കയ്യേറിയ ഭൂമിയില് നിന്നും തഹസില്ദാര് സ്വയം ഒഴിഞ്ഞു!
കോഴിക്കോട് താലൂക്ക് ഭൂരേഖാ തഹസില്ദാര് അനിതകുമാരിയും കുടുംബവും കയ്യേറിയ പുറമ്പോക്ക് ഭൂമി സ്വയം ഒഴിഞ്ഞു കൊടുത്തു. ഭൂമി കയ്യേറി നിര്മിച്ച നടവഴിയും കെട്ടിടവും സ്വന്തം ചിലവില് പൊളിച്ചു മാറ്റുകയും ചെയ്തു.
ഇവരുടെ മുക്കം-കുറ്റിപ്പാല റോഡിലെ വീടിനോട് ചേര്ന്ന മൂന്ന് സെന്റ് ഭൂമിയോളം കയ്യേറിയതായി കണ്ടെത്തിയത് ഹൈക്കോടതി നിര്ദേശ പ്രകാരം നടത്തിയ പരിശോധനയിലാണ്. പരിശോധനാ റിപ്പോര്ട്ട് ജില്ലാ കളക്ടര്ക്ക് കൈമാറിയിരുന്നു.
റിപ്പോര്ട്ടിന്റെ അടിസ്ഥാനത്തില് തഹസില്ദാര്ക്കെതിരെ വകുപ്പ് തല നടപടികള് അടക്കമുള്ളവ സ്വീകരിക്കാനിരിക്കെയാണ് ഇന്നലെ കയ്യേറ്റം ഒഴിഞ്ഞത്. കോഴിക്കോട് ജില്ലയിലെ സര്ക്കാര് ഭൂമി കയ്യേറ്റം കണ്ടെത്തി നടപടി സ്വീകരിക്കേണ്ട ഉദ്യോഗസ്ഥ തന്നെ സര്ക്കാര് ഭൂമി കയ്യേറിയതായി കണ്ടെത്തിയത് വിവാദമായിരുന്നു.
തഹസില്ദാര് ഭൂമി കൈയ്യേറിയതായി ആരോപിച്ച് കോഴിക്കോട് സ്വദേശിയായ രത്നാകരന് ഉന്നത ഉദ്യോഗസ്ഥര്ക്ക് പരാതി നല്കിയതിന്റെ അടിസ്ഥാനത്തില് മുന്പ് നടത്തിയ പരിശോധനയില് ഭൂമി കയ്യേറിയിട്ടില്ലെന്ന് കണ്ടെത്തിയിരുന്നു. ഇത് സംബന്ധിച്ച് വീണ്ടും കോഴിക്കോട് കലക്ടര്ക്ക് നല്കിയ പരാതിയില് നടപടി ഇല്ലാതിരുന്നതോടെയാണ് പരാതിക്കാരന് ഹൈക്കോടതിയെ സമീപിച്ചത്.
ഹൈക്കോടതിയുടെ നിര്ദേശ പ്രകാരം ജില്ലാ സര്വെ സൂപ്രണ്ട് വീരേന്ദ്രകുമാറിന്റെ നേതൃത്വത്തില് നടത്തിയ സര്വെയിലാണ് മൂന്ന് സെന്റ് ഭൂമി കൈയ്യേറിയതായി കണ്ടെത്തിയത്. എന്നാല് തങ്ങള്ക്കെതിരെ പരാതിക്കാരന് വ്യക്തിപരമായ ശത്രുത തീര്ക്കുകയാണെന്നായിരുന്നു തഹസില്ദാരുടെ ഭര്ത്താവ് ആരോപിച്ചിരുന്നത്.
https://www.facebook.com/Malayalivartha