രാഷ്ട്രീയ പാര്‍ട്ടിക്കാര്‍ തമ്മിലുള്ള കള്ളവോട്ട് വിവാദം കത്തുന്നതിനിടെ നിയമം പാലിക്കേണ്ട പോലീസുകാരും പോസ്റ്റല്‍ കള്ളവോട്ടിന് ശ്രമിച്ചതായി റിപ്പോര്‍ട്ട്. പോലീസിന്റെ പോസ്റ്റല്‍ വോട്ട് വിവാദത്തില്‍ ക്രമക്കേടിന് സ്ഥിരീകണം നല്‍കിയിരിക്കുന്നത് ഇന്റലിജന്റ്‌സാണ്. എല്ലാ ജില്ലയിലും വിശദമായ അന്വേഷണം വേണമെന്നും ശബ്ദരേഖയില്‍ പരാമര്‍ശമുള്ളവരെ കുറിച്ച് അന്വേഷണം നടത്തണമെന്നും ഇന്റലിജന്‍സ് മേധാവി ഡിജിപിയ്ക്ക് റിപ്പോര്‍ട്ട് നല്‍കി. സംഭവം അന്വേഷിക്കാന്‍ നേരത്തേ ഇന്റലിജന്‍സിന് ഡിജിപി നിര്‍ദേശം നല്‍കിയിരുന്നു.

കുറ്റം ചെയ്തതായി കണ്ടെത്തിയാല്‍ ആ പോലീസുകാര്‍ക്കെതിരേ കര്‍ശന നടപടി സ്വീകരിക്കുമെന്നായിരുന്നു നേരത്തേ ഡിജിപി വ്യക്തമാക്കിയത്. പോലീസുകാരുടെ പോസ്റ്റല്‍ വോട്ടു മറിക്കാന്‍ പോലീസ് അസോസിയേഷനില്‍ ഉള്ളവര്‍ തന്നെ സ്വാധീനം ചെലുത്തിയെന്നാണ് റിപ്പോര്‍ട്ടില്‍ സ്ഥിരീകരിച്ചിരിക്കുന്നത്. അതേസമയം ഇക്കാര്യത്തില്‍ ആരും ഒരു പരാതിയും കിട്ടിയിട്ടില്ലെങ്കിലും വിശദമായ ഒരു അന്വേഷണം ആവശ്യമാണെന്നാണ് പറഞ്ഞിരിക്കുന്നത്. തെരഞ്ഞെടുപ്പ് ജോലിയില്‍ ഏര്‍പ്പെട്ടിരിക്കുന്ന പോലീസ് ഉദ്യോഗസ്ഥരുടെ പോസ്റ്റല്‍ വോട്ടുകള്‍ ഇടതു അനുകൂല അസോസിയേഷന്‍ നേതാക്കള്‍ സ്വീകരിക്കുന്നതായിട്ടാണ് ആരോപണം. 

അസോസിയേഷന്‍ നേതാക്കള്‍ ബാലറ്റുകള്‍ സ്വീകരിച്ച് അവരുടെ ഇഷ്ടാനുസരണം വോട്ടു ചെയ്യുന്നതായുമാണ് ആക്ഷേപം. ഒന്നിലധികം തപാല്‍ വോട്ടുകള്‍ ഒരേ മേല്‍വിലാസത്തില്‍ എത്തിയെന്നതും സ്ഥലംമാറ്റമുള്‍പ്പെടെയുള്ള ഭീഷണികള്‍ മുഴക്കിയും സമ്മര്‍ദ്ദം ചെലുത്തിയുമാണ് തപാല്‍വോട്ടുകള്‍ ശേഖരിച്ചതെന്നും ആരോപണം ഉയര്‍ന്നിരുന്നു. തെരഞ്ഞെടുപ്പ് ജോലിക്കായി 55,000 പോലീസുകാരാണ് നിയോഗിക്കപ്പെട്ടത്. 90 ശതമാനം പേരും പോസ്റ്റല്‍ വോട്ട് ഉപയോഗിക്കുകയായിരുന്നു. എല്ലാ ജില്ലകളിലും തെളിവെടുപ്പ് നടത്തിയ ശേഷമാണ് റിപ്പോര്‍ക്ക് കൈമാറിയിരിക്കുന്നത്.

അതേസമയം കള്ളവോട്ടിനെ പറ്റി വിവാദം വീണ്ടും പുകയുകയാണ്. ഇരു മുന്നണികളും കള്ളവോട്ടിനെച്ചൊല്ലി പരസ്പരം ആരോപണമുന്നയിക്കുകയാണ്. അവസാനമായി മന്ത്രി എം.എം. മണിയുടെ മണ്ഡലമായ ഉടുമ്പന്‍ചോലയിലും സിപിഎമ്മിനെതിരെ കള്ളവോട്ട് നടന്നെന്ന ആരോപണം ഉയര്‍ന്നിരുന്നു. 2 തിരിച്ചറിയല്‍ കാര്‍ഡുകള്‍ ഉപയോഗിച്ച് ഡിവൈഎഫ്‌ഐ പ്രവര്‍ത്തകന്‍ 2 ബൂത്തുകളില്‍ വോട്ടു ചെയ്‌തെന്നാണു ഡിസിസി പ്രസിഡന്റ് ഇബ്രാഹിംകുട്ടി കല്ലാറിന്റെ പരാതി. വോട്ടിങിലെ ക്രമക്കേടു ചൂണ്ടിക്കാട്ടി ജില്ലാ കലക്ടര്‍ക്കു പരാതി നല്‍കി.

ഉടുമ്പന്‍ചോല പഞ്ചായത്തിലെ 66, 69 നമ്പര്‍ ബൂത്തുകളിലാണു കള്ളവോട്ടു നടന്നതെന്ന് യുഡിഎഫ് ആരോപിക്കുന്നു. 2 തിരിച്ചറിയല്‍ രേഖകള്‍ ഉപയോഗിച്ച് രഞ്ജിത് എന്നയാള്‍ 2 ബൂത്തുകളിലും വോട്ടു ചെയ്തു. തിരിച്ചറിയല്‍ കാര്‍ഡ് ഒന്നില്‍ രഞ്ജിത് കുമാറെന്നും മറ്റേതില്‍ പി. രഞ്ജിതുമെന്നാണു പേരു രേഖപ്പെടുത്തിയിട്ടുള്ളത്.

ഇയാള്‍ ഡിവൈഎഫ്‌ഐ പ്രവര്‍ത്തകന്‍ ആണെന്നും ഉദ്യോഗസ്ഥരെ സ്വാധീനിച്ചാണു 2 തിരിച്ചറിയല്‍ രേഖകള്‍ ഉണ്ടാക്കിയതെന്നും യുഡിഎഫ് ആരോപിക്കുന്നു. ഉടുമ്പന്‍ചോലയില്‍ 66, 69 നമ്പര്‍ ബൂത്തുകളില്‍ വെബ് കാസ്റ്റിങ് സംവിധാനം ഏര്‍പ്പെടുത്തിയിരുന്നില്ല. ഉടുമ്പന്‍ചോല നിയോജക മണ്ഡലത്തില്‍ വ്യാപകമായി ഇരട്ട വോട്ടു നടന്നതായും യുഡിഎഫിനു പരാതിയുണ്ട്.