കൂടത്തായി കൊലക്കേസില്‍ ജോളിയ്ക്കു വേണ്ടി ആളൂര്‍ വാദക്കും; രജനീകാന്തിന്റെ വരവുപോലെ സ്വകാര്യ സെക്യൂരിറ്റി ഏജന്‍സിയിലെ കരിമ്പൂച്ചകളുടെ അകമ്പടിയില്‍ ആളൂര്‍ വന്നിറങ്ങി; ആളൂരിനോടൊപ്പം എത്തിയത് ആളൂര്‍ അസോസിയേഷനിലെ പത്തോളം അഭിഭാഷകരും
കൂടത്തായി കൊലപാതകക്കേസിലെ മുഖ്യപ്രതി ജോളിയ്ക്ക് വേണ്ടി അഡ്വ. ബി എ ആളൂര്‍ വരുമെന്ന് നേരത്തെ വാര്‍ത്തയുണ്ടായിരുന്നെങ്കിലും അദ്ദേഹം നിഷേധിക്കുകായിരുന്നു. എന്നാല്‍ ഇന്ന് താമരശേരിയെ ഇളക്കി ആളൂരെത്തി. കൂടെ ആളൂര്‍ അസോസിയേഷനിലെ പത്തോളം അഭിഭാഷകരും. ഉച്ചയ്ക്ക് 11.30ഓടെ കരിമ്ബൂച്ചകളുടെ സംരക്ഷണ വലയത്തില്‍ സ്‌റ്റൈല്‍ മന്നന്‍ രജനികാന്ത് തോറ്റുപോകുന്ന പ്രകടനായിരുന്നു ആളൂരിന്റേത്. രാവിലെ മുതല്‍ തന്നെ കൊച്ചിയിലെയും കോഴിക്കോട്ടെയും മാധ്യമ ഓഫീസുകളിലേക്ക് ആളൂര്‍ അസോസിയേറ്റ്‌സില്‍ നിന്ന് ഫോണ്‍ കോളുകളുടെ പ്രവാഹമായിരുന്നു. താമരശ്ശേരി കോടതി പരിസരത്ത് സ്വകാര്യ സെക്യൂരിറ്റി ഏജന്‍സിയിലെ കരിമ്ബൂച്ചകളുടെ അകമ്ബടിയിലാണ് ആളൂര്‍ വന്നിറങ്ങിയത്.
കൂടത്തായി കൊലപാതക പരമ്ബരയില്‍ പ്രോസിക്യൂഷന്‍ ശേഖരിച്ച തെളിവുകള്‍ ദുര്‍ബലമെന്ന് കോടതിയില്‍ അഡ്വ. ബി ആര്‍ ആളൂര്‍ വാദിച്ചു. പ്രതിക്കെതിരെയുള്ളത് ആരോപണങ്ങള്‍ മാത്രമാണെന്നും ഇതിലും വലിയ കൂട്ട കൊലപാതകങ്ങള്‍ ചെയ്തവര്‍ക്ക് ജാമ്യം അനുവദിച്ചിട്ടുണ്ടെന്നും ജോളിയുടെ ജാമ്യാപേക്ഷയിലുള്ള വാദത്തിനിടെ ആളൂര്‍ കോടതിയില്‍ പറഞ്ഞു. ജോളിയുടെ ആദ്യ ഭര്‍ത്താവ് റോയ് തോമസിനെ കൊലപ്പെടുത്തിയ കേസിലാണ് ആളൂര്‍ അസ്സോസിയേറ്റ്‌സിന് ജോളി വക്കാലത്ത് നല്‍കിയിരുന്നത്. എന്നാല്‍ രണ്ടാമത്തെ കേസില്‍ ഹാജരാക്കിയപ്പോള്‍ തനിക്ക് അഭിഭാഷകര്‍ ഇല്ലെന്ന് കോടതിയെ അറിയിച്ചതിനെ തുടര്‍ന്ന് ജോളിക്ക് സൗജന്യ നിയമ സഹായത്തിന് അഭിഭാഷകനെ നിയോഗിച്ചിരുന്നു. ജോളിയെ തെറ്റിദ്ധരിപ്പിച്ചാണ് വക്കാലത്ത് ഒപ്പിടീപ്പിച്ചതെന്ന ആരോപണവുമായി താമരശ്ശേരി ബാര്‍ അസ്സോസിയേഷന്‍ രംഗത്തെത്തിയിരുന്നുവെങ്കിലും റോയ്‌തോമസ് വധക്കേസില്‍ ആളൂര്‍ അസോസിയേറ്റ്‌സ് വീണ്ടും ജാമ്യാപേക്ഷ സമര്‍പ്പിക്കുകയും വാദത്തിനായി ബി എ ആളൂര്‍ എന്ന ബിജു ആന്റണി നേരിട്ട് കോടതിയില്‍ ഹാജരാകുകയായിരുന്നു.
അതേസമയം, റോയി തോമസ് വധക്കേസില്‍ ജോളിയുടെയും എംഎസ് മാത്യുവിന്റെയും റിമാന്‍ഡ് കാലാവധി ഈമാസം 24 വരെ നീട്ടി. ജോളിക്കായി ബിഎ ആളൂര്‍ സമര്‍പ്പിച്ച ജാമ്യ ഹര്‍ജി താമരശേരി കോടതി ഈ മാസം 16ന് വിധി പറയാന്‍ മാറ്റി. ജോളിയുടെ ജാമ്യാപേക്ഷ നേരത്തെ താമരശേരി കോടതിയും ജില്ലാ സെഷന്‍സ് കോടതിയും തള്ളിയിരുന്നു. റോയ് തോമസ് കേസിലെ മൂന്നാം പ്രതി പ്രജികുമാറിന് നേരത്തെ ഹൈക്കോടതി ജാമ്യം അനുവദിച്ചിരുന്നു.
https://www.facebook.com/Malayalivartha
