തൃശൂര്‍ക്കാരുടെ അഭിമാനമായ തെച്ചിക്കോട്ടുകാവ് രാമചന്ദ്രന്റെ വിലക്ക് നീക്കണമെന്ന് ആവശ്യപ്പെട്ട് ബി.ജെ.പി പ്രക്ഷോഭത്തിലേക്ക്. തൃശൂരില്‍ നാളെ മുതലാണ് പ്രക്ഷോഭം. ബി.ജെ.പിയുടെ സമരം പി.സി ജോര്‍ജ് എം.എല്‍.എ ഉദ്ഘാടനം ചെയ്യും. 

തെച്ചിക്കോട്ടുകാവ് രാമചന്ദ്രന്റെ വിലക്ക് തുടരുന്ന സാഹചര്യത്തിലാണ് ബി.ജെ.പി സമരത്തിലേക്ക് നീങ്ങുന്നത്. വനം വകുപ്പാണ് തെച്ചിക്കോട്ടുകാവ് രാമചന്ദ്രന് വിലക്കേര്‍പ്പെടുത്തിയത്. ആനയെ എഴുന്നള്ളിക്കാന്‍ കഴിയില്ലെന്നാണ് വനം വകുപ്പിന്റെ നിലപാട്. ആനയുടെ പ്രായാധിക്യവും 13 പേര്‍ ആക്രമണത്തില്‍ കൊല്ലപ്പെട്ടതും കണക്കിലെടുത്താണ് വനം വകുപ്പ് വിലക്ക് ഏര്‍പ്പെടുത്തിയിരിക്കുന്നത്. അതിനിടെ കര്‍ശന നിലപാടാണ് കളക്ടര്‍ അനുപമയും സ്വീകരിച്ചത്. 

തെച്ചിക്കോട്ടുകാവ് ദേവസ്വം നിലനില്‍ക്കുന്ന പ്രദേശം സി.പി.എമ്മിന്റെ സ്വാധീന മേഖലയാണ്. ഇവിടുത്തെ വൈകാരിക പ്രശ്‌നം ഏറ്റെടുത്ത് പാര്‍ട്ടിക്ക് നേട്ടമാക്കാമെന്നാണ് ബി.ജെ.പിയുടെ കണക്കുകൂട്ടല്‍.

കളക്ടര്‍ അനുപമയുടെ ഇനിയുള്ള നിലപാടുകളും നിര്‍ണായകമാണ്. തെച്ചിക്കോട്ടുകാവ് രാമചന്ദ്രന് വിലക്ക് ഏര്‍പ്പെടുത്തിയ നടപടിയുമായി മുന്നോട്ട് പോകാന്‍ തന്നെയാണ് നിലവിലെ തീരുമാനമെന്ന് അനുപമ വ്യക്തമാക്കി. വനം വകുപ്പിന്റെ നിര്‍ദേശാനുസരണമാണ് വിലക്ക് തുടരാന്‍ കഴിഞ്ഞ യോഗത്തില്‍ തീരുമാനിച്ചതെന്നും അനുപമ പ്രതികരിച്ചു.

തെച്ചിക്കോട്ടുകാവ് രാമചന്ദ്രന് വിലക്ക് ഇപ്പോഴും തുടരുകയാണ്. തൃശൂര്‍ പൂരത്തിന് എഴുന്നള്ളിക്കാന്‍ മാത്രമായി ആവശ്യം ഉന്നയിച്ച് ആരും ഇതുവരെ നിയമപരമായി സമീപിച്ചിട്ടില്ല. വനം വകുപ്പിന്റെ നിര്‍ദേശത്തോടെയാണ് വിലക്ക് തുടരുന്നതെന്നും അനുപമ പറഞ്ഞു. 

