കൂടത്തായിയില്‍ അടുത്ത ബന്ധുക്കളായ ആറുപേര്‍ വര്‍ഷങ്ങളുടെ ഇടവേളയില്‍ മരിച്ചസംഭവത്തിന്റെ അന്വേഷണത്തെത്തുടര്‍ന്ന് നടത്തിയ അറസ്റ്റുകള്‍ റോയി തോമസിന്റെ കൊലപാതകവുമായി ബന്ധപ്പെട്ടാണെന്ന് റൂറല്‍ എസ്പി കെ. ജി. സൈമണ്‍. ആറു മരണങ്ങളുടെ പിന്നിലും താനാണെന്ന് ജോളി സമ്മതിച്ചിട്ടുണ്ടെന്നും അദ്ദേഹം പറഞ്ഞു.

റോയി തോമസിന്റെ മരണത്തെക്കുറിച്ച് അന്വേഷിക്കാന്‍ അമേരിക്കയിലുള്ള സഹോദരന്‍ രണ്ടുമാസം മുന്‍പ് നല്‍കിയ പരാതിയിലാണ് അന്വേഷണം നടന്നത്. പരാതിയെക്കുറിച്ച് അന്വേഷിക്കാന്‍ ഡിഐജി സ്‌പെഷല്‍ ടീമിനെ നിയോഗിച്ചിരുന്നു. തുടര്‍ന്ന് റോയി തോമസിന്റെ മരണത്തിലാണ് അന്വേഷണം ആരംഭിക്കുകയായിരുന്നു.
റോയി തോമസിന്റെ മരണത്തില്‍ സംശയം ഇല്ലെന്നായിരുന്നു അന്നത്തെ അന്വേഷണ റിപ്പോര്‍ട്ട്. സയനൈഡ് കഴിച്ചാണ് മരിച്ചതെന്ന് അന്ന് കണ്ടെത്തിയിരുന്നു. എന്നാല്‍ അത് എവിടെനിന്നാണ് കിട്ടിയതെന്ന് അന്ന് നടന്ന അന്വേഷണത്തില്‍ കണ്ടെത്താന്‍ സാധിച്ചില്ലെന്നും വ്യക്തമായി. തുടര്‍ന്നാണ് കേസ് പുനരന്വേഷിക്കുന്നതിന് കോടതിയുടെ അനുമതിയോടെ റൂറല്‍ എസ്പിയെ ചുമതലപ്പെടുത്തിയത്.
തുടര്‍ന്ന് നടന്ന വിശദമായ അന്വേഷണത്തിലാണ് സമാനമായ രീതിയില്‍ ആറ് പേര്‍ മരിച്ചതായി അറിയുന്നത്. ഈ മരണങ്ങളിലൊന്നും പോസ്റ്റ് മോര്‍ട്ടം നടന്നിരുന്നില്ല. ഈ മരണങ്ങളിലെല്ലാം കുടുംബാംഗമായ ജോളിയുടെ സാന്നിധ്യം കാണാന്‍ കഴിഞ്ഞു. തുടര്‍ന്ന് നടത്തിയ വിശദമായ അന്വേഷണത്തിലാണ് ജോളിയാണ് മരണത്തിനു പിന്നിലെന്ന സൂചന ലഭിക്കുന്നത്. തുടര്‍ന്നാണ് ആറ് കല്ലറകള്‍ തുറന്ന് മൃതദേഹ പരിശോധന നടത്താന്‍ തീരുമാനിച്ചത്.