കോടംതുരുത്ത് ഗവ. വി.വി. ഹയര് സെക്കന്ഡറി സ്കൂളിന്റെ കെട്ടിടം കുരുന്നുജീവനുകള്ക്ക് ഭീഷണി
ദേശീയപാതയോരത്തെ കോടംതുരുത്ത് ഗവ. വി.വി. ഹയര് സെക്കന്ഡറി സ്കൂളില് തകര്ന്നു വീഴാറായി അടച്ചു പൂട്ടിയിട്ടിരിക്കുന്ന കെട്ടിടം കുരുന്നുകള്ക്ക് ഭീഷണിയാകുന്നു. ഓടിട്ട ഈ കെട്ടിടം രണ്ടു വര്ഷത്തോളമായി ജീര്ണാവസ്ഥയിലാണ്. അടച്ചു പൂട്ടിയിട്ടിരിക്കുന്ന പ്രസ്തുത കെട്ടിടത്തിനുള്ളില് ഉപേക്ഷിക്കപ്പെട്ടതും മേല്ക്കൂരയില് നിന്നിളകി വീണതും ഉപയോഗ ശൂന്യമായ തടികളും കൂട്ടിയിട്ടിരിക്കുന്നതിനാല് പാമ്പ്, എലി എന്നിവ ഉള്പ്പെടെ പല ക്ഷുദ്രജീവികളുടേയും കേന്ദ്രമാണ്.
നാലു ക്ലാസ്മുറികള് അടങ്ങുന്ന കെട്ടിടത്തിന്റെ മേല്ക്കൂരയാണ് കാലപ്പഴക്കത്താല് നശിച്ചത്. കുട്ടികളെ മറ്റൊരു കെട്ടിടത്തിലേക്ക് മാറ്റിയെങ്കിലും ശോച്യാവസ്ഥയിലായ കെട്ടിടം പഴയ നിലയില് തുടരുകയാണ്. സ്കൂള് ഓഫീസിനരികിലെ ഓടുമേഞ്ഞ മറ്റൊരു കെട്ടിടവും ശോച്യാവസ്ഥയിലാണ്. അരൂര് ഉപതെരഞ്ഞെടുപ്പില് പോളിംഗ് സ്റ്റേഷനായി പ്രവര്ത്തിച്ച ഈ കെട്ടിടത്തിനു മുകളില് പ്ലാസ്റ്റിക് ഷീറ്റ് വലിച്ചുകെട്ടിയാണ് ഉദ്യോഗസ്ഥര് മഴയില് നിന്ന് രക്ഷപ്പെട്ടത്.
ആയിരത്തിലധികം കുട്ടികള് പഠിക്കുന്ന കോടംതുരുത്തിലെ പ്രധാന സ്കൂളാണിത്. കെട്ടിടം പൊളിച്ചുമാറ്റാനും തുടര് നടപടികള്ക്കും ജില്ലാ പഞ്ചായത്ത് അധികൃതരുടെ അനുമതി വേണം. സ്കൂള് അധികൃതര് ബന്ധപ്പെട്ട ഉദ്യോഗസ്ഥരെ വിവരം അറിയിച്ചെങ്കിലും നടപടികളിലെ കാലതാമസമാണ് പ്രതിസന്ധി സൃഷ്ടിക്കുന്നത്.
https://www.facebook.com/Malayalivartha