മാപ്പ് എഴുതി നല്കി; വനിതാ കമ്മിഷന് അംഗം ഷാഹിദ കമാലിനോട് അപമര്യാദയായി പെരുമാറിയ ഓട്ടോറിക്ഷ ഡ്രൈവര് മാപ്പ് എഴുതി നല്കി
വനിതാ കമ്മിഷന് അംഗം ഷാഹിദ കമാലിനോട് അപമര്യാദയായി പെരുമാറിയ ഓട്ടോറിക്ഷ ഡ്രൈവര് മാപ്പ് എഴുതി നല്കി. മലപ്പുറത്ത് നടന്ന വനിതാകമ്മീഷന് അദാലത്തില് നേരിട്ടെത്തിയാണ് അങ്ങാടിപുറത്തെ ഓട്ടോറിക്ഷ ഡ്രൈവര് അസ്ക്കറലി മാപ്പ് എഴുതി നല്കിയത്. തെറ്റാണ് ചെയ്തതെന്നു ബോധ്യപ്പെട്ടെന്നും ഇനി ആവര്ത്തിക്കില്ലെന്നും വനിതാ കമ്മീഷന് അസ്ക്കര് അലി എഴുതി നല്കി.
എന്നാല്, വിഷയം വ്യക്തിപരമായല്ല കാണുന്നതെന്നും സാമൂഹ്യപ്രശ്നമെന്ന നിലയില് നിയമ നടപടികളുമായി മുന്നോട്ട് പോകുമെന്നും ഷാഹിദ കമാല് പറഞ്ഞു. ഇതൊരു ഒറ്റപെട്ട സംഭവമായി കാണാനാവില്ല. യാത്രക്കാരോടുള്ള ഓട്ടോറിക്ഷ ഡ്രൈവര്മാരുടെ മനോഭാവത്തില് മാറ്റം വരണം. ഇതിനായി അങ്ങാടിപ്പുറത്തെ ഓട്ടോറിക്ഷ ഡ്രൈവര്മാര്ക്ക് ബോധവത്ക്കരണം നടത്താന് ഗതാഗതവകുപ്പുദ്യോഗസ്ഥര്ക്ക് നിര്ദ്ദേശം നല്കിയതായും ഷാഹിദ കമാല് പറഞ്ഞു.
അങ്ങാടിപ്പുറം റെയില്വേ സ്റ്റേഷനിലെത്തിയ വനിതാകമ്മിഷനംഗം ഷാഹിദ കമാല് രണ്ട് കിലോമീറ്റര് അപ്പുറമുള്ള റസ്റ്റ് ഹൗസിലേക്ക് പോവാന് ഓട്ടോയില് കയറിയപ്പോഴാണ് ചെറിയദൂരം പോവാന് വിസമ്മതിച്ച് ഡ്രൈവര് ഭീഷണിപ്പെടുത്തിയത്.
അങ്ങാടിപ്പുറം ഗ്രാമപഞ്ചായത്തിലെ കുടുംബശ്രീ വാര്ഷികം ഉദ്ഘാടനം ചെയ്യാനെത്തിയതായിരുന്നു ഷാഹിദ കമാല്. ക്യൂ നിന്ന് ഓട്ടോയില് കയറിയ ഷാഹിദ കമാല് റെസ്റ്റ്ഹൗസിലേക്ക് പോവാന് പറഞ്ഞതോടെ സ്റ്റേഷനിലെ സ്ഥിരം ഓട്ടോക്കാരന് സ്ഥലം അറിയില്ലെന്ന് ധാര്ഷ്ട്യത്തോടെ പറഞ്ഞു. അതവഗണിച്ച് ഷാഹിദ കമാല് ഓട്ടോയില് കയറിയെങ്കിലും കുറച്ചുദൂരം പിന്നിട്ടതോടെ ഓട്ടോ നിറുത്തി ഓട്ടം പോകുന്നില്ലെന്നും ഇറങ്ങിപ്പോ എന്നും ആക്രോശിച്ചു. വനിതാ കമ്മിഷന് അംഗമാണെന്ന് പറഞ്ഞിട്ടും ഓട്ടോക്കാരന്റെ മട്ടുമാറിയില്ല. പെരിന്തല്മണ്ണ സി.ഐയെ വിളിച്ച് ഓട്ടോയുടെ നമ്ബര് നല്കിയതോടെ അബദ്ധം മനസിലാക്കിയ ഡ്രൈവര് ഭവ്യതയോടെ മാഡമെന്നായി വിളി. പിന്നെ വിസമ്മതമൊന്നും ഇല്ലാതെ ഷാഹിദ കമാലിനെ ഗസ്റ്റ് ഹൗസിലെത്തിച്ചു.
ഓട്ടോക്കൂലി വാങ്ങാന് വിസമ്മതിച്ചെങ്കിലും ഷാഹിദ കമാല് നല്കി. ഓട്ടോഡ്രൈവര് വീണ്ടും ഗസ്റ്റ് ഹൗസില് ക്ഷമ പറയാന് എത്തിയെങ്കിലും ഷാഹിദ കമാല് വഴങ്ങിയില്ല.
https://www.facebook.com/Malayalivartha
