കഞ്ചാവ് കൃഷി നടത്തിയ യുവാവിനെ പൊലീസ് അറസ്റ്റ്‌ ചെയ്തു. പിടിയിലായ യുവാവിനെ ചോദ്യം ചെയ്തപ്പോള്‍ കേട്ട മറുപടി കേട്ട് എക്സൈസ് ഞെട്ടി. ഇടുക്കിയിലും തമിഴ്നാട്ടിലും എപ്പോഴും പോയി കഞ്ചാവ് വാങ്ങാന്‍ വയ്യാത്തതിനാലാണ് യുവാക്കള്‍ വീട്ടില്‍ കൃഷി തുടങ്ങിയതെന്നാണ് യുവാവ് പൊലീസിനോട് പറ‍ഞ്ഞത്. കടുത്തുരുത്തിയില്‍ എക്സൈസ് സംഘം നടത്തിയ പരിശോധനയിലാണ് അലങ്കാര ചെടികള്‍ക്കൊപ്പം കഞ്ചാവ് ചെടികള്‍ കണ്ടെത്തിയത്. ചില വീടുകളുടെ ടെറസിനു മുകളില്‍ യുവാക്കള്‍ കൂട്ടം കൂടുന്നതില്‍ അസ്വാഭാവികതയുണ്ടെന്ന് രഹസ്യ വിവരം ലഭിച്ചതിനെ തുടര്‍ന്നാണ് എക്സൈസ് പരിശോധന നടത്തിയത്.

ഇടുക്കിയിലും തമിഴ്നാട്ടിലും ഇടയ്ക്കിടെ പോയി കഞ്ചാവ് വാങ്ങാന്‍ മടിയായതിനാലാണ് വീട്ടില്‍ കൃഷി തുടങ്ങിയത് എന്നായിരുന്നു ഒരു യുവാവ് പൊലീസിനോട് പറഞ്ഞത്. ചുരുങ്ങിയ മാസങ്ങള്‍ കൊണ്ട് ജില്ലയില്‍ നിരവധി കേസുകളാണ് രജിസ്റ്റ‌ര്‍ ചെയ്തിരിക്കുന്നത്. ഒരു സംഘം യുവാക്കളാണ് കഞ്ചാവ് വളര്‍ത്തല്‍ പരീക്ഷണത്തിനു പിന്നിലെന്ന് പൊലീസ് വ്യക്തമാക്കി. വീടിന്റെ ടെറസിലും മുറ്റത്തുമായാണ് ഇവര്‍ കഞ്ചാവ് കൃഷി ചെയ്തിരുന്നത്.

മുളക്കുളം പെരുവയില്‍ യുവാവ് വീട്ടുമുറ്റത്ത് വളര്‍ത്തിയിരുന്ന 33 കഞ്ചാവ് ചെടികളാണ് എക്സൈസ് പിടികൂടി കഴിഞ്ഞ ദിവസം നശിപ്പിച്ചത്. കടുത്തുരുത്തി പെരുവയില്‍ വീട്ടുമുറ്റത്ത് വളമിട്ട്,​ നട്ടുനനച്ചാണ് യുവാവ് കഞ്ചാവ് തോട്ടം വളര്‍ത്തിയെടുത്തത്. 33 കഞ്ചാവ് ചെടികളാണ് മാത്യൂസ് വീട്ടുമുറ്റത്ത് വളര്‍ത്തിയത്. രഹസ്യ വിവരത്തെ തുടര്‍ന്ന് എക്സൈസ് ഇയാളുടെ നീക്കങ്ങള്‍ നിരീക്ഷിക്കുകയും പിടികൂടുകയുമായിരുന്നു.

രണ്ടു മാസം വളര്‍ച്ച എത്തിയ 20 സെന്റീമീറ്ററില്‍ അധികം ഉയരമുള്ള കഞ്ചാവ് ചെടികളാണ് പിടിച്ചെടുത്തത്. കഞ്ചാവ് ഉപയോഗിച്ച ശേഷം ഇതിന്റെ വിത്തെടുത്താണ് ഇയാള്‍ ചെടികള്‍ നട്ടുവളര്‍ത്തിയത്. ഒരു മാസം കൂടി കഴി‍ഞ്ഞാല്‍ ഉപയോഗത്തിന് പാകമാവുന്ന കഞ്ചാവ് ചെടികളാണിവ. അതേസമയം,​ മുറ്റത്ത് കൃഷി ചെയ്ത് വളര്‍ത്തുന്നത് കഞ്ചാവ് ചെടികളാണെന്ന് വീട്ടുകാര്‍ക്ക് പോലും അറിവില്ലായിരുന്നു. കഞ്ചാവ് ചെടികള്‍ക്ക് വളമിട്ട് നനയ്ക്കുന്നതിനിടെ എക്സൈസ് സംഘം തന്ത്രപൂര്‍വമാണ് മാത്യൂസിനെ കുടുക്കിയത്. ഇയാള്‍ മുന്‍പും കഞ്ചാവുമായി പിടിയിലായിട്ടുണ്ടെന്ന് എക്സൈസ് ഉദ്യാഗസ്ഥര്‍ വ്യക്തമാക്കി.