കൊച്ചി അഗതി മന്ദിരത്തില്‍ വയോധികയ്ക്ക് നേരെ സൂപ്രണ്ടിന്‍രെ ക്രൂരമര്‍ദനം. കൊച്ചി പള്ളുരുത്തിയിലെ അഗതി മന്ദിരത്തില്‍ വെച്ച് വയോധികയെ സൂപ്രണ്ട് അന്‍വര്‍ ഹുസൈനാണ് ക്രൂരമായി മര്‍ദിച്ചത്. അഗതി മന്ദിരത്തിലെ അന്തേവാസിയായ മാനസികാസ്വാസ്ഥ്യമുള്ള മകളെകൊണ്ട് ജോലി ചെയ്യിച്ചത് ചോദ്യം ചെയ്തപ്പോഴാണ് മര്‍ദനമേറ്റത്. സൂപ്രണ്ടായ അന്‍വര്‍ ഹുസൈന്റെ തിരുവനന്തപുരത്തുള്ള വീട്ടില്‍ യുവതിയെ എത്തിച്ച് അനധികൃതമായി ജോലിചെയ്യിക്കുകയായിരുന്നു. ഇത് ചോദ്യം ചെയ്ത അമ്മയെ ചവിട്ടിയും തൊഴിച്ചും പൈപ്പ് ഉപയോഗിച്ചുമാണ് മര്‍ദിച്ചത്.

അഗതി മന്ദിരത്തിലെ സെക്രട്ടറി അടക്കമുള്ള പലരുടെയും അനുമതിയില്ലാതെയും എതിര്‍പ്പിനെ മറികടന്നുമാണ് അന്‍വര്‍ ഹുസൈന്‍ യുവതിയെ വീട്ടുജോലിക്ക് കൊണ്ടുപോയത്. ഇവര്‍ പല സ്ഥലങ്ങളിലായി വീട്ടുജോലി ചെയ്തുണ്ടാക്കിയ പണവും അന്‍വര്‍ ഹുസൈന്റെ കൈവശമാണുള്ളത്. ഇത് തിരികെ ചോദിച്ചതും അന്‍വര്‍ ഹുസൈനെ പ്രകോപിപ്പിച്ചു.
അന്തേവാസികളോട് സൂപ്രണ്ടിന്റെ സമീപനം ക്രൂരത നിറഞ്ഞതാണെന്നും നേരത്തെയും അന്തേവാസികള്‍ക്ക് നേരെ ഇത്തരത്തിലുള്ള അക്രമങ്ങള്‍ അരങ്ങേറിയിട്ടുണ്ടെന്നും ജീവനക്കാര്‍ പറയുന്നു. ഇത് ചോദ്യം ചെയ്തവര്‍ക്കുനേരെസ്ഥലംമാറ്റം അടക്കമുള്ള പ്രതികാര നടപടികള്‍ ഉണ്ടായതായും ജീവനക്കാര്‍ പറയുന്നു.