വെയിലുകൊണ്ടത് വെറുതേ... നൂറുവട്ടം ഭരണഘടന പറയുന്ന ഗവര്ണര് ആരിഫ് മുഹമ്മദ് ഖാനെ കുടുക്കാനിരുന്ന ഭരണപക്ഷത്തിന് അക്കിടി പറ്റി; വിമര്ശനങ്ങള് വായിച്ച് ഗവര്ണര് താരമായി; മുഖ്യമന്ത്രിയെ ബഹുമാനിച്ച് വായിക്കുന്നുവെന്ന് ഒരു താങ്ങ് കൊടുത്ത് വിമര്ശനങ്ങള് വായിച്ചു
ഗവര്ണര് ആരിഫ് മുഹമ്മദ്ഖാന് മലയാളികളുടെ താരമായി മാറുകയാണ്. ഇന്നത്തെ ദിനം അക്ഷരാര്ത്ഥത്തില് തന്റേതാക്കി മാറ്റുകയായിരുന്നു ഗവര്ണര്. തടഞ്ഞ പ്രതിപക്ഷത്തെ നിഷ്പ്രഭമാക്കി തന്റെ ദൗത്യം നിര്വഹിച്ചു. മാത്രമല്ല വിമര്ശനങ്ങള് അന്തസായി ഗവര്ണര് വായിക്കുകയും ചെയ്തു. ഇത് സര്ക്കാരിന്റെ നയമല്ല നിലപാടാണെന്നാണ് ഗവര്ണര് പറഞ്ഞത്. ഗവര്ണര് നിര്ബന്ധിച്ചത് കൊണ്ടാണ് വായിച്ചതെന്നും ഗവര്ണര് പറഞ്ഞതോടെ ഗവര്ണര് വലുതാകുകയാണ് ചെയ്തത്.
നിയമസഭയില് ബജറ്റ് സമ്മളേനത്തിന് തുടക്കം കുറിച്ചുകൊണ്ട് നയപ്രഖ്യാപന പ്രസംഗത്തിനെത്തിയ ഗവര്ണര്ക്കെതിരെ കടുത്ത നിലപാടുമായാണ് പ്രതിപക്ഷം രംഗത്തെത്തിയത്. നിയമസഭയിലെത്തിയ ഗവര്ണറെ പ്രതിപക്ഷം തടഞ്ഞു.
നിയമസഭയിലേക്ക് സ്പീക്കറും മുഖ്യമന്ത്രിയും ചേര്ന്ന് ആനയിച്ച ഗവര്ണറെ പ്രതിപക്ഷം ബാനറുകളും പ്ലക്കാര്ഡുമായി തടഞ്ഞു. 'ഗോബാക്ക്' വിളികളുമായി ഗവര്ണക്കുമുന്നില് ഉപരോധം സൃഷ്ടിച്ച പ്രതിപക്ഷത്തെ വാച്ച് ആന്ഡ് വാര്ഡ് ബലംപ്രയോഗിച്ച് പിടിച്ചുമാറ്റി.
തുടര്ന്ന് വാച്ച് ആന്ഡ് വാര്ഡിന്റെ വലയത്തില് സ്പീക്കറുടെ ഡയസിലെത്തിയ ഗവര്ണര് പ്രതിപക്ഷ ബഹളത്തിനിടയിലും നയപ്രഖ്യാപന പ്രസംഗം ആരംഭിച്ചു. മലയാളത്തില് നിയമസഭയെ അഭിസംബോധന ചെയ്ത ഗവര്ണര് അംഗങ്ങളോട് നന്ദി രേഖപ്പെടുത്തി. ഇതിനിടയില് പ്രതിപക്ഷം മുദ്രാവാക്യങ്ങള് മുഴക്കി സഭ ബഹിഷ്കരിച്ചു.നിയമ സഭയ്ക്ക് പുറത്ത് പ്രതിപക്ഷം പ്രതിഷേധം തുടരുകയാണ്.
പൗരത്വനിയമ ഭേദഗതിക്കെതിരായ സര്ക്കാരിന്റെ പ്രതിഷേധം പ്രസംഗത്തില് ഉള്പ്പെടുത്താനാവില്ലെന്ന് നിലപാടെടുത്ത ഗവര്ണറുടെ പ്രസംഗത്തിന് ഏറെ രാഷ്ട്രീയ പ്രാധാന്യമുണ്ട്. പൗരത്വനിയമ ഭേദഗതിക്കെതിരേ സര്ക്കാരും നിയമസഭയും സ്വീകരിച്ച നടപടികളെപ്പറ്റി പരാമര്ശിക്കുന്ന നയപ്രഖ്യാപനത്തിലെ 18ാം ഖണ്ഡികയോടാണ് ഗവര്ണര്ക്ക് എതിര്പ്പ്. ഈ ഖണ്ഡിക സര്ക്കാരിന്റെ അഭിപ്രായം മാത്രമാണെന്നും തിരുത്തണമെന്നും മുഖ്യമന്ത്രിയോട് ഗവര്ണര് ആവശ്യപ്പെട്ടിരുന്നു.
https://www.facebook.com/Malayalivartha