ഇതാണ് മോനെ കേരളം; കോവിഡ് ചികിത്സയില് നിര്ണായകമായ വെന്റിലേറ്ററുകള് ചെലവു കുറഞ്ഞ രീതിയില് നിര്മിക്കാനുള്ള സംവിധാനമൊരുക്കി കേരളത്തില് നിന്നുള്ള സ്റ്റാര്ട്ട് അപ്പ് കമ്പനി; മഹീന്ദ്ര ആന്ഡ് മഹീന്ദ്ര മാതൃകയില് ചെലവുകുറഞ്ഞ പ്രാഥമിക രൂപം തയാറായിട്ടുണ്ട്; അടിയന്തര ഘട്ടമുണ്ടായാല് ഇത്തരത്തില് ആയിരക്കണക്കിന് വെന്റിലേറ്ററുകള് നിര്മിച്ചെടുക്കാം
കോവിഡ്-19 ബാധയെ തുടര്ന്ന് ഗുരുതരാവസ്ഥയിലുള്ള ഒരു രോഗിയുടെ ജീവന് നിലനിര്ത്തുന്നതിന് ശ്വസന സഹായികളായ വെന്റിലേറ്റര് അത്യാവശ്യമാണ്. രോഗം അതിരൂക്ഷമായി ബാധിച്ച വിദേശ രാജ്യങ്ങളിലും മരണനിരക്ക് കൂടുന്നതിന്റെ ഒരു പ്രധാന കാരണവും വെന്റിലേറ്ററുകളുടെ ദൗര്ലഭ്യമാണ്. അതിനാല്, രോഗത്തെ ശക്തമായി പ്രതിരോധിക്കുന്ന ഇന്ത്യയിലും ആ രാജ്യങ്ങളുടെ ദുരനുഭവങ്ങള് കണ്ട് മുന്നൊരുക്കങ്ങള് പുരോഗമിക്കുകയാണ്. അതിനിടെയാണ്, കോവിഡ് ചികിത്സയില് നിര്ണായകമായ വെന്റിലേറ്ററുകള് ചെലവു കുറഞ്ഞ രീതിയില് നിര്മിക്കാനുള്ള സംവിധാനമൊരുക്കി കേരളത്തില് നിന്നുള്ള സ്റ്റാര്ട്ട് അപ്പ് കമ്പനി രംഗത്തെത്തിയിരിക്കുന്നത്.
കേരള സ്റ്റാര്ട്ടപ് മിഷനു കീഴില് കൊച്ചിയിലുള്ള സൂപ്പര് ഫാബ്ലാബാണ്, കോവിഡ് പ്രതിരോധത്തിനായി ചെലവുകുറഞ്ഞ വെന്റിലേറ്ററുകള് നിര്മിക്കാന് സജ്ജമായി മുന്നോട്ടുവന്നത്. മഹീന്ദ്ര ആന്ഡ് മഹീന്ദ്ര മാതൃകയില് ചെലവുകുറഞ്ഞ പ്രാഥമിക രൂപം തയാറായിട്ടുണ്ട്. അടിയന്തര ഘട്ടമുണ്ടായാല് ഇത്തരത്തില് ആയിരക്കണക്കിന് വെന്റിലേറ്ററുകള് നിര്മിച്ചെടുക്കാം. ഇക്കാരണത്താലാണ് ഫാബ്ലാബുകളെ സര്ക്കാര് അവശ്യസര്വീസായി പ്രഖ്യാപിച്ചത്. ആരോഗ്യപ്രവര്ത്തകന്റെ സഹായത്തോടെ, കൈകൊണ്ട് വായു, പമ്പ് ചെയ്തു നല്കുന്ന ബാഗ് വാല്വ് മാസ്ക് )െ മാതൃക ഫാബ്ലാബ്സ് ഓട്ടമേറ്റ് ചെയ്തു. ചുരുക്കത്തില് മറ്റൊരു വ്യക്തിയുടെ സഹായമില്ലാതെ ഇതിലൂടെ ശ്വാസം നല്കാനാവും. മഹീന്ദ്രയും സമാനമായ സംവിധാനമാണ് തയാറാക്കുന്നത്. 7,500 രൂപയ്ക്കാണ് മഹീന്ദ്ര വെന്റിലേറ്റര് ഒരുക്കുന്നത്. 5 മുതല് 10 ലക്ഷം രൂപവരെയാണ് ആധുനിക സൗകര്യമുള്ള വെന്റിലേറ്ററുകളുടെ വില.
