വ്യാജ മെഡിക്കല്‍ സര്‍ട്ടിഫിക്കറ്റുകളുമായി ചികിത്സാ സഹായത്തിനായി പന്തളം ബ്ലോക്ക് പഞ്ചായത്ത് അംഗത്തിന്റെ പേരു പറഞ്ഞ് വീടുകളില്‍ പണപ്പിരിവു നടത്തിയ 2 പേര്‍ അറസ്റ്റിലായി. ഇലന്തൂര്‍ തോന്ന്യാമല പള്ളിപ്പറമ്പില്‍ ജോണിക്കുട്ടി (53), അഴൂര്‍ സന്തോഷ് ഭവനില്‍ മുകളുംമുറിയില്‍ തോമസുകുട്ടി (51) എന്നിവരെയാണ് ബ്ലോക്ക് പഞ്ചായത്ത് അംഗത്തിന്റെ നേതൃത്വത്തില്‍ നാട്ടുകാര്‍ തടഞ്ഞുവച്ചു പൊലീസിനു കൈമാറിയത്.

ബ്ലോക്ക് പഞ്ചായത്ത് അംഗം രഘു പെരുമ്പുളിക്കലിന്റെ അറിവോടെയാണ് വരുന്നതെന്നു പറഞ്ഞായിരുന്നു ഇരുവരും പെരുമ്പുളിക്കല്‍ കുളവള്ളി ഭാഗത്തുള്ള വീടുകളില്‍ പണപ്പിരിവ് നടത്തിയത്. തുമ്പമണ്‍ സ്വദേശികളാണെന്നും മകളുടെ കരള്‍ മാറ്റിവയ്ക്കല്‍ ശസ്ത്രക്രിയയ്ക്കു സഹായം അഭ്യര്‍ഥിച്ചു വന്നതാണെന്നുമാണ് ഇവര്‍ പറഞ്ഞിരുന്നത്.

പണപ്പിരിവിന്റെ ഭാഗമായി ഇരുവരും രഘുവിന്റെ വീട്ടില്‍ എത്തിയതോടെയാണ് കള്ളി വെളിച്ചത്തായത്. വീട് തിരിച്ചറിയാതെ, രഘു പെരുമ്പുളിക്കല്‍ പറഞ്ഞിട്ടു ചികിത്സാ സഹായത്തിനു വന്നതാണെന്ന് ഇവിടെയും പറഞ്ഞു. രഘുവിനെ അറിയാമോ എന്നു ചോദിച്ചപ്പോള്‍ തുമ്പമണ്‍ പഞ്ചായത്ത് അംഗമാണെന്ന് പറഞ്ഞതോടെ തട്ടിപ്പു മനസ്സിലായ രഘു ഇരുവരെയും തടഞ്ഞു വച്ച ശേഷം നാട്ടുകാരെ വിളിച്ചു വരുത്തി പൊലീസില്‍ അറിയിച്ചു.

പന്തളം പൊലീസ് എത്തി ഇരുവരെയും കസ്റ്റഡിയില്‍ എടുക്കുകയായിരുന്നു. സമാനമായ തട്ടിപ്പ് കുളനട, ഇലവുംതിട്ട, മെഴുവേലി എന്നിവിടങ്ങളിലെ വീടുകളും വ്യാപാര സ്ഥാപനങ്ങളും കേന്ദ്രീകരിച്ച് നടന്നിരുന്നു.