ഫേസ് ആപ്പ് തരംഗമായി കൊണ്ടിരിക്കുകയാണ്. പലരും തങ്ങളുടെ വാർദ്ധക്യവും യൗവ്വനവും ബാല്യവുമൊക്കെ മുൻക്കൂട്ടി കാണാനുള്ള പരിശ്രമത്തിലാണ്. നരയും മുഖത്തു ചുളിവുകളും ഇഷ്ടപ്പെടാത്ത നാം ഫേസ്ആപ്പിൽ എന്ത് താല്പര്യത്തോടെയാണ് വാർദ്ധക്യം അറിയാൻ ശ്രമിക്കുന്നത്. എല്ലാവരും തകൃതിയായി ഫേസ് ആപ്പ് ഉപയോഗിച്ചു കൊണ്ടിരിക്കുന്നു. കേരള പൊലീസിൻറെ ഒരു കിടിലന്‍ ട്രോൾ എല്ലാവരെയും കൈയിൽ എടുത്തിരിക്കുകയാണ്. ഹെല്‍മറ്റ് ധരിക്കാത്ത യാത്രക്കാരെ സന്ദർഭോചിതമായിട്ടാണ് പൊലീസ് ട്രോളിയിരിക്കുന്നത്. ചിരിപ്പിക്കുകയും ചിന്തിപ്പിക്കുകയും ചെയ്യുന്ന പൊലീസിന്‍റെ ഈ ട്രോളിനു അഭിനന്ദന പ്രവാഹമാണ് വരുന്നത്.

ഫഹദ് ഫാസില്‍ കുമ്പളങ്ങി നൈറ്റ്‍സിലൂടെ അഭിനയിച്ചു പരിചയപ്പെടുത്തിയ ഷമ്മിയും 'ഫ്രണ്ടസ്' സിനിമയിലെ ജയറാമുമാണ് ട്രോളിലെ കഥാപാത്രങ്ങൾ. ഹെല്‍മറ്റില്ലാതെ യാത്ര ചെയ്യുന്നവർ നേരിടുന്ന അപകടങ്ങളുടെ ഭീകരതയാണ് ഈ ട്രോളിലൂടെ സൂചിപ്പിക്കുന്നത്. ഒരു ബൈക്ക് യാത്രികന്‍റെ ഫേസ്ആപ് അപാരത എന്ന തലക്കെട്ടില്‍ പോലീസിന്റെ ഔദ്യോഗിക പേജിലാണ് ഇത് പോസ്റ്റ് ചെയ്‍തിരിക്കുന്നത്. നിരവധി ലൈക്കുകളും ഷെയറുകളും കമന്‍റുകളുമൊക്കെ ഈ പോസ്റ്റിന് ലഭിക്കുന്നുണ്ട്. പോസ്റ്റ് ഇട്ടു 4 മിനിട്ടിനുള്ളിൽ 1000 പേരാണ് അത് ലൈക് ചെയ്തത്. യുവജനങ്ങൾക്ക്‌ നല്ലൊരു സന്ദേശമാണ് ഈ ട്രോളിലൂടെ കൈ മാറുന്നതെന്നാണ് അവർ തന്നെ പറയുന്നത്. യുവാക്കൾക്ക് ഹെൽമെറ്റ് വയ്ക്കാനുള്ള പ്രചോദനം ഇതിലൂടെ കിട്ടുന്നു എന്ന് പറയുന്നവരും ഈ കൂട്ടത്തിൽ ഉണ്ട്. പോലീസിൽ ഇത്ര മാത്രം നർമ്മ ബോധമുള്ള ട്രോളനെ നേരിൽ കാണാൻ ആഗ്രഹിക്കുന്നവർ വരെയുണ്ട്.