സെക്രട്ടേറിയറ്റ് ജീവനക്കാരുടെ പഞ്ചിങ് കര്‍ശനമാക്കാന്‍ സര്‍ക്കാര്‍ തീരുമാനം. ജീവനക്കാര്‍ വരുമ്പോഴും പോകുമ്പോഴും പഞ്ച് ചെയ്യണം. ഒറ്റത്തവണ മാത്രമുള്ള പഞ്ചിങ് ഹാജരായി കണക്കാക്കില്ല.മാസത്തില്‍ 180 മിനിറ്റ് അനുവദിച്ചിരുന്ന ഗ്രേഡ് ടൈം 300 മിനിറ്റ് എന്ന തോതില്‍ ഉയര്‍ത്തി. ഒരു ദിവസം പരമാവധി 60 മിനിറ്റ് മാത്രമേ ഇതിലേക്ക് വിനിയോഗിക്കാവൂ.
എന്നാല്‍, നിലവിലെ ഫെ്‌ലക്‌സി ടൈം (വൈകി വന്നാല്‍ അത്രയും സമയം കൂടി വൈകീട്ട് ജോലി ചെയ്യുന്ന രീതി) അനുവദിക്കില്ല. സെക്രട്ടേറിയറ്റിലെ പ്രവൃത്തി സമയം രാവിലെ 10.15 മുതല്‍ 5.15 വരെയാകും. ഇതു സംബന്ധിച്ച് പൊതുഭരണ വകുപ്പ് പ്രിന്‍സിപ്പില്‍ സെക്രട്ടറി ബിശ്വനാഥ് സിന്‍ഹ ഉത്തരവിറക്കി. പൊതുഭരണധനകാര്യനിയമ വകുപ്പുകളിലെ ജീവനക്കാരുടെ ബില്‍ കൈകാര്യം ചെയ്യുന്ന അണ്ടര്‍ സെക്രട്ടറിമാരെ പഞ്ചിങ് നിരീക്ഷണത്തിന് ചുമതലപ്പെടുത്തി.
ദിവസ വേതനക്കാര്‍, താല്‍ക്കാലികകരാര്‍ ജീവനക്കാര്‍ എന്നിവര്‍ ബയോമെട്രിക് പഞ്ചിങ് രേഖപ്പെടുത്തേണ്ട. അറിയിപ്പുണ്ടാകുന്നതുവരെ ഹാജര്‍ബുക്ക് തുടരും. നിര്‍ദേശങ്ങളില്‍ വീഴ്ച വരുത്തുന്നവര്‍ക്കെതിരെ കര്‍ശന അച്ചടക്ക നടപടി സ്വീകരിക്കുമെന്ന് ഉത്തരവിലുണ്ട്. ജീവനക്കാരുടെ ഗ്രേസ് സമയ ബാക്കി 'സ്പാര്‍ക്കി'ല്‍ കാണാം. മുന്‍ മാസം 16 മുതല്‍ അതത് മാസം 15 വരെയാണ് ഗ്രേസ് സമയം കണക്കാക്കുക. പകുതി ദിന ജോലിക്ക് ഇത് അനുവദിക്കില്ല. വൈകിയെത്തല്‍ അനുമതി, നേരത്തേ പോകല്‍ എന്നിവ അനുവദിക്കില്ല.

മാസം 10 മണിക്കൂറോ അതിലധികമോ അധിക സമയം ജോലി ചെയ്യുന്ന ഉദ്യോഗസ്ഥര്‍ക്ക് മാസം ഒരു കോമ്പന്‍സേഷന്‍ ഓഫ് അനുവദിക്കും. ഓരോ ദിവസത്തെയും പ്രവൃത്തി സമയമായ ഏഴ് മണിക്കൂറില്‍ കൂടുതല്‍ വരുന്ന സമയമാണ് ഇതിനായി കണക്കാക്കുക. 'സ്പാര്‍ക്ക്' മുഖേന അനുവദിക്കുന്ന കോമ്പന്‍സേറ്ററി ഓഫ് ഏതാനും ജീവനക്കാര്‍ ദുരുപയോഗം ചെയ്ത സാഹചര്യത്തില്‍ ഇനി അതിന് കണ്‍ട്രോളിങ് ഓഫിസര്‍ക്ക് നല്‍കണം.
ഡെപ്യൂട്ടി സെക്രട്ടറി, ജോയന്റ് സെക്രട്ടറി, അഡീഷനല്‍ സെക്രട്ടറി, സ്‌പെഷല്‍ സെക്രട്ടറി, സെക്രട്ടറി എന്നിവര്‍ക്ക് മാത്രമാകും അനുമതിക്ക് അധികാരം. ഓഫിസ് ഓര്‍ഡറിന്റെ അടിസ്ഥാനത്തില്‍ മാത്രമേ അവധി ദിവസങ്ങളില്‍ അനുവദിച്ചുവരുന്ന കോമ്പന്‍സേഷന്‍ ഓഫ് അനുവദിക്കൂ. സെക്രട്ടേറിയറ്റ് സര്‍വിസില്‍ പുതിയ ഉദ്യോഗസ്ഥര്‍ പെന്‍ നമ്പര്‍ ലഭ്യമാകുന്ന തീയതി മുതല്‍ പഞ്ചിങ് രേഖപ്പെടുത്തണം. വെയിറ്റിങ് ഫോര്‍ പോസ്റ്റിങ് ഗസറ്റഡ് ജീവനക്കാര്‍ ബയോമെട്രിക് അറ്റന്‍ഡന്‍സ് മാനേജ്മന്റെ് സിസ്റ്റത്തിലൂടെ ഹാജര്‍ രേഖപ്പെടുത്തേണ്ടതില്ല. നോണ്‍ ഗസറ്റഡ് ജീവനക്കാര്‍ പഞ്ച് ചെയ്യണം.
സ്പാര്‍ക്ക് സംവിധാനം വഴി ലീവ്, ഔദ്യോഗിക യാത്ര എന്നിവ ഓഫിസില്‍ ഹാജരായി 10 ദിവസത്തിനകം നല്‍കണം. ജീവനക്കാരുടെ ഹാജര്‍ നില സ്പാര്‍ക്കില്‍ കാണാം.