കൊട്ടാരക്കര പുലമണ്‍ കോട്ടപ്പുറം അച്യുതത്തില്‍ കുമാര്‍-മഞ്ജു ദമ്പതികളുടെ മകളുടെ തലയോട്ടിയിലെ എല്ലൂകള്‍ ഒട്ടിപ്പിടിച്ച അവസ്ഥയ്‌ലായതു കാരണം തലച്ചോറിന് വളരാനാകുന്നുണ്ടായിരുന്നില്ല. തുടര്‍ന്ന് രണ്ടുവയസ്സുകാരിക്ക് അതിനുള്ള ശസ്ത്രക്രിയ തിരുവനന്തപുരം എസ്എടി ആശുപത്രിയില്‍ വിജയകരമായി നടത്തി.

തലച്ചോറിന്റെ വളര്‍ച്ചക്കനുസരിച്ച് തലയോട്ടി വികാസം പ്രാപിക്കാനായി സാധാരണ നവജാതശിശുക്കളില്‍ തലയോട്ടി ഒട്ടിച്ചേരാറില്ല. എന്നാല്‍ കുമാര്‍-മഞ്ജു ദമ്പതികളുടെ മകള്‍ ആത്മീയയുടെ തലയോട്ടി ഒട്ടിച്ചേര്‍ന്ന അവസ്ഥയില്‍ ആയിരുന്നതിനാല്‍ വളര്‍ച്ചക്കനുസരിച്ച് തലച്ചോറിനാവശ്യമായ സ്ഥലമില്ലാത്തതിനാല്‍, അത് തലയോട്ടിക്കുള്ളില്‍ ഞെരുങ്ങിയാണ് വളര്‍ന്നത്. പിന്നാലെ കണ്ണുകള്‍ പുറത്തേക്ക് തള്ളുകയും തലയുടെ മുകള്‍ഭാഗം വലുതാകുകയും ചെയ്തു. കണ്ണുകള്‍ തള്ളി വന്നതിനാല്‍ കണ്ണടക്കാനോ ഇമ ചിമ്മാനോ കഴിഞ്ഞിരുന്നില്ല.

കുഞ്ഞിനു മൂന്നുമാസം പ്രായമുള്ളപ്പോള്‍ ഒട്ടിച്ചേര്‍ന്ന തലയോട്ടിയുടെ എല്ലുകള്‍ വിടുവിക്കുന്നതിനുള്ള ശസ്ത്രക്രിയ കൊച്ചിയിലെ സ്വകാര്യ ആശുപത്രിയില്‍ ചെയ്തിരുന്നു. എന്നാല്‍ വീണ്ടും എല്ലുകള്‍ ഒട്ടിച്ചേരുകയായിരുന്നു. ആ ശസ്ത്രക്രിയയ്ക്ക് അഞ്ചുലക്ഷത്തോളം രൂപ ചെലവായി.

ഒരു വയസില്‍ വീണ്ടുമൊരു ശസ്ത്രക്രിയ വേണമെന്ന് ആശുപത്രി അധകൃതര്‍ നിര്‍ദേശിച്ചിരുന്നെങ്കിലും വീണ്ടും അഞ്ചുലക്ഷം രൂപ ചെലവുള്ള ചികിത്സ നടത്താന്‍ കഴിഞ്ഞില്ല. തുടര്‍ന്ന് ആരോഗ്യവകുപ്പുമന്ത്രിയുടെ ഓഫിസിന്റെ ഇടപെടലില്‍ ആര്‍ബിഎസ്‌കെ (രാഷ്ട്രീയ ബാല സുരക്ഷാ പദ്ധതി) പദ്ധതിയിലൂടെ ആ രണ്ടു വയസ്സുകാരിയ്ക്ക് എസ്എടി ആശുപത്രിയില്‍ ചികിത്സയ്ക്കു വഴിതെളിഞ്ഞു. ഏപ്രില്‍ 20-ന് കുഞ്ഞിന് എസ് എടിയില്‍ തലയോട്ടിയുടെ ശസ്ത്രക്രിയ നടത്തി.