വെന്റിലേറ്ററുകള്ക്കു പുറമേ അടിയന്തരഘട്ടങ്ങളില് മെഡിക്കല് ഉപകരണങ്ങളുടെ ഭാഗങ്ങള് ആവശ്യമെങ്കില് ത്രീഡി പ്രിന്റ് ചെയ്തെടുക്കാനും ഫാബ്ലാബിന് പദ്ധതിയുണ്ട്. എന്95 മാസ്ക് അടക്കമുള്ള ജീവന് രക്ഷാ ഉപകരണങ്ങള് നിര്മിക്കുന്നതിന് വിഎസ്എസ്സിയുടെ സഹകരണം തേടുമെന്ന് മുഖ്യമന്ത്രി പിണറായി വിജയന് ശനിയാഴ്ച അറിയിച്ചിരുന്നു. ഉപകരണങ്ങള് വ്യാവസായിക അടിസ്ഥാനത്തില് നിര്മിക്കാന് കഞ്ചിക്കോട്ട് പ്രത്യേക വ്യവസായ ക്ലസ്റ്ററും തുടങ്ങുമെന്നും അധികൃതര് വ്യക്തമാക്കിയിട്ടുണ്ട്.
അതേസമയം, കൊറോണ വ്യാപനം തടയാനുള്ള പോരാട്ടത്തില് പ്രതിരോധ ഗവേഷണ വികസന സ്ഥാപനം ഡിആര്ഡിഒയും രംഗത്തുണ്ട്. അത്യാധുനിക ക്രിട്ടിക്കല് കെയര് വെന്റിലേറ്റര്, കൊറോണ രോഗികളെ പരിചരിക്കുന്നവര് ധരിക്കേണ്ട സ്യൂട്ട് എന്നിവ സ്വന്തം നിലയ്ക്ക് വികസിപ്പിച്ചിരിക്കുകയാണ് ഡിആര്ഡിഒ. മാര്ച്ച് ആദ്യവാരത്തില് തന്നെ സര്ക്കാരില് നിന്നും കൊവിഡ് പ്രതിരോധത്തിനായുള്ള മുന്നൊരുക്കങ്ങള് നടത്താന് നിര്ദേശങ്ങള് ലഭിച്ചിരുന്നതായി ഡിആര്ഡിഒ അധികൃതര് വ്യക്തമാക്കി. ഇതിന്റെ അടിസ്ഥാനത്തില് സാനിറ്റൈസര്, മാസ്കുകള് എന്നിവ ഉള്പ്പെടെ ഡിആര്ഡിഒ വിതരണത്തിനായി സജ്ജമാക്കി്. നിര്മ്മാണത്തിലിരിക്കുന്ന വെന്റിലേറ്റര് ഡിആര്ഡിഒ തന്നെ സാങ്കേതിക വിദ്യയില് വികസിപ്പിച്ചെടുത്തതാണ്. ഒന്നിലധികം രോഗികളെ ഒരേസമയം ചികിത്സിക്കാനാകും എന്നതാണ് ഇതിന്റെ പ്രത്യകത. ഒരാഴ്ചക്കുള്ളില് തന്നെ ഇത് വിതരണത്തിനായി സജ്ജമാകുമെന്നും ഡിആര്ഡിഒ അധികൃതര് വ്യക്തമാക്കി.
https://www.facebook.com/Malayalivartha