കേരളത്തില്‍ ശരണം വിളി ഒരു പ്രതിഷേധ മാര്‍ഗമായി മാറിയത് അടുത്തിടേയാണ്. ശബരിമലയില്‍ യുവതീ പ്രവേശന വിധി വന്നതോടെ ശബരിമലയില്‍ ശരണം വിളിക്കുന്നതിന് നിയന്ത്രണം ഏര്‍പ്പെടുത്തിയതോടെയാണ് അതൊരു പ്രതിഷേധമായി ഉയര്‍ന്നത്. പിന്നീട് കോടതിയിടപെട്ട് ശരണം വിളിയാകാമെന്ന് പറഞ്ഞിട്ടും ശരണം വിളിയും നാമജപവും വലിയ പ്രതിഷേധമായി മാറി. എന്തിന് മുഖ്യമന്ത്രിയുടെ വേദിയില്‍ പോലും ശരണംവിളിയുണ്ടായി. അടുത്തിടെ തെരഞ്ഞെടുപ്പ് സമയത്ത് മുഖ്യമന്ത്രിയുടെ വേദിക്കരികില്‍ കാട്ടാക്കടയിലെ അമ്പലത്തില്‍ നാമജപം ഉയര്‍ന്നതിനെ തുടര്‍ന്ന് ഫ്യൂസൂരിയത് വലിയ വിവാദമായിരുന്നു. അതിനിടെ ബംഗാളിലും മമതയ്ക്ക് നേരെ ശരണം വിളിയുയര്‍ന്നു. ഇവിടെ അയ്യപ്പനാണെങ്കില്‍ അവിടെ രാമനാണ് താരം. 

പശ്ചിമ ബംഗാള്‍ മുഖ്യമന്ത്രി മമത ബാനര്‍ജിയുടെ വാഹനവ്യൂഹത്തിനു മുന്നില്‍ ചാടി വിണ് ബിജെപി പ്രവര്‍ത്തകരാണ് ശരണംവിളിച്ചത്. വാഹനത്തില്‍ നിന്നും ചാടിയിറങ്ങി പ്രതിഷേധക്കാരെ ചോദ്യം ചെയ്യാനൊരുങ്ങി മമത. വെസ്റ്റ് മിഡാനാപുര്‍ ജില്ലയിലെ ചന്ദ്രകോനയിലായിരുന്നു സംഭവം. ഗാട്ടാല്‍ മണ്ഡലത്തില്‍ തെരഞ്ഞെടുപ്പ് പ്രചരണം കഴിഞ്ഞ് മടങ്ങുമ്‌ബോഴാണ് ബിജെപി പ്രവര്‍ത്തകര്‍ മമതയുടെ വാഹനത്തിനു മുന്നില്‍ ചാടിവീണത്.

ജയ് ശ്രീരാം എന്ന് ഉറക്കെ അലറിവിളിച്ചായിരുന്നു പ്രതിഷേധം. ഉടന്‍ തന്നെ വാഹനം നിര്‍ത്തി മമത പുറത്തിറങ്ങി പ്രതിഷേധക്കാരുടെ അടുത്തേക്ക് നടന്നു. നിങ്ങളെന്തിനാണ് ഓടിപ്പോകുന്നത്! ഇവടേക്ക് വരൂ. ഇത്തരം ഭാഷ ഉപയോഗിക്കാന്‍ നിങ്ങളാരാണെന്നാണ് കരുതുന്നതെന്നു മമത ചോദിച്ചു. ഇതിന്റെ വീഡിയോ സമൂഹമാധ്യമങ്ങളില്‍ ഇപ്പോള്‍ വൈറലാണ്. സംഭവത്തില്‍ മൂന്നു ബിജെപി പ്രവര്‍ത്തകരെ പോലീസ് അറസ്റ്റ് ചെയ്തു. ഇവരെ കോടതിയില്‍ ഹാജരാക്കി റിമാന്‍ഡ് ചെയ്തു.

അതേസമയം മമതയെ വിമര്‍ശിച്ച് ബിജെപി രംഗത്തെത്തി. ജയ് ശ്രീറാം വിളിക്കുമ്‌ബോള്‍ മമത അസ്വസ്ഥയാകുന്നത് എന്തു കൊണ്ടാണെന്ന് അറിയില്ലെന്ന് ബിജെപി പറഞ്ഞു. എന്തുകൊണ്ടാണ് ഇതിനെ മോശം പരാമര്‍ശം എന്ന് പറയുന്നതെന്ന് അറിയില്ലെന്നും ബിജെപി വ്യക്തമാക്കി.

മമത ബാനര്‍ജി തനിക്ക് എല്ലാ വര്‍ഷവും കുര്‍ത്തയും പലഹാരങ്ങളും അയച്ചു തരാറുണ്ടെന്ന മോദിയുടെ പരാമര്‍ശം ഏറെ വിവാദമായിരുന്നു. എന്നാല്‍ ഇതിന് മറുപടിമായി മമതയും രംഗത്തെത്തിയിരുന്നു. അതിഥികളെ തങ്ങള്‍ രസഗുളയും സമ്മാനങ്ങളുമായാണ് സ്വീകരിക്കുന്നത്. എന്നാല്‍ ഒറ്റവോട്ടുപോലും നല്‍കില്ലെന്നും അവര്‍ വ്യക്തമാക്കി.

പ്രത്യേക അവസരങ്ങളിലെല്ലാം അതിഥികളെ സത്ക്കരിക്കുന്നത് ബംഗാളിന്റെ സംസ്‌കാരമാണ്. മമത പ്രധാനമന്ത്രിയുടെ പേരെടുത്ത് പറയാതെ പറഞ്ഞു. ഹൂഗ്ലി ജില്ലയില്‍ തെരഞ്ഞെടുപ്പ് റാലിയില്‍ സംസാരിക്കുകയായിരുന്നു മമത മറുപടി നല്‍കിയത്.
ബോളിവുഡ് താരം അക്ഷയ് കുമാറുമായി നടത്തിയ അഭിമുഖത്തിലാണ് തനിക്ക് മമത ബാനര്‍ജി കുര്‍ത്തയും പലഹാരങ്ങളുമൊക്കെ സമ്മാനമായി നല്‍കാറുണ്ടെന്നാണ് മോദി പറഞ്ഞത്.

മമത ബാനര്‍ജിയുടെ തൃണമൂല്‍ കോണ്‍ഗ്രസില്‍നിന്നും 40 എംഎല്‍എമാര്‍ ബിജെപിയിലേക്ക് വരാന്‍ തയാറെടുക്കുന്നുവെന്ന് അടുത്തിടെ നരേന്ദ്ര മോദി പറഞ്ഞിരുന്നു. മമതയുടെ എംഎല്‍എമാര്‍ അവരെ ഉപേക്ഷിച്ച് പോകുമെന്നും മോദി സെറാംപുരില്‍ തെരഞ്ഞെടുപ്പ് റാലിയില്‍ പറഞ്ഞു.

മേയ് 23 കഴിയുമ്പോള്‍ എല്ലായിടത്തും താമര വിരിയും. ബംഗാളിലെ 42 ലോക്‌സഭാ സീറ്റുകളില്‍ 25 സീറ്റുകളിലും ബിജെപി ജയിക്കുമെന്നും മോദി പറഞ്ഞു.