ലോകത്ത് ഏറ്റവും അധികം ആരാധകരുള്ള ഇന്ത്യാക്കാരില്‍ ഒന്നാമൻ പ്രധാനമന്ത്രി നരേന്ദ്രമോദി എന്ന് റിപ്പോർട്ട്. തൊട്ട് പിന്നാലെ രണ്ടാം സ്ഥാനത്ത് ഇന്ത്യന്‍ ക്രിക്കറ്റ് താരം മഹേന്ദ്രസിംഗ് ധോണിയും സ്ഥാനം പിടിച്ചു. യുഗവ് സര്‍വ്വെ ആണ് ഈ റിപ്പോര്‍ട്ട് പുറത്തുവിട്ടത്. നാല്‍പ്പത്തൊന്നു രാജ്യങ്ങളില്‍ നിന്നായി 42,000 പേർ പങ്കെടുത്ത സർവേയിലാണ് മോദിയെ ഒന്നാമനായി തെരഞ്ഞെടുത്തത്.

യുഗവ് സര്‍വേയില്‍ 15.66% പേരുടെ പിന്തുണയോടെയാണ് മോദി രാജ്യത്ത് ഏറ്റവുമധികം പേര്‍ ആരാധിക്കപ്പെടുന്ന ഇന്ത്യക്കാരനായി മാറിയത്. രണ്ടാം സ്ഥാനത്തുള്ള ധോണിയ്ക്കുള്ളത് 8.58% പേരുടെ പിന്തുണയാണ്. ക്രിക്കറ്റ് താരം വിരാട് കോഹ്ലിയെയും സച്ചിന്‍ ടെന്‍ഡുല്‍ക്കറെയും മറികടന്നാണ് ധോണി രണ്ടാം സ്ഥാനത്തെത്തിയത്.

രത്തന്‍ ടാറ്റ (8.02 ശതമാനം), ബരാക് ഒബാമ (7.36 ശതമാനം), ബില്‍ ഗേറ്റ്‌സ് (6.96 ശതമാനം) എന്നിവരാണ് പട്ടികയില്‍ മൂന്നും നാലും അഞ്ചും സ്ഥാനങ്ങളില്‍. പട്ടികയില്‍ ഏഴാം സ്ഥാനത്താണ് ഇന്ത്യന്‍ ക്യാപ്റ്റന്‍ വിരാട് കോഹ്ലി. സച്ചിന്‍ ടെന്‍ഡുല്‍ക്കറാണ് കോഹ്ലിക്ക് മുകളില്‍. 2.95% പേരുടെ പിന്തുണയുമായി പോര്‍ച്ചുഗീസ് ഫുട്ബോള്‍ ഇതിഹാസം ക്രിസ്റ്റ്യാനോ റൊണാള്‍ഡോയും ആദ്യ പത്തിലുണ്ട്.

പുരുഷന്മാരുടെ പട്ടികയിൽ മോദി ഒന്നാം സ്ഥാനത്ത് എത്തിയപ്പോൾ, ബോക്സിങ് ചാമ്പ്യൻ മേരി കോമാണ് ഏറ്റവുമധികം ആരാധകരുളള സ്ത്രീകളുടെ പട്ടികയിൽ ഒന്നാം സ്ഥാനത്ത് എത്തിയത്. ഇന്ത്യക്കാരിൽ കിരൺ ബേദി (9.46 ശതമാനം), ലതാ മങ്കേഷ്കർ (9.23 ശതമാനം), സുഷമ സ്വരാജ് (7.13 ശതമാനം), ദീപിക പദുക്കോൺ (6.35 ശതമാനം) എന്നിവരാണ് പട്ടികയിലുള്ള മറ്റ് സ്ത്രീകൾ.

പ്രധാനമന്ത്രി നരേന്ദ്ര മോദിയെ ലോകത്തെ ഏറ്റവും ശക്തനായ നേതാവായി പ്രമുഖ ബ്രിട്ടീഷ് മാഗസിന്‍ ഹെരാള്‍ഡ് വായനക്കാര്‍ക്കിടയില്‍ നടത്തിയ സര്‍വ്വേയിൽ തിരഞ്ഞെടുക്കപ്പെട്ടിരുന്നു. സര്‍വ്വേയില്‍ പങ്കെടുത്തവരില്‍ 30.9 ശതമാനം പേരാണ് മോദിക്ക് വോട്ട് ചെയ്തത്. ലോകത്തിലെ തന്നെ നിരവധി പ്രമുഖ രാഷ്ട്രത്തലവന്മാരേയും രാഷ്ട്രീയ നേതാക്കളേയും തറപറ്റിച്ചാണ് നരേന്ദ്ര മോദി ഒന്നാമത് എത്തിയത് നരേന്ദ്ര മോദിക്ക് പിറകില്‍ രണ്ടാമത് എത്തിയത് റഷ്യന്‍ പ്രസിഡണ്ടായ വ്‌ളാഡിമിര്‍ പുടിന്‍ ആണ്. മോദിയുടെ തൊട്ട് പിറകിലെത്തിയ പുടിന് 29.9 ശതമാനം വോട്ടുകളാണ് ലഭിച്ചത്.

ഫോബ്‌സ് മാസികയുടെ ലോകത്തെ ഏറ്റവും ശക്തരായ പത്ത് ഭരണാധികാരികളില്‍ ഒന്‍പതാമനായി മോദി നേരത്തെ തിരഞ്ഞെടുക്കപ്പെട്ടിരുന്നു. ടൈം മാഗസിന്‌റെ ലോകത്തെ സ്വാധീനിച്ച ശക്തരായ നൂറ് വ്യക്തികളുടെ പട്ടികയിലും ഒരു തവണ മോദി ഇടം പിടിച്ചിട്ടുണ്ട്.