ശബരിമലയില്‍ രാത്രിയുടെ മറവില്‍ പോലീസ് അകമ്പടിയോടെ കയറിയ ബിന്ദുവും കനകദുര്‍ഗയും കാരണം നാട്ടിലുണ്ടായ മനസമാധാനക്കേടിന് കയ്യും കണക്കുമില്ലായിരുന്നു. കേരളം പോലും നിശ്ചലമാകുന്ന അവസ്ഥയിലായിരുന്നു. എല്ലാം കഴിഞ്ഞ് ബിന്ദുവിനും കനകദുര്‍ഗയ്ക്കും വീട്ടില്‍ പോകാന്‍ പറ്റാത്ത അവസ്ഥയും ഉണ്ടായിരുന്നു. ഇരുവരും പോലീസ് അകമ്പടിയോടെ ജോലിയ്ക്ക് പോകുകയും ചെയ്തു. എന്നാല്‍ കനക ദുര്‍ഗയുടെ കുടുംബം യഥാര്‍ത്ഥ ഭക്തരുടെ മനസ് ഉള്‍ക്കൊണ്ട് നിന്നു. മാത്രമല്ല തിരുവനന്തപുരത്ത് പോകുന്നു എന്നുപറഞ്ഞാണ് കനകദുര്‍ഗ പോയത്. പിന്നെ കണ്ടത് ശബരിമല വാര്‍ത്തയില്‍. കുടുംബത്തിനുണ്ടായ നാണക്കേടിന് പരിഹാരം തേടി കനകദുര്‍ഗയുടെ ഭര്‍ത്താവും അമ്മായിമ്മയും നിന്നതോടെ വലിയ പ്രശ്‌നമായി.

ഇതിനിടെ വീട്ടില്‍ കയറാന്‍ നടത്തിയ ശ്രമം പരാജയപ്പെട്ടതോടെ അഭയ കേന്ദ്രത്തിലായി. പിന്നീട് അമ്മായിയമ്മയുമായുള്ള മല്‍പ്പിടുത്തത്തോടെ കുടുംബത്തില്‍ നിന്നും എന്നന്നേക്കും പറത്തായി. വയസായ അമ്മായിയമ്മ തല്ലിയെന്ന് പറഞ്ഞ് കേസും കൊടുത്തു. പിന്നെ കോടതി വിധിയുടെ വെളിച്ചത്തില്‍ ഭര്‍ത്താവും അമ്മയും ആ വീട്ടില്‍ നിന്നും പടിയിറങ്ങി. ജീവിത ദുരിതത്തില്‍ കഷ്ടപ്പെട്ട് സമ്പാദിച്ച വീട് വിട്ടിറങ്ങുമ്പോള്‍ അവര്‍ അക്ഷരാര്‍ത്ഥത്തില്‍ കരയുകയായിരുന്നു. എന്നാല്‍ അന്നൊന്നും ഒരു വിട്ടുവീഴ്ചയ്ക്കും തയ്യാറാകാതിരുന്ന കനകദുര്‍ഗ ഇപ്പോള്‍ പൊട്ടിക്കരയുകയാണ്. അതും തമിഴ് ചാനലില്‍...

ശബരിമലയില്‍ ആചാരലംഘനം നടത്തി ഒരു വര്‍ഷത്തിനു ശേഷം ബിബിസി തമിഴ് ചാനലിന് നല്‍കിയ അഭിമുഖത്തിലാണ് കനകദുര്‍ഗ താന്‍ ഇപ്പോള്‍ നേരിടുന്ന അവഗണനയിലും വെറുപ്പിലും വേദനിച്ചു കരഞ്ഞത്. ശബരിമലയില്‍ കയറിയതോടെ തന്നെ എല്ലാവരും ഉപേക്ഷിച്ചതായി കനകദുര്‍ഗ പറയുന്നു.

