പോലീസയ്യപ്പന് ശുക്രന്... അയ്യപ്പന്മാരെ ആത്മാര്ത്ഥമായി സേവിക്കുന്ന പോലീസ് അയ്യപ്പന്മാര്ക്ക് ഊര്ജം പകരാന് ദേവസ്വം ബോര്ഡ്; തീര്ത്ഥാടകരെ സഹായിക്കുന്ന പോലീസുകാര്ക്ക് ഹോര്ലിക്സും ബിസ്കറ്റും; തീരുമാനത്തെ ഇരുകൈയ്യും നീട്ടി സ്വീകരിച്ച് പോലീസുകാര്
പോലീസുകാരും ഭക്തരും ഒന്നാകുന്ന അപൂര്വ കാഴ്ചയാണ് ശബരിമലയില് എന്നും കാണാറുള്ളത്. പോലീസുകാര് അയ്യപ്പന്മാരെ സ്വാമി എന്നല്ലാതെ വിളിക്കില്ല. പകരം പോലീസുകാരെ അയ്യപ്പന്മാരും പോലീസ് അയ്യപ്പനെന്നാണ് വിളിക്കാറ്. പോലീസുകാരും പരമ ഭക്തരായിരിക്കും. അവര് ഒരു ജോലിയായല്ല സേവനമായാണ് ശബരിമല ഡ്യൂട്ടിയെ കാണുന്നത്. പലരും ശബരിമല ഡ്യൂട്ടി ചോദിച്ച് വാങ്ങാറുമുണ്ട്. താടിയും മുടിയും വളര്ത്തി ഇന്ഷര്ട്ട് ചെയ്യാതെ പരമ ഭക്തരായാണ് അവര് സേവനമനുഷ്ഠിക്കുന്നത്. ശബരിമല പോലീസുകാര്ക്ക് താടി വളര്ത്താനുള്ള അനുവാദവും സര്ക്കാര് നല്കിയിരുന്നു. പരാതികളോ പരിഭവങ്ങളോ പറയാതെ അവര് ഉള്ള സൗകര്യങ്ങള് കൊണ്ട് ആത്മാര്ത്ഥമായി ജോലി ചെയ്തു.
എന്നാല് ഇതിനെല്ലാം തുരങ്കം വയ്ക്കുന്നതായിരുന്നു കഴിഞ്ഞ വര്ഷത്തെ യുവതീ പ്രവേശന പ്രതിഷേധം. യുവതികളെ കയറ്റാന് സര്ക്കാരും പാര്ട്ടിയും മത്സരിച്ചപ്പോള് സ്വാഭാവികമായും അതിന് കുടപിടിക്കേണ്ട ഉത്തരവാദിത്തം പോലീസിനായി. ഫലമോ ശരണം വിളിച്ച ഭക്തരെ വരെ അറസ്റ്റ് ചെയ്തെന്ന പേരുദോഷമുണ്ടായി. മാത്രമല്ല പോലീസിന്റെ താടിയും മുടിയുമെല്ലാം വളര്ത്തല് നിന്നു. ഇന്ഷര്ട്ട് ചെയ്ത് ഷൂസും ധരിച്ച് ജോലി ചെയ്യാന് ഉത്തരവും വന്നു. ഉത്തരവിടേണ്ടവര്ക്ക് ഇട്ടാല് മതി. എന്നാല് പോലീസുകാര് അനുഭവിക്കുന്ന ദുരിതം ആര് കാണാന്. ഓരോ പ്രാവശ്യവും യുവതികളേയും കയറ്റി മല കയറുക പ്രതിഷേധത്തിന്റെ നടുവില് നില്ക്കുക വീണ്ടും ഇറങ്ങുക. ഇങ്ങനെ വിശ്രമമില്ലാതെ വെള്ളവും ഭക്ഷണവുമില്ലാതെ മണിക്കൂറുകളോടെയാണ് ടെന്ഷനോടെ അവര് ജോലി ചെയ്തത്. അങ്ങനെ കഴിഞ്ഞ വര്ഷം പോലീസുകാരെ സംബന്ധിച്ച് തീരാ ദുരിതമായിരുന്നു.
