരേഷ് ഗോപി എംപി, ശോഭാ സുരേന്ദ്രന്‍ എന്നിവരാണു 4 മുതല്‍ 7 വരെ പ്രചാരണത്തിന് എത്തുന്നത്. മയൂര്‍ വിഹാര്‍ ഫേസ് ത്രീയില്‍ 4നു വൈകിട്ട് 7നു ബിജെപി സൗത്ത് ഇന്ത്യന്‍ സെല്‍ സംഘടിപ്പിക്കുന്ന പൊതുസമ്മേളനത്തില്‍ കെ. സുരേന്ദ്രന്‍ പ്രസംഗിക്കും. ദില്‍ഷാദ് ഗാര്‍ഡനില്‍ 5നു രാവിലെ 9.30നു നടക്കുന്ന യോഗത്തിലും കെ. സുരേന്ദ്രന്‍ പ്രസംഗിക്കും. മെഹ്‌റോളിയില്‍ 5നു വൈകിട്ട് 6നു കെ. സുരേന്ദ്രനും വി. മുരളീധരന്‍ എംപിയും പ്രസംഗിക്കും.

വികാസ്പുരിയില്‍ 5നു രാവിലെ 10, ഹസ്താല്‍ 11, വൈകിട്ട് 6 നു ഗോള്‍ മാര്‍ക്കറ്റ് എന്നിവിടങ്ങളിലാണു യഥാക്രമം ശോഭാ സുരേന്ദ്രന്റെ പ്രചാരണം. ആര്‍.കെ. പുരത്തു 6നു വൈകിട്ട് 7 മണിക്കു സുരേഷ് ഗോപി എംപി പങ്കെടുക്കുന്ന യോഗം നടക്കും. തുഗ്ലക്കാബാദിലും 7നു വൈകിട്ട് 7.30നു സുരേഷ് ഗോപി പ്രസംഗിക്കും. 12നാണു ഡല്‍ഹിയില്‍ തിരഞ്ഞെടുപ്പ് കൂടുതല്‍ കേരളാ നേതാക്കളെ എത്തിച്ചു 7 മണ്ഡലങ്ങളിലും പരമാവധി മലയാളി വോട്ടുകള്‍ സമാഹരിക്കാനാണു ബിജെപി ലക്ഷ്യമിടുന്നത്.

അതേസമയം ലോക്‌സഭ തെരഞ്ഞെടുപ്പില്‍ തിരുവനന്തപുരത്തും പത്തനംതിട്ടയിലും ബിജെപി വിജയമുറപ്പിക്കുകയാണ്. ആര്‍എസ്എസും ബിജെപിയും നടത്തിയ കണക്കെടുപ്പിലാണ് സംസ്ഥാനത്ത് താമര വിരിയുമെന്നുറപ്പിച്ചത്.

തിരുവനന്തപുരത്ത് കുമ്മനം രാജശേഖരന്‍ മികച്ച വിജയം സ്വന്തമാക്കും. ശബരിമല വിഷയം അലയടിച്ച പത്തനംതിട്ടയില്‍ ശക്തമായ മത്സരം നടക്കുമെങ്കിലും കെ സുരേന്ദ്രന്‍ ജയിച്ചു കയറുമെന്നും ബിജെപി വ്യക്തമാക്കുന്നു.

ന്യൂനപക്ഷ വോട്ടുകളും ഇടതുവോട്ടുകളും യുഡിഎഫിന് അനുകൂലമായി ഏകീകരിക്കപ്പെട്ടില്ലെങ്കില്‍ രണ്ട് മണ്ഡലങ്ങളിലും അത്ഭുതം പ്രതീക്ഷിക്കാം. എന്നാല്‍ ത്രിശൂര്‍, പാലക്കാട് എന്നിവടങ്ങളില്‍ വിജയ പ്രതീക്ഷ വേണ്ടതില്ലെന്നും വിലയിരുത്തലുണ്ട്.

സുരേഷ് ഗോപി മത്സരരംഗത്തുള്ള തൃശൂരില്‍ അട്ടിമറി സാധ്യതകള്‍ നിലനില്‍ക്കുന്നുണ്ട്. എന്നാല്‍, പാലക്കാട് രണ്ടാം സ്ഥാനത്തേക്ക് തള്ളപ്പെടുമെന്നുമാണ് ബിജെപിയുടെ പ്രാഥമിക വിലയിരുത്തല്‍. 

അതേസമയം കണക്കുകള്‍ എങ്ങനെ കൂട്ടി കിഴിച്ചാലും കെ.സുരേന്ദ്രന്‍ പത്തനംതിട്ടയില്‍ നിന്നും വിജയിക്കുമെന്ന് ആര്‍ക്കും പറയാന്‍ കഴിയില്ലെന്നാണ് വിലയിരുത്തല്‍. കാരണം ഒന്നര ലക്ഷത്തിലധികം വോട്ട് കൂടുതല്‍ സമാഹരിച്ചാലേ സുരേന്ദ്രന് വിജയിക്കാന്‍ കഴിയൂ. കഴിഞ്ഞ നിയമസഭാ തിരഞ്ഞെടുപ്പില്‍ ഏകദേശം രണ്ട് ലക്ഷത്തിനടുത്ത് വോട്ട് ബി.ജെ.പി ഈ മണ്ഡലങ്ങളില്‍ നിന്നായി നേടിയിരുന്നു.

2014ലെ ലോകസഭാ തിരഞ്ഞെടുപ്പില്‍ 3,58,842 വോട്ടുകള്‍ നേടിയാണ് യു.ഡി.എഫിലെ ആന്റോ ആന്റണി വിജയിച്ചിരുന്നത്. മൂന്ന് ലക്ഷത്തിലേറെ വോട്ട് ഇടതുപക്ഷവും നേടിയിരുന്നു. ബി.ജെ.പിക്ക് ലഭിച്ചതാകട്ടെ 1,38,954 വോട്ടുകളും മാത്രമായിരുന്നു. ഹിന്ദു ഭൂരിപക്ഷമണ്ഡലത്തില്‍ വലിയ രൂപത്തില്‍ സാമുദായിക ധ്രുവീകരണം നടന്നാല്‍ മാത്രമേ അട്ടിമറി വിജയത്തിന് സാധ്യതയുള്ളൂ.

ഇത്തവണ പത്തു ലക്ഷത്തിലേറെ പേരാണ് പത്തനംതിട്ടയില്‍ വോട്ട് ചെയ്തത്. അതായത് ഒരു സ്ഥാനാര്‍ത്ഥിക്ക് വിജയിക്കണമെങ്കില്‍ മൂന്നര ലക്ഷം വോട്ടെങ്കിലും നേടണം. നിലവിലെ കണക്കുകള്‍ വച്ച് ഇടതുപക്ഷത്തിനും യു.ഡി.എഫിനും ഈ നമ്പറില്‍ എത്താന്‍ പ്രയാസമില്ല.

എന്നാല്‍ കണക്കുകള്‍ക്കും മീതെയാണ് കാര്യങ്ങള്‍ പോകുന്നതെങ്കില്‍ എല്ലാം തകിടം മറിയും. കേരള രാഷ്ട്രീയത്തിലെ സകല സമവാക്യങ്ങളും തകര്‍ന്നടിയും. കേരളം ഇനി ആര് ഭരിക്കണം എന്ന രൂപത്തിലേക്ക് വരെ വളരുന്ന പാര്‍ട്ടിയായി ബി.ജെ.പി മാറും.