തൊടുപുഴയില് അമ്മയുടെ സുഹൃത്ത് മര്ദ്ദിച്ച് കൊന്ന ഏഴ് വയസുകാരന്റെ ഇളയസഹോദരനെ അച്ഛന്റെ മാതാപിതാക്കള്ക്കൊപ്പം വിട്ടു; നടപടി ശിശുക്ഷേമ സമിതിയുടെ തീരുമാനപ്രകാരം
തൊടുപുഴയില് അമ്മയുടെ സുഹൃത്ത് മര്ദ്ദിച്ച് കൊന്ന ഏഴ് വയസുകാരന്റെ ഇളയസഹോദരനെ അച്ഛന്റെ മാതാപിതാക്കള്ക്കൊപ്പം വിട്ടു. ശിശുക്ഷേമ സമിതിയുടെ തീരുമാനപ്രകാരമാണ് നടപടി. കുട്ടിയെ കൈമാറാനാവില്ലെന്ന് അവസാന നിമിഷം കുട്ടിയുടെ അമ്മൂമ്മ നിലപാടെടുക്കുകയായിരുന്നു. ശിശുക്ഷേമ സമിതി നിര്ദ്ദേശപ്രകാരം പൊലീസ് കുട്ടിയെ കൂട്ടിക്കൊണ്ട് വന്ന് അച്ഛന്റെ മാതാപിതാക്കള്ക്ക് കൈമാറുകയായിരുന്നു. ഇളയകുട്ടി ഒരുമാസം മുത്തശ്ശനും മുത്തശ്ശിക്കും ഒപ്പം കഴിയും.
ഏഴുവയസ്സുകാരന്റെ സംസ്കാരച്ചടങ്ങുകള്ക്ക് ശേഷം അമ്മയെയും അനുജനെയും അമ്മൂമ്മയെയും കട്ടപ്പനയിലെ അഭയകേന്ദ്രത്തിലേക്ക് മാറ്റിയിരുന്നു. കുടുംബശ്രീയുടെ കീഴില് പ്രവര്ത്തിക്കുന്ന കേന്ദ്രത്തിലേക്കാണ് ജില്ലാ ചൈല്ഡ് വെല്ഫെയര് കമ്മിറ്റിയുടെയും ചൈല്ഡ് പ്രൊട്ടക്ഷന് യൂണിറ്റിന്റെയും അനുമതിയോടെ ഇവരെ എത്തിച്ചത്. ഗാര്ഹിക പീഡനത്തിന് ഇരകളായ സ്ത്രീകള്ക്ക് താല്ക്കാലിക അഭയം കൊടുക്കുന്ന കേന്ദ്രമാണിത്. സാധാരണ 7 ദിവസം വരെയാണ് ഇവിടെ പാര്പ്പിക്കുക.
എന്നാല്, ഏഴുവയസുകാരന്റെ അനുജനെ വിട്ടു തരണം എന്നാവശ്യപ്പെട്ട് കുട്ടികളുടെ അച്ഛന്റെ മാതാപിതാക്കള് സമിതിയെ സമീപിക്കുകയായിരുന്നു. അമ്മയുടെ സംരക്ഷണയില് കഴിഞ്ഞ കുട്ടിയുടെ ഭാവിയില് ആശങ്കയുണ്ടെന്ന് ശിശുക്ഷേമസമിതിക്ക് നല്കിയ കത്തില് കുട്ടിയുടെ മുത്തച്ഛന് ചൂണ്ടിക്കാട്ടിയിരുന്നു. മുത്തച്ഛന്റെ കത്ത് ലഭിച്ചതോടെയാണ് ശിശുക്ഷേമ സമിതി തുടര് നടപടികളെടുത്തത്.
https://www.facebook.com/Malayalivartha
