നാട്ടിലിറങ്ങി ആക്രമിച്ച കാട്ടാനയെ വനത്തിലേക്ക് മടക്കി അയയ്ക്കാന്‍ ശ്രമിക്കുന്നതിനിടെ വനപാലകനെ കാട്ടാന കുത്തിവീഴ്ത്തി.... ബിജു തോക്കുപയോഗിച്ച് വെടിശബ്ദം മുഴക്കിയതിനെത്തുടര്‍ന്ന് ആന മുന്നോട്ടോടി, നിമിഷങ്ങള്‍ക്കുള്ളില്‍ വനപാലകര്‍ക്കുനേരേ തിരിഞ്ഞ ആന ബിജുവിനെ കുത്തിവീഴ്ത്തി, ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല, നാട്ടിലിറങ്ങുന്ന വന്യ ജീവികളെ വെടി ശബ്ദം ഉണ്ടാക്കി തുരത്തുന്ന ഫോറസ്റ്റ് വാച്ചറിന്റെ കൊലയില്‍ വിതുമ്പി നാട്ടുകാര്‍
നാട്ടിലിറങ്ങി ഒരാളെ ആക്രമിക്കുകയും ജനത്തെ ഭീതിയിലാഴ്ത്തുകയും ചെയ്ത കാട്ടാനയെ വനത്തിലേക്ക് മടക്കാന്‍ ശ്രമിക്കുന്നതിനിടയില്‍ വനപാലകനെ കാട്ടാന കുത്തിക്കൊന്നു. രാജാമ്പാറ ഫോറസ്റ്റ് സ്റ്റേഷനിലെ ട്രൈബല്‍ വാച്ചര്‍ ളാഹ ആഞ്ഞിലിമൂട്ടില്‍ എ.എസ്.ബിജു(38) ആണ് മരിച്ചത്. ആനയുടെ ആക്രമണത്തില്‍ പരിക്കേറ്റ കടുമീന്‍ചിറ കട്ടിക്കല്ല് കുന്നുംപുറത്ത് കെ.പി.പൗലോസ്(രാജന്‍-62) റാന്നി താലൂക്ക് ആശുപത്രിയില്‍ ചികിത്സയിലാണ്. കാട്ടാന നാട്ടിലിറങ്ങിയതറിഞ്ഞ് ബിജു അടക്കമുള്ള വനപാലകസംഘം ബുധനാഴ്ച രാവിലെ എട്ടുമണിയോടെയാണ് കട്ടിക്കല്ലിലെത്തിയത്.
വനത്തിലേക്ക് ഓടിക്കാന്‍ ശ്രമിക്കുന്നതിനിടയില്‍ ഉച്ചയ്ക്ക് രണ്ടരയോടെയാണ് കാട്ടാന ബിജുവിനെ കുത്തിവീഴ്ത്തിയത്. ബിജുവിനെ റാന്നി താലൂക്കാശുപത്രിയില്‍ എത്തിച്ചപ്പോഴേക്കും മരിച്ചിരുന്നു. രണ്ടാനകള്‍ എത്തിയെന്നാണ് നാട്ടുകാര്‍ പറയുന്നത്. എന്നാല്‍ ഒന്നിനെ മാത്രമാണ് കണ്ടെത്തിയത്. ബുധനാഴ്ച രാവിലെ ഏഴുമണിയോടെയാണ് പൗലോസിനെ കാട്ടാന ആക്രമിച്ചത്. സ്വന്തം റബ്ബര്‍മരങ്ങള്‍ ടാപ്പിങ് നടത്തുന്നതിനിടയിലായിരുന്നു സംഭവം. തുടര്‍ന്ന് റാന്നി റേഞ്ച് ഓഫീസറുടെ നേതൃത്വത്തില്‍ വനപാലകര്‍ സ്ഥലത്തെത്തി. പിന്നീട് ഒന്നരയോടെ മടന്തമണ്‍-ചെമ്പനോലി റോഡില്‍ വാറുചാലില്‍ കത്തോലിക്കാ പള്ളിക്കു സമീപം പാറകള്‍ നിറഞ്ഞ റബ്ബര്‍ത്തോട്ടത്തില്‍ ആനയെ കണ്ടെത്തി.
ബിജു തോക്കുപയോഗിച്ച് വെടിശബ്ദം മുഴക്കിയതിനെത്തുടര്‍ന്ന് ആന മുന്നോട്ടോടി. നിമിഷങ്ങള്‍ക്കുള്ളില്‍ വനപാലകര്‍ക്കുനേരേ ഇത് പാഞ്ഞെത്തുകയായിരുന്നു. ഓടിയെത്തിയ ആന ബിജുവിനെ കുത്തിവീഴ്ത്തി. നെഞ്ചിനു താഴെയായാണ് കുത്തേറ്റത്. ഒപ്പമുണ്ടായിരുന്ന വനപാലകര്‍ ഓടിരക്ഷപ്പെടുകയായിരുന്നു. ആന ഇവിടെനിന്ന് മാറിയപ്പോള്‍ വനപാലകര്‍ ഓടിയെത്തി ബിജുവിനെ താലൂക്ക് ആശുപത്രിയിലേക്ക് കൊണ്ടുപോയി. നാട്ടിലിറങ്ങുന്ന വന്യ ജീവികളെ വെടി ശബ്ദം ഉണ്ടാക്കി തുരത്തുന്ന ഫോറസ്റ്റ് വാച്ചറിന്റെ കൊലയില്‍ വിതുമ്പി നാട്ടുകാര്‍
രാത്രി എട്ടുമണിയോടെ കാട്ടാനയെ തിരികെ കാട്ടിലേക്ക് മടക്കി. കട്ടിക്കല്ലില്‍ റോഡ് മുറിച്ചുകടന്നുപോകുന്നതിനിടയില്‍ ഇതുവഴിയെത്തിയ ബൈക്ക് ആന തുമ്പിക്കൈ കൊണ്ട് തട്ടിവീഴ്ത്തി. ബൈക്കിലുണ്ടായിരുന്ന രണ്ടുപേരും ഓടി രക്ഷപ്പെട്ടു. നദിയിലിറങ്ങിയ ആന അല്പനേരം അവിടെത്തന്നെ നിന്നു. പിന്നീട് കാട്ടിലേക്ക് കയറിപ്പോയി. പന്പാനദിക്ക് മറുകരയിലുള്ള വനത്തില്‍നിന്ന് വെള്ളം കുടിക്കാന്‍ പതിവായി കാട്ടാനകള്‍ ഇവിടെ നദിയിെേലക്കത്താറുണ്ട്.
രാജു ഏബ്രഹാം എം.എല്‍.എ., ജില്ലാ കളക്ടര്‍ പി.ബി.നൂഹ്, സി.സി.എഫ്. വിജയാനന്ദ്, പെരിയാര്‍ ടൈഗര്‍ റിസര്‍വ് ഫോറസ്റ്റ് ഫീല്‍ഡ് ഡയറക്ടര്‍ അനൂപ്, ഡെപ്യൂട്ടി ഡയറക്ടര്‍ സി.കെ.ഹാബി, ഡി.എഫ്.ഒ.മാരായ എസ്.ഉണ്ണിക്കൃഷ്ണന്‍, ശ്യാം മോഹന്‍ലാല്‍ തുടങ്ങിയവര്‍ സ്ഥലത്തെത്തിയിരുന്നു.
https://www.facebook.com/Malayalivartha
