ഇടുക്കി അടിമാലിയിൽ നാടിനെ നടുക്കിയ ഒരു വയസ്സുള്ള ഇരട്ടക്കുട്ടികളുടെ മരണത്തിൽ ആദ്യ മണിക്കൂറുകളിൽ ഉയർന്ന ദുരൂഹതകൾ ഒടുവിൽ പോലീസ് തള്ളിക്കളഞ്ഞു. വാടകവീട്ടിലെ അടുക്കളയിലെ സ്ലാബിൽ സൂക്ഷിച്ചിരുന്ന മാരകമായ കീടനാശിനി കുപ്പി ദ്രവിച്ച് തറയിലേക്ക് ഒലിച്ചിറങ്ങിയതാണ് ദുരന്തത്തിന് കാരണമായതെന്ന് ഫൊറൻസിക് പരിശോധനയിൽ വ്യക്തമായി. കറന്റില്ലാത്ത ഇരുട്ടിൽ തറയിൽ കളിക്കുകയായിരുന്ന കുഞ്ഞുങ്ങളുടെ കൈപ്പാടുകൾ ഫൊറൻസിക് സംഘം വിഷം വീണ സ്ഥലത്തുനിന്ന് കണ്ടെത്തിയിട്ടുണ്ട്. മാതാപിതാക്കളെ വിശദമായി ചോദ്യം ചെയ്തെങ്കിലും സംഭവത്തിൽ മറ്റ് ദുരൂഹതകളില്ലെന്നും ഇതൊരു തികഞ്ഞ അപകടമരണമാണെന്നും അടിമാലി പോലീസ് ഔദ്യോഗികമായി സ്ഥിരീകരിച്ചു.