നൂറനാട്ട് പ്രധാന കനാലിന്റെ ഷട്ടര് അടച്ച് ലിവര് മോഷണം: സമീപപ്രദേശങ്ങളില് വെള്ളം കയറി
സാമൂഹിക വിരുദ്ധര് നൂറനാട്ട് പ്രധാന കനാലിന്റെ ഷട്ടര് അര്ധരാത്രിയില് അടച്ച് ഷട്ടറിന്റെ ലിവര് മോഷ്ടിച്ചു കൊണ്ട് പോയി. കനാല് കവിഞ്ഞ് ഒഴുകി നിരവധി വീടുകളിലും റോഡിലും വെള്ളം കയറി. കായംകുളത്ത് നിന്ന് അഗ്നിശമന സേനാ യൂണിറ്റെത്തി ഷട്ടര് തുറന്നതിനാല് വന് ദുരന്തം ഒഴിവാകുകയായിരുന്നു.
തെന്മല ഡാമില് നിന്നും അടൂര് വഴി നൂറനാട്ടേക്കെത്തുന്ന പ്രധാന കനാലിന്റെ ഷട്ടറാണ് ഇക്കഴിഞ്ഞ ദിവസം രാത്രിയില് സാമൂഹിക വിരുദ്ധര് താഴ്ത്തുകയും ഷട്ടര് ലോക്ക് ചെയ്ത് ലിവര് കൊണ്ടുപോവുകയും ചെയ്തത്. പുലര്ച്ച മുതല് നൂറനാട് പണയില് പള്ളിക്കല് ഭാഗങ്ങളില് നിന്നും ആളുകള് വീടുകളില് കനാല് വെള്ളം കയറുന്നതായി പരാതിയുമായി നൂറനാട് സ്റ്റേഷനിലെത്തി. തുടര്ന്ന് പൊലീസ് കെഐപി അധികൃതരെ വിവരം അറിയിക്കുകയായിരുന്നു.
കെഐപി അധികൃതര്, ചാരുംമൂട് എന്ജിനീയര് സുകന്യയുടെ നേതൃത്വത്തില് സംഭവസ്ഥലത്ത് എത്തിയെങ്കിലും ഷട്ടര് തുറക്കാന് കഴിഞ്ഞില്ല. നൂറനാട്ടുള്ള പലചരക്ക് ഗോഡൗണിലേക്ക് വെള്ളം കയറി. ഇതോടൊപ്പം പ്രധാന കനാലില് വെള്ളം കെട്ടിനിന്ന് വിള്ളല് സംഭവിച്ച് ദുരന്തമുണ്ടാകാതിരിക്കാന് കായംകുളത്തുനിന്ന് അഗ്നിശമനസേനാ യൂണിറ്റിനെ വരുത്തി. മണിക്കൂറുകള്ക്ക് ശേഷമാണ് ഷട്ടര് തുറക്കുവാന് കഴിഞ്ഞത്. പിന്നീട് സമീപത്തുള്ള വര്ക്ക് ഷോപ്പില് നിന്ന് ലിവര് നിര്മിച്ചുകൊണ്ട് വന്ന് ഷട്ടര് പൂര്ണമായി തുറക്കുകയായിരുന്നു.
കൃഷിവകുപ്പ് മന്ത്രിയുടെ നിര്ദേശപ്രകാരം ഇന്നലെ തെന്മല ഡാമില് നിന്നും, തെക്കേക്കര പഞ്ചായത്തിലെ പള്ളിയാര്വട്ടം പാടശേഖരത്തിലേക്കുള്ള നിലവിലുള്ള വെള്ളത്തിന്റെ അളവ് വര്ധിപ്പിച്ചിരുന്നു. അവിടത്തെ ഏക്കറുകളോളം നെല്കൃഷി കരിഞ്ഞു നശിക്കുന്നതിനെ തുടര്ന്നായിരുന്നു ഈ നിര്ദേശം. എന്നാല് പള്ളിക്കല് ഭാഗത്തേക്ക് തിങ്കളാഴ്ച മുതല് വെള്ളം തിരിച്ചുവിടുമെന്ന് കെഐപി അധികൃതരും പറഞ്ഞിരുന്നു. വെള്ളം എത്താത്തതിനെ തുടര്ന്നാണ് സാമൂഹിക വിരുദ്ധര് വന്ന് ഷട്ടര് താഴ്ത്തിയത്. മുന്കാലങ്ങളിലും ഇതേ അനുഭവം ഈ ഭാഗത്ത് ഉണ്ടായിട്ടുണ്ട്. 2 വര്ഷം മുന്പ് ഷട്ടര് താഴ്ത്തിയതിനെ തുടര്ന്ന് നൂറുകണക്കിന് വീടുകളും ഏക്കറുകണക്കിന് കൃഷിയിടങ്ങളും വെള്ളത്തിലായിരുന്നു.
കെഐപിയുടെ പ്രധാന കനാലിന്റെ നൂറനാട്ടുള്ള ഷട്ടര് താഴ്ത്തിയ സാമൂഹിക വിരുദ്ധരെ കണ്ടു പിടിച്ച് നിയമ നടപടി സ്വീകരിക്കണമെന്നാവശ്യപ്പെട്ട് കെഐപി അധികൃതര് നൂറനാട് പൊലീസില് പരാതി നല്കി. ഇതിനെ തുടര്ന്ന് സംഭവത്തിന് പിന്നില് പ്രവര്ത്തിച്ചവരെ കണ്ടെത്തുന്നതിന് വേണ്ടി സമീപത്തുള്ള നിരീക്ഷണ ക്യാമറകള് പൊലീസ് പരിശോധിച്ച് വരികയാണ്. കുറ്റക്കാര്ക്കെതിരെ അടിയന്തര നടപടി സ്വീകരിക്കുമെന്ന് നൂറനാട് സ്റ്റേഷന് ഹൗസ് ഓഫിസര് വി. ബിജു പറഞ്ഞു.
https://www.facebook.com/Malayalivartha