അരികിലൂടെ പാഞ്ഞ് പോകുന്ന കാറിൽ നിന്നും നാട്ടുകാർ കേട്ടത് യുവതിയുടെ കരച്ചിൽ. എന്തെന്നറിയാൻ നാട്ടുക്കാർ കാർ തടഞ്ഞ് വച്ചു. തുടർന്ന് നടന്ന പരിശോധനയിൽ കണ്ടത് ഞെട്ടിക്കുന്ന കാഴ്ച്ച. കാറില്‍ യാത്ര ചെയ്യുകയായിരുന്ന ദമ്പതികള്‍ മദ്യ ലഹരിയില്‍ ഏറ്റുമുട്ടുകയായിരുന്നു.

ഇന്നലെ വൈകിട്ട് കായംകുളം ചേരാവള്ളിയില്‍ വെച്ചായിരുന്നു ഈ സംഭവം നടന്നത് . കാറില്‍ നിന്ന് സ്ത്രീയുടെ ബഹളം കേട്ട നാട്ടുകാർ കാര്‍ തടയുകയായിരുന്നു. മദ്യത്തിനൊപ്പം മര്‍ദ്ദനവും കൂട്ടിയായപ്പോൾ സ്ത്രീ അവശ നിലയിൽ എത്തിയിരുന്നു. അറുന്നൂറ്റിമംഗലം സ്വദേശികളാണ്. ദമ്പതികളെയും കാർ ഡ്രൈവറെയും നാട്ടുകാര്‍ തടഞ്ഞു വെച്ചു. ശേഷം പോലീസിനെ വിളിച്ചു വരുത്തുകയായിരുന്നു. വിവരം അറിഞ്ഞെത്തിയ പോലീസിന്റെ കയ്യിൽ ഇരുവരെയും ഏല്‍പ്പിച്ചു. പൊലീസ് ഇവരെ ആശുപത്രിയില്‍ എത്തിച്ചു. വൈദ്യ പരിശോധനയില്‍ ഇവര്‍ മദ്യലഹരിയിലായിരുന്നെന്ന് തെളിഞ്ഞു. മദ്യപിച്ച്‌ വാഹനമോടിച്ചതിന് ഡ്രൈവര്‍ക്കെതിരെയും പൊതുസ്ഥലത്ത് ബഹളമുണ്ടാക്കിയതിന് 3 പേര്‍ക്കെതിരെയും കേസ് എടുക്കുവാനാണ് പൊലീസ് തീരുമാനം.