നൃത്തലോകത്തേക്ക് ചുവടുകൾ വയ്ക്കുകയാണ് ട്രാന്‍സ്ജന്‍ഡര്‍ ഇഷ കിഷോർ. കാഞ്ഞങ്ങാട്ട് സ്വദേശിയായ ഇഷ കിഷോറിന്റെ കുച്ചുപ്പുടിയിലാണ് അരങ്ങേറ്റം കുറിക്കുന്നത്. ജീവിതത്തിലെ പ്രതിസന്ധികളെ തരണം ചെയ്ത് ഇന്ന് സ്വന്തം വ്യക്തിത്വത്തോടെ സ്വപ്നസാക്ഷാത്ക്കാരത്തിന് ഒരുങ്ങി നില്‍ക്കുമ്പോള്‍ അഭിമാനവും സന്തോഷവുമുണ്ടെന്ന് ഇഷ പ്രതികരണം നടത്തി.നാളെ കാഞ്ഞങ്ങാട് ശ്രീകൃഷ്ണ ക്ഷേത്രത്തിൽ വച്ചാണ് പരിപാടി നടക്കുക. സംസ്ഥാന ട്രാന്‍സ്ജന്‍ഡര്‍ ജസ്റ്റിസ് ബോര്‍ഡംഗം കൂടിയാണ് ഇഷ.

നീലേശ്വരത്തെ നാട്യധര്‍മ്മി നൃത്തവിദ്യാലയത്തിലെ അധ്യാപകന്‍ ആര്‍എല്‍വി ബാബു കൃഷ്ണയുടെ ശിക്ഷണത്തിലായിരുന്നു കഴിഞ്ഞ രണ്ട് വര്‍ഷമായി ഇഷ കുച്ചുപ്പുടി പഠിച്ചിരുന്നത്. ചെറുപ്പം മുതൽ നൃത്ത പഠനത്തില്‍ താല്‍പര്യമുള്ള ആളായിരുന്നു ഇഷ. എന്നാല്‍ സാഹചര്യങ്ങള്‍ അനുകൂലമായിരുന്നില്ല.ട്രാന്‍സ്ജന്‍ഡര്‍ എന്ന നിലയില്‍ സ്വന്തം വ്യക്തിത്വത്തിൽ കലാരംഗത്ത് ചുവടുറപ്പിക്കുന്നതിലൂടെ മറ്റുള്ളവര്‍ക്ക് പ്രചോദനമാകും എന്ന പ്രതീക്ഷ ഇഷയ്ക്ക് ഉണ്ട്.ഇഷ കഴിഞ്ഞ ലോകസഭ തിരഞ്ഞെടുപ്പിൽ കാസര്‍കോട് മണ്ഡലത്തിലെ ഏക ട്രാന്‍സ്ജന്‍ഡർ വോട്ടറായിരുന്നു . ട്രാന്‍സ്ജന്‍ഡര്‍ സംഘടനയായ ക്ഷേമയുടെ ജില്ലാ പ്രസിഡണ്ടാണ്.