മഞ്ചേരി വളാഞ്ചേരി വെണ്ടല്ലൂര്‍ അച്ചുതന്‍ എഴുത്തച്ഛന്റെ ഭാര്യ കൊല്ലയില്‍ കുഞ്ഞുലക്ഷ്മിയമ്മ (88)കൊല്ലപ്പെട്ട കേസില്‍ പാലക്കാട് ചെമ്പ്ര പഴനെല്ലിപ്പുറം അരങ്ങന്‍ പള്ളിയാളിയില്‍ വാസുവിന്റെ ഭാര്യ ശാന്തകുമാരി എന്ന ശാന്ത (61) യെ മഞ്ചേരി അഡീഷണല്‍ ജില്ലാ സെഷന്‍സ് കോടതി (ഒന്ന്) ജഡ്ജി എ വി നാരായണന്‍ ജീവപര്യന്തം തടവിനും 55000 രൂപ പിഴയടക്കാനും ശിക്ഷിച്ചു.

കുഞ്ഞുലക്ഷ്മിയമ്മ കൊലക്കേസില്‍ വിധിപ്രസ്താവത്തിനു മണിക്കൂറുകള്‍ ബാക്കിനില്‍ക്കെ, അമ്മയുടെ കൊലപാതകിക്കു കോടതി വിധിക്കുന്ന ശിക്ഷ എന്തെന്ന്് കേള്‍ക്കാന്‍ കാക്കാതെ ആറുവര്‍ഷത്തോളം നീണ്ട നിയമപോരാട്ടം നടത്തിയ മകന്‍ സത്യനാരായണ (60) വളാഞ്ചേരിയിലെ സ്വകാര്യ ആശുപത്രിയില്‍ ആകസ്മികമായി മരണത്തിന് കീഴടങ്ങി. കരള്‍ സംബന്ധിയായ അസുഖം ബാധിച്ച് ദീര്‍ഘനാളായി ചികിത്സയിലായിരുന്നു എല്‍.ഐ.സി. ഏജന്റായ സത്യനാരായണന്‍. ഇന്നലെ രാവിലെ ആറിനാണ് മരണത്തിന് കീഴടങ്ങിയത്.

സത്യനാരായണന്റെ വീട്ടിലെ ജോലിക്കാരിയായിരുന്നു പ്രതി ശാന്തകുമാരി. 2013 മാര്‍ച്ച് നാലിനാണ് സ്വര്‍ണ്ണാഭരണങ്ങള്‍ മോഷ്ടിക്കുന്നതിനായി ശാന്ത, കുഞ്ഞുലക്ഷ്മിയമ്മയെ കൊലപ്പെടുത്തിയത്. ശാന്തകുമാരിയെ മാതാവിനെ ശുശ്രൂഷിക്കുന്നതിനും വീട്ടു ജോലിക്കുമായി നിയമിച്ചതായിരുന്നു. കുഞ്ഞുലക്ഷ്മിയമ്മയുടെ വള, മാല തുടങ്ങി 34 ഗ്രാം സ്വര്‍ണ്ണാഭരണങ്ങള്‍ കവരുന്നതിനാണ് കൊലപാതകം നടത്തിയത്. മോഷ്ടിക്കപ്പെട്ട സ്വര്‍ണ്ണാഭരണങ്ങള്‍ പ്രതി അന്നു തന്നെ വില്‍പ്പന നടത്തിയതായി അന്വേഷണ ഉദ്യോഗസ്ഥര്‍ കണ്ടെത്തിയിരുന്നു.

ഇന്ത്യന്‍ ശിക്ഷാനിയമം 302 പ്രകാരം കൊലപാതകം നടത്തിയതിന് ജീവപര്യന്തം തടവും 25000 രൂപ പിഴയും, 449 പ്രകാരം കൊലപാതകത്തിനായി അതിക്രമിച്ചു കയറിയതിന് അഞ്ചുവര്‍ഷം കഠിന തടവും 10000 രൂപ പിഴയും, 201 വകുപ്പ് പ്രകാരം തെളിവു നശിപ്പിച്ചതിന് അഞ്ചുവര്‍ഷം കഠിന തടവും 10000 രൂപ പിഴയും, 394 വകുപ്പ് പ്രകാരം കവര്‍ച്ച നടത്തിയതിന് അഞ്ചുവര്‍ഷം കഠിന തടവും 10000 രൂപ പിഴയും എന്നിങ്ങനെയാണ് ശിക്ഷ. തടവ് ശിക്ഷ ഒന്നിച്ചനുഭവിച്ചാല്‍ മതി. പിഴയടക്കാത്ത പക്ഷം ആറു മാസത്തെ അധിക കഠിന തടവ് അനുഭവിക്കണം.

പിഴയടക്കുന്ന പക്ഷം തുക, പ്രതിയില്‍ നിന്നും സ്വര്‍ണ്ണം വാങ്ങിയയാളായ ദിലീപ് സേട്ടിന് നല്‍കണം. ആഭരണങ്ങള്‍ ഉരുക്കി സ്വര്‍ണ്ണ കട്ടികള്‍ ആക്കിമാറ്റിയത് ഇയാളില്‍ നിന്നും അന്വേഷണ സംഘം കണ്ടെടുത്തിരുന്നു. ഈ സ്വര്‍ണ്ണം കൊല്ലപ്പെട്ട കുഞ്ഞുലക്ഷ്മിയമ്മയുടെ മകളും ഇപ്പോള്‍ വളാഞ്ചേരി എം ഇ എസ് സെന്‍ട്രല്‍ സ്‌കൂളിലെ അദ്ധ്യാപികയുമായ സതി ടീച്ചര്‍ക്ക് നല്‍കാനും കോടതി വിധിച്ചു.

പ്രോസിക്യൂഷനു വേണ്ടി ഹാജരായ സ്പെഷ്യല്‍ പബ്ലിക് പ്രോസിക്യൂട്ടര്‍ പി രാജേഷ് 33 സാക്ഷികളെയും, രണ്ട് സാക്ഷികളെ പ്രതിഭാഗവും കോടതി മുമ്പാകെ വിസ്തരിച്ചു. 50 രേഖകളും 12 തൊണ്ടി മുതലുകളും പ്രോസിക്യൂഷന്‍ ഹാജരാക്കിയപ്പോള്‍ അഞ്ച് രേഖകള്‍ പ്രതിഭാഗവും ഹാജരാക്കി. സത്യനാരായണന്റെ സംസ്‌കാരം ഇന്നു രാവിലെ ഷൊര്‍ണൂര്‍ ശാന്തിതീരത്തു നടക്കും. ഭാര്യ: വിജയലക്ഷ്മി. മക്കള്‍: ഹരിശങ്കര്‍, സിന്ധു. മരുമകന്‍: ബിജു.