സ്ത്രീത്വത്തെ അപമാനിക്കുന്നത് സി.പി.എമ്മിന്റെ ഫാഷനായി മാറിയിരിക്കുകയാണെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു, മന്ത്രിക്കെതിരെ തെരഞ്ഞെടുപ്പ് ചട്ടലംഘനത്തിനും സ്ത്രീത്വത്തെ അപമാനിച്ചതിനും കേസെടുക്കണമെന്ന് യു.ഡി.എഫ് ആവശ്യപ്പെട്ടിട്ടുണ്ട്
സ്ത്രീത്വത്തെ അപമാനിക്കുന്നത് സി.പി.എമ്മിന്റെ ഫാഷനായി മാറിയിരിക്കുകയാണെന്ന് പ്രതിപക്ഷനേതാവ് രമേശ് ചെന്നിത്തല ആരോപിച്ചു. അരൂരിലെ യുഡിഎഫ് സ്ഥാനാര്ഥി ഷാനിമോള് ഉസ്മാനെതിരേ മന്ത്രി ജി. സുധാകരന് നടത്തിയ 'പൂതന' പരാമര്ശത്തിനെതിരെ സംസാരിക്കുകയായിരുന്നു അദ്ദേഹം. മന്ത്രി പരാമര്ശം പിന്വലിച്ചു മാപ്പ് പറയണം. ലിംഗനീതിക്കായി വനിതാമതില് പണിത മുഖ്യമന്ത്രി സ്ത്രീത്വത്തെ അപമാനിച്ച കാര്യത്തില് ഒരു അക്ഷരം മിണ്ടിയില്ല. കമ്മ്യൂണിസ്റ്റുകാര്ക്ക സമരങ്ങളോട് അസഹിഷ്ണുതയാണ്. ഷാനിമോള് ഉസ്മാനെതിരെ നടത്തുന്ന ഇത്തരം പ്രവര്ത്തനങ്ങള് അവസാനിപ്പിക്കാന് തയ്യാറാകണമെന്നും അദ്ദേഹം ആവശ്യപ്പെട്ടു.
'പരാജയ ഭീതി പൂണ്ട് സമനില തെറ്റിയാണ് സിപിഎമ്മും സുധാകരനും ഇപ്പോള് പ്രവര്ത്തിക്കുന്നത്. ഒരു സര്ക്കാരും ചെയ്യാത്ത അഴിമതിയാണ് പിണറായി സര്ക്കാരിന്റെ കാലത്ത് കാണാന് സാധിക്കുന്നത്. അതില് നിന്ന് ജനശ്രദ്ധതിരിക്കാനാണ് ് ഷാനിമോള്ക്കെതിരെ കള്ളകേസുമായി രംഗത്ത് വന്നത്. എന്ഡിഎയുടെ വോട്ടുകള് സി.പി.എമ്മിന്റെ പെട്ടിയിലേക്കാണ് പോകുന്നത്. ചില മണ്ഡലങ്ങളില് ബിജെപിയും സിപിഎമ്മും വോട്ട് കച്ചവടം നടക്കുന്നുണ്ട്. കോന്നിയിലെ കാര്യം ഇതിനകം ചര്ച്ചയായിട്ടുണ്ട്. യു.ഡി.എഫ് ഈ തിരഞ്ഞെടുപ്പിനെ രാഷ്ട്രീയമായിട്ടാണ് കാണുന്നത്. കേരള പൊലീസിന്റെ എംബ്ലം മാറ്റിയത് പൊലീസിനെ രാഷ്ട്രീയവത്കരിക്കുന്നതിന്റെ ഭാഗമാണ്.
അരൂരില് പരാജയ ഭീതി കാരണമാണ് സി.പി.എം യു.ഡി.എഫ് സ്ഥാനാര്ഥിയുടെ മനോവീര്യം തകര്ക്കാന് അധിക്ഷേപിക്കുന്നത്. അതൊന്നും അരൂരില് ചെലവാകില്ല. പാര്ലമെന്റ് തെരഞ്ഞെടുപ്പില് തോറ്റെങ്കിലും ഇത്തവണ ഷാനിമോള് ജയിക്കുമെന്ന് കണ്ടാണ് അവരെ താറടിച്ച് കാണാക്കാന് വിലകുറഞ്ഞ അധിക്ഷേപവുമായി സി.പി.എം മന്ത്രി തന്നെ രംഗത്തെത്തിയത്. ഇടതുപക്ഷത്തിന് ഹാലിളകിയിരിക്കുകയാണ്. കിഫ്ബി, കിയാല്, പവര് ഗ്രിഡ് അടക്കം പ്രതിപക്ഷം ഉന്നയിച്ച അഴിമതികള് അന്വേഷിക്കാനോ, വ്യക്തമായ മറുപടി നല്കാനോ സര്ക്കാര് തയ്യാറായില്ല. ഇതേ തുടര്ന്ന് ഗവര്ണറെ സമീപിക്കുമെന്നും അദ്ദേഹം വ്യക്തമാക്കി.
അരൂരിലെ ഉപതെരഞ്ഞെടുപ്പ് പ്രചാരണത്തിനിടെ ചേര്ത്തല തൈക്കാട്ടുശ്ശേരിയില് കഴിഞ്ഞ ദിവസം നടന്ന കുടുംബയോഗത്തിനിടെയാണ് മന്ത്രി ജി. സുധാകരന് ഷാനിമോള് ഉസ്മാനെതിരെ പൂതന പരമാര്ശം നടത്തിയത്. മന്ത്രിക്കെതിരെ തെരഞ്ഞെടുപ്പ് ചട്ടലംഘനത്തിനും സ്ത്രീത്വത്തെ അപമാനിച്ചതിനും കേസെടുക്കണമെന്ന് യു.ഡി.എഫ് ആവശ്യപ്പെട്ടിട്ടുണ്ട്. എന്നാല് താന് ഷാനിമോളെ ഏറെ ബഹുമാനത്തോടെയാണ് കാണുന്നതെന്നും പ്രസംഗത്തിനിടെ നടത്തിയ പ്രയോഗം അവരെ അപമാനിക്കാനെന്ന രീതിയില് വ്യാഖ്യാനിക്കുകയാണെന്നും മന്ത്രി വിശദീകരിച്ചു.
https://www.facebook.com/Malayalivartha