ലോക്സഭാ തെരഞ്ഞെടുപ്പില് ഇടതുമുന്നണി കൂപ്പുകുത്തിയപ്പോള് ശബരിമലയിലും സര്ക്കാര് നിലപാട് മാറ്റി. ഒരു യുവതിയേയും കയറ്റേണ്ടെന്ന നിര്ദേശം പോലീസിന് ലഭിച്ചു. ഫലമോ ശബരിമലയിലെ വരുമാനവും ഭക്തരും കൂടി. പോലീസുകാര്ക്കാകട്ടെ പഴയതുപോലെ സ്വാമിയാകാനും സാധിച്ചു. അങ്ങനെ നന്മയുടെ ആള്രൂപമായി പോലീസ് അയ്യപ്പന്മാരും മാറി. ഫലമോ കഷ്ടതയനുഭവിക്കുന്ന പോലീസകാരെ സഹായിക്കാനൊരുങ്ങുകയാണ് ദേവസ്വംബോര്ഡ്.
തീര്ത്ഥാടകരെ പതിനെട്ടാംപടി കയറാന് സഹായിക്കുന്ന പൊലീസുകാര്ക്ക് ഊര്ജം പകരാന് ദേവസ്വം ബോര്ഡിന്റെ തീരുമാനം. പതിനെട്ടാംപടിയില് ജോലി ചെയ്യുന്ന പൊലീസുകാര്ക്ക് ഹോര്ലിക്സും, ബിസ്കറ്റും പഴവുമെല്ലാം നല്കാനാണ് ദേവസ്വം ബോര്ഡ് തീരുമാനിച്ചത്. പതിനെട്ടാംപടിയിലെ ജോലിയാണ് സന്നിധാനത്ത് സേവനമനുഷ്ഠിക്കുന്ന പൊലീസുകാര്ക്ക് ഏറെ ബുദ്ധിമുട്ടായിട്ടുള്ളത്. ഇതിനെ തുടര്ന്നാണ് പതിനെട്ടാംപടിയിലെ പൊലീസുകാര്ക്ക് ഊര്ജം പകരാന് എന്തെങ്കിലും നല്കണം എന്ന് സ്പെഷ്യല് കമ്മിഷണര് നിര്ദേശിച്ചത്.
ഹോര്ലിക്സും ബിസ്കറ്റും പൊലീസ് മെസിലേക്ക് ദേവസ്വം ബോര്ഡ് കൈമാറും. പതിനെട്ടാംപടിയില് ജോലി ചെയ്യുന്നവര്ക്ക് പഴം അടക്കമുള്ളവ നല്കണമെന്ന നിര്ദേശവും പരിഗണനയിലുണ്ട്. 10 പൊലീസുകാര് വീതമാണ് ഒരേസമയം ഈ ജോലി ചെയ്യുന്നത്. തുടര്ച്ചയായി 20 മിനിറ്റിലധികം ജോലി ചെയ്യാനാകില്ല. 20 മിനിറ്റ് കൂടുംതോറും പൊലീസുകാര് മാറി വരും. നാല് മണിക്കൂറാണ് ഓരോ ഗ്രൂപ്പിനും പതിനെട്ടാംപടിയിലെ ഡ്യൂട്ടി. എ.ആര്. ക്യാമ്പില്നിന്നുള്ള ചെറുപ്പക്കാരെയാണ് പതിനെട്ടാംപടിയില് നിയോഗിക്കുന്നത്.
തിരക്കേറിയ സമയത്ത് സ്വാമിമാരെ വേഗത്തില് പടികയറാന് സഹായിക്കണം. ഒരു മിനിറ്റില് 90 പേര് പതിനെട്ടാംപടി കയറി മാറണം. അല്ലെങ്കില് പമ്പ വരെ ക്യൂ വരും. ഇതനുസരിച്ചാണ് പോലീസുകാര് അയ്യപ്പന്മാരെ കയറ്റിവിടുന്നത്. ശരിക്കും ശരീരം ഇളകുന്നതാണ് പോലീസുകാരുടെ ഈ ജോലി. അതിനാണ് ആശ്വാസമേകുന്നത്.
https://www.facebook.com/Malayalivartha