തെച്ചിക്കോട്ടുകാവ് രാമചന്ദ്രന്റെ വിലക്ക് നീക്കാന്‍ മന്ത്രിമാര്‍ ഇടപെടുന്നതായി വാര്‍ത്തകളുണ്ടല്ലോ എന്ന ചോദ്യത്തോട് കളക്ടര്‍ പ്രതികരിച്ചില്ല. തന്റെ ജോലിയാണ് ഇപ്പോള്‍ ചെയ്യുന്നതെന്നും സോഷ്യല്‍ മീഡിയയിലെ ക്യാമ്പയിനെ കുറിച്ചും വിമര്‍ശനങ്ങളെ കുറിച്ചും യാതൊന്നും പ്രതികരിക്കാനില്ലെന്നും ടി.വി.അനുപമ കൂട്ടിച്ചേര്‍ത്തു. തെച്ചിക്കോട്ടുകാവ് രാമചന്ദ്രന്റെ വിലക്ക് നീട്ടിയ നടപടിയില്‍ പ്രതിഷേധിച്ച് ടി.വി.അനുപമയുടെ ഫേസ്ബുക്ക് പേജില്‍ നേരത്തെ സേവ് രാമന്‍ ക്യാമ്ബയിന്‍ നടന്നിരുന്നു. എന്നാല്‍, ഏറെ പേര്‍ കളക്ടറുടെ നടപടി ഉചിതമാണെന്ന നിലപാടെടുത്ത് പിന്തുണ അറിയിക്കുകയും ചെയ്തു. കുട്ടികളടക്കം 13 പേരെ കൊലപ്പെടുത്തിയ ആനയെ പൂരങ്ങളില്‍ നിന്ന് വിലക്കിയത് ശരിയായ നടപടിയാണെന്ന് നിരവധി പേര്‍ വാദിക്കുന്നുണ്ട്.

അതേസമയം, തൃശൂരില്‍ നിന്നുള്ള മന്ത്രിമാര്‍ക്കെതിരെയും വനംവകുപ്പ് മന്ത്രിക്കെതിരെയും ജില്ലയിലെ കോണ്‍ഗ്രസ് നേതാക്കള്‍ വിമര്‍ശനമുന്നയിച്ച് രംഗത്തെത്തിയിരുന്നു. തെച്ചിക്കോട്ടുകാവ് രാമചന്ദ്രനുള്ള വിലക്ക് നീക്കാന്‍ കഴിയുന്നതെല്ലാം ചെയ്യുമെന്ന് പ്രസംഗിച്ച മന്ത്രിമാര്‍ യാതൊരു നടപടികളും ഇതുവരെ സ്വീകരിച്ചിട്ടില്ലെന്ന് കോണ്‍ഗ്രസ് നേതാക്കള്‍ കുറ്റപ്പെടുത്തുന്നുണ്ട്.

തെച്ചിക്കോട്ടുക്കാവ് രാമചന്ദ്രന് ഏര്‍പ്പെടുത്തിയ വിലക്ക് തുടരാന്‍ കഴിഞ്ഞ ഏപ്രില്‍ 25 നാണ് തീരുമാനിച്ചത്. ഗുരുവായൂര്‍ കോട്ടപ്പടിയില്‍ ഉത്സവത്തിനിടെ ഇടഞ്ഞ തെച്ചിക്കോട്ടുകാവ് രണ്ടുപേരെ ആക്രമിച്ച് കൊലപ്പെടുത്തിയിരുന്നു. ഇതേ തുടര്‍ന്നാണ് ആനയ്ക്ക് വിലക്ക് ഏര്‍പ്പെടുത്തിയത്. ഈ വിലക്ക് നീട്ടാനാണ് ജില്ലാ കളക്ടര്‍ ഏപ്രില്‍ 25 ന് ഉത്തരവിറക്കിയത്. അനുപമയുടെ അധ്യക്ഷതയില്‍ ചേര്‍ന്ന ജില്ലാതല നാട്ടാന നിരീക്ഷണ സമിതിയുടെ യോഗത്തിലായിരുന്നു തീരുമാനം.