എനിക്കിപ്പോള്‍ കുടുംബമില്ല. ശബരിമല സംഭവത്തിന് ശേഷം അവരെല്ലാം എന്നെ വെറുക്കുന്നു. ഒറ്റപ്പെടുത്തുന്നു. ശബരിമലയില്‍ നിന്നെത്തിയ ശേഷം അമ്മായിഅമ്മ മര്‍ദിച്ചു. ആശുപത്രിയില്‍ ചികിത്സ തേടി. കോടതി ഉത്തരവ് പ്രകാരം വീട്ടില്‍ തിരിച്ചെത്തുമ്‌ബോഴേക്ക് ഭര്‍ത്താവും കുട്ടികളും വാടകവീട്ടിലേക്ക് മാറി. ശനിയും ഞായറും മാത്രമാണ് മക്കളെ കാണാന്‍ സാധിച്ചിരുന്നത്. എന്നാല്‍ വിവാഹ മോചനത്തിന് ശേഷം ഭര്‍ത്താവ് സ്‌റ്റേ വാങ്ങി. ഇപ്പോള്‍ മക്കളെ കാണാന്‍ അനുവദിക്കുന്നില്ല. ഞാനിപ്പോള്‍ കുട്ടികളെക്കുറിച്ച് ഓര്‍ക്കാറില്ല. എന്റെ മക്കള്‍ എനിക്കൊപ്പം വേണം. അവരില്ലാതെ ആ വീട്ടില്‍ കഴിയുന്നത് വളരെ ബുദ്ധിമുട്ടിയാണ്. അവര്‍ക്ക് അമ്മയോട് ഒരു ദേഷ്യവുമില്ല എന്ന് എനിക്കറിയാം... ഇത്രയും പറഞ്ഞ് കനകദുര്‍ഗ പൊട്ടിക്കരഞ്ഞു.

തന്നോടൊപ്പം ജീവിക്കാന്‍ പറ്റില്ലെന്നാണ് അദ്ദേഹം പറഞ്ഞത് . യാതൊരു ഒത്തു തീര്‍പ്പിനും വഴങ്ങിയില്ല . ഫെബ്രുവരി അഞ്ചിനു താന്‍ വീട്ടില്‍ എത്തിയെങ്കിലും വീട് പൂട്ടി ഭര്‍ത്താവ് മക്കള്‍ക്കൊപ്പം താമസം മാറിയിരുന്നു. തന്നെ ഉപേക്ഷിച്ചാണ് , ഈ വീട്ടില്‍ തനിച്ചാക്കിയാണ് അവര്‍ പോയത് . ആദ്യം മക്കളെ പോലും കാണാന്‍ കഴിഞ്ഞിരുന്നില്ല . പിന്നീട് ആഴ്ച്ചയില്‍ രണ്ട് ദിവസം കുട്ടികളെ കാണാന്‍ അനുമതി ലഭിച്ചു .എന്നാല്‍ ഇപ്പോള്‍ മാര്‍ച്ച് മാസം മുതല്‍ തനിക്ക് മക്കളെ കാണാന്‍ പോലും കഴിയുന്നില്ല . മക്കള്‍ തനിക്കൊപ്പം വേണം, തനിക്ക് ഒറ്റപ്പെട്ട് ജീവിക്കാന്‍ കഴിയുന്നില്ലെന്നും കനക ദുര്‍ഗ പറഞ്ഞു. ശബരിമലയെ താന്‍ അശുദ്ധമാക്കിയതായി ഭര്‍ത്താവ് പറഞ്ഞെന്നും, സ്വന്തം വീട്ടുകാര്‍ പോലും തന്നെ തള്ളിക്കളഞ്ഞായും കനകദുര്‍ഗ പറഞ്ഞു .

സ്ത്രീകളുടെ അവകാശത്തിനായുള്ള പോരാട്ടം കൂടിയായിരുന്നു ശബരിമല പ്രവേശം. എനിക്ക് ശേഷവും നൂറുകണക്കിന് യുവതികള്‍ ശബരിമലയില്‍ പോകാന്‍ തയ്യാറായിരുന്നു. എന്നാല്‍ എന്റെ അവസ്ഥ കണ്ട് പലരും പേടിച്ച് പിന്മാറിയെന്നും കനകദുര്‍ഗ പറഞ്ഞു.