സോളാര് വിവാദത്തിലൂടെ ചൂടുള്ള വാര്ത്തകള് സൃഷ്ടിച്ച സരിത എസ്. നായര് കോണ്ഗ്രസ് അധ്യക്ഷന് രാഹുല്ഗാന്ധിയെ അമേഠിയില് നേരിടുന്നത് പച്ചമുളക് ചിഹ്നത്തില്
സോളാര് വിവാദത്തിലൂടെ ചൂടുള്ള വാര്ത്തകള് സൃഷ്ടിച്ച സരിത എസ്. നായര് കോണ്ഗ്രസ് അധ്യക്ഷന് രാഹുല്ഗാന്ധിയെ അമേഠിയില് നേരിടുന്നത് പച്ചമുളക് ചിഹ്നത്തില്. വയനാട്ടില് തന്റെ പത്രിക തള്ളിയതോടെയാണ് സരിത അമേഠിയിലേക്ക് വണ്ടികയറിയത്. ഒരു പാര്ട്ടിയുടെയും പിന്തുണയില്ലാതെ സ്വതന്ത്രയായാണ് സരിത അങ്കം കുറിക്കുന്നത്. പ്രചരണത്തിനും മറ്റും ഇതുവരെ ഇറങ്ങിയതായി അറിവില്ല. രാഹുല് ഗാന്ധിക്കെതിരെ വയനാട്ടില് പത്രിക നല്കിയിരുന്നെങ്കിലും കേസുകളുടെ രേഖകള് ഹാജരാക്കാത്തതിനാല് പത്രിക തള്ളുകയായിരുന്നു. അത് പോലെ എറണാകുളം ലോക്സഭാ മണ്ഡലത്തിലെ യു.ഡി.എഫ് സ്ഥാനാര്ത്ഥി ഹൈബി ഈഡനെതിരെ മത്സരിക്കാനും പത്രിക സമര്പ്പിച്ചിരുന്നു. അതും തള്ളിപ്പോയി.
അമേഠിയില് മത്സരിക്കാന് തിരുവനന്തപുരം മലയിന്കീഴ് വിളവൂര്ക്കലിലെ വിലാസമാണ് നല്കിയിരിക്കുന്നത്. വയനാട്ടിലെ നാമനിര്ദ്ദേശപത്രിക തള്ളിയതിനെതിരെ സരിത എസ് നായര് ഹൈക്കോടതിയെ സമീപിച്ചിരുന്നു. ഹര്ജി നിലനില്ക്കുന്നതല്ലെന്ന് ചൂണ്ടിക്കാട്ടി ഹൈക്കോടതി അത് തള്ളിയിരുന്നു. ആറ്റിങ്ങല് മണ്ഡലത്തിലെ യു.ഡി.എഫ് സ്ഥാനാര്ത്ഥി അടൂര്പ്രകാശിനെതിരെയും മത്സരിക്കുമെന്ന് പ്രഖ്യാപിച്ചിരുന്നെങ്കിലും പത്രിക പോലും നല്കിയിരുന്നില്ല. കേരളത്തിലെ പല കോണ്ഗ്രസ് നേതാക്കള്ക്കും എതിരെ സരിത ലൈംഗിക പീഢനം ഉള്പ്പെടയുള്ള പരാതികള് നല്കിയിരുന്നു. ഇക്കാര്യങ്ങളെല്ലാം ചൂണ്ടിക്കാട്ടി നിരവധി തവണ രാഹുല് ഗാന്ധിക്ക് സരിത പരാതി അയച്ചിരുന്നു. അതില് നടപടി ഉണ്ടാകാത്തതിനെ തുടര്ന്നാണ് അദ്ദേഹത്തിനെതിരെ സരിത മത്സരിക്കുന്നതെന്ന് അറിയുന്നു.
സരിതയുടെ പരാതിയുടെ അടിസ്ഥാനത്തില് തെരഞ്ഞെടുപ്പിന് തൊട്ട് മുമ്പ് സര്ക്കാര് അടൂര്പ്രകാശിനും ഹൈബി ഈഡനും എതിരെ കോടതിയില് എഫ്.ഐ.ആര് സമര്പ്പിച്ചിരുന്നു. ജനപ്രതിനിധികള്ക്കെതിരായ കേസ് പരിഗണിക്കുന്ന എറണാകുളത്തെ കോടതിയിലാണ് എഫ്.ഐ.ആര് സമര്പ്പിച്ചത്. എന്നാല് പിന്നീട് അത് സംബന്ധിച്ച നടപടിക്രമങ്ങളൊന്നും കോടതിയുടെയോ, സര്ക്കാരിന്റെയോ ഭാഗത്ത് നിന്ന് ഉണ്ടായില്ല. സി.പി.എമ്മിന്റെയും സര്ക്കാരിന്റെയും രാഷ്ട്രീയ പ്രതികാരമാണെന്നാണ് യു.ഡി.എഫ് ആരോപിച്ചത്. അത് ശരിവയ്ക്കുന്ന രീതിയിലാണ് കാര്യങ്ങളുടെ പോക്ക്. ഹൈബി ഈഡനും അടൂര്പ്രകാശിനും പുറമേ ഉമ്മന്ചാണ്ടി, കെ.സി വേണുഗോപാല്, എ.പി അനില്കുമാര് എന്നിവര്ക്കെതിരെയും സരിത പരാതി നല്കിയിട്ടുണ്ട്.
അമേഠിയില് രാഹുലിനെതിരെ സ്മൃതി ഇറാനിയും മത്സരിക്കുന്നുണ്ട്. അങ്ങനെ രണ്ട് സ്ത്രീകളാണ് രാഹുലിന്റെ എതിരാളികള്. എസ്.പി- ബി.എസ്.പി സഖ്യം രാഹുലിനെതിരെ സ്ഥാനാര്ത്ഥിയെ നിര്ത്തിയിട്ടില്ല. രാഹുല് രണ്ട് തവണ നല്ല ഭൂരിപക്ഷത്തിലാണ് ഇവിടെ നിന്ന് രാഹുല് വിജയിച്ചത്. കഴിഞ്ഞ തവണ സ്മൃതി ഇറാനി ബി.ജെ.പി സ്ഥാനാര്ത്ഥിയായപ്പോള് രാഹുലിന്റെ ഭൂരിപക്ഷം കുറഞ്ഞിരുന്നു. കഴിഞ്ഞ നിയമസഭാ തെരഞ്ഞെടുപ്പില് ബി.ജെ.പി അമേഠിയുടെ കീഴിലുള്ള നിയമസഭാ മണ്ഡലങ്ങളിലെല്ലാം മികച്ച വിജയമാണ് കൈവരിച്ചത്. അതിനാല് ഇത്തവണ രാഹുലിനെ പരാജയപ്പെടുത്താമെന്ന ആത്മവിശ്വാസത്തിലാണ് സ്മൃതി ഇറാനി. രാഹുല് അമേഠിക്ക് വേണ്ടി ഒന്നും ചെയ്തിട്ടില്ലെന്നാണ് സ്മൃതിയുടെ പ്രധാന ആക്ഷേപം.
https://www.facebook.com/Malayalivartha
