ആലപ്പുഴയില്‍ പട്ടാപകല്‍ തേയില വ്യാപാര സ്ഥാപനത്തില്‍ നിന്നും ഒരുലക്ഷം രൂപാ കവര്‍ന്നു. സമീപത്തെ വ്യാപാര സ്ഥാപനങ്ങളില്‍ നിന്നും ലഭിച്ച മോഷ്ടാവിന്റെ സി.സി.ടി.വി ദൃശ്യങ്ങള്‍ കേന്ദ്രീകരിച്ച് പൊലീസ് അന്വേഷണം തുടങ്ങി.

എരുവ സ്വദേശി പ്രഭാകരന്റെ ഉടമസ്ഥതയിലുള്ള തേയില വ്യാപാര സ്ഥാപനത്തില്‍ നിന്നും തേയില വാങ്ങാനെന്ന വ്യാജേന കടയിലെത്തിയ യുവാവ് മേശക്കുള്ളില്‍ നിന്നും പണം കവരുകയായിരുന്നുവെന്ന് പ്രഭാകരന്‍ പോലീസിനു നല്‍കിയ പരാതിയില്‍ പറയുന്നു.

സംഭവ സമയം കടയിലെ ജീവനക്കാരന്‍ ഭക്ഷണം കഴിക്കാന്‍ പോയതിനാല്‍ പ്രഭാകരന്‍ മാത്രമേ കടയിലുണ്ടായിരുന്നുള്ളു. കടയിലെത്തിയ യുവാവ് 50 ഗ്രാം തേയില വാങ്ങി 500 രൂപയുടെ നോട്ടു നല്‍കി. പ്രഭാകരന്‍ മേശ തുറന്നു ബാക്കി നല്‍കി. അതും വാങ്ങി കടയില്‍ നിന്നും പോയ യുവാവ് അല്‍പസമയത്തിനു ശേഷം മടങ്ങി വന്ന് 100 ഗ്രാം തേയില കൂടി ആവശ്യപ്പെട്ടു.

ഇതെടുക്കാന്‍ പ്രഭാകരന്‍ ക്യാഷ് കൗണ്ടറില്‍ നിന്നും എണീറ്റ് കടയുടെ ഒരു ഭാഗത്തേക്ക് മാറി. ഈ സമയം മോഷ്ടാവ് മേശ തുറന്ന് പണം എടുത്തു. ശേഷം ഒരു കിലോ തേയില വേണമെന്നും പോയിട്ടു ഉടന്‍ വരാമെന്നും പറഞ്ഞ് മോഷ്ടാവ് സ്ഥലം വിട്ടു.

പണം കവരുന്നത് കണ്ട എതിര്‍വശത്തെ സ്ഥാപന ജീവനക്കാരന്‍ എത്തിയപ്പോഴേക്കും മോഷ്ടാവ് കടന്നുകളഞ്ഞു. ഇവര്‍ പറഞ്ഞതനുസരിച്ച് പ്രഭാകരന്‍ മേശ പരിശോധിച്ചപ്പോഴാണ് മോഷണം നടന്നതായി അറിയുന്നത്.