കൊറോണ വൈറസിനെ പ്രതിരോധിക്കാന്‍ സുപ്രീം കോടതിയിലെ ഗസ്റ്റഡ് റാങ്കിലുള്ള ഉദ്യോഗസ്ഥര്‍ പ്രധാനമന്ത്രിയുടെ ദുരിതാശ്വാസ നിധിയിലേക്ക് നല്‍കുന്നത് മൂന്നു ദിവസത്തെ ശമ്പളം മാത്രം.

കേരളം ഒരു മാസത്തെ ശമ്പളം നിര്‍ബന്ധമായി പിരിക്കാന്‍ തീരുമാനിച്ചപ്പോഴാണ് സുപ്രീം കോടതിയുടെ ഉത്തരവ് ചര്‍ച്ച ചെയ്യപ്പെടുന്നത്.

ഗസറ്റഡ് റാങ്കിലല്ലാത്ത ഉദ്യോഗസ്ഥര്‍ രണ്ടു ദിവസത്തെ ശമ്പളവും ഗ്രൂപ്പ് സി ഉദ്യോഗസ്ഥര്‍ ഒരു ദിവസത്തെ ശമ്പളവും നല്‍കണമെന്നാണ് സുപ്രീം കോടതി രജിസ്ട്രി മാര്‍ച്ച് 29 ന് പുറത്തിറക്കിയ ഉത്തരവില്‍ പറയുന്നത്. . സംഭാവന നല്‍കാന്‍ താത്പര്യമില്ലാത്ത ഉദ്യോഗസ്ഥര്‍ മാര്‍ച്ച് 31 ന് മുമ്പ് അറിയിക്കണമെന്നും ഉത്തരവില്‍ പറയുന്നു. സംഭാവന നല്‍കുന്നത് ഉദ്യോസ്ഥരുടെ താത്പര്യപ്രകാരം മാത്രമാണെന്നും സുപ്രീം കോടതിയുടെ ഉത്തരവിലുണ്ട്.

മുഖ്യമന്ത്രിയും മറ്റും നിരന്തരം ആവര്‍ത്തിക്കുന്ന തെലുങ്കാനയില്‍ മുഖ്യമന്ത്രിയും മന്ത്രിമാരും ശമ്പളത്തിന്റെ 75 ശതമാനം മാത്രം നല്‍കണമെന്നാണ് മാര്‍ച്ച് 30 ന് പുറത്തിറങ്ങിയ സര്‍ക്കാര്‍ ഉത്തരവില്‍ പറയുന്നത്. ഐ. എ എസ് തലത്തിലുള്ള ഉദ്യോഗസ്ഥര്‍ ശമ്പളത്തിന്റെ 60 ശതമാനം നല്‍കണം. സാധാരണ സര്‍ക്കാര്‍ ഉദ്യോഗസ്ഥര്‍ ശമ്പളത്തിന്റെ 50 ശതമാനം നല്‍കണമെന്നാണ് ഉത്തരവില്‍ പറയുന്നത്. ക്ലാസ് 4 വിഭാഗത്തിലുള്ള ഉദ്യോഗസ്ഥര്‍ പത്ത് ശതമാനം മാത്രം നല്‍കണം.

ഉദ്യോഗസ്ഥര്‍ ഒരു മാസത്തെ ശമ്പളം മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കണമെന്നാണ് കേരളം തീരുമാനിച്ചിരിക്കുന്നത്. ഇതില്‍ കൊറോണ കാലത്ത് ജോലി ചെയ്യുന്നവരും അല്ലാത്തവരുമായ എല്ലാ ഉദ്യോഗസ്ഥരെയും ഉള്‍പ്പെടുത്തിയിട്ടുണ്ട്. അത് നല്‍കാന്‍ ഉദ്യോഗസ്ഥര്‍ തയ്യാറാകാതിരുന്നാല്‍ തെലുങ്കാന മോഡലില്‍ ഉത്തരവ് ഇറക്കാമെന്നാണ് സര്‍ക്കാര്‍ തീരുമാനിച്ചിരിക്കുന്നത്. സംഭാവന കൃത്യമായി നല്‍കിയില്ലെങ്കില്‍ പിടിച്ചെടുക്കാനാണ് സര്‍ക്കാര്‍ തീരുമാനം.

എന്നാല്‍ സംസ്ഥാനത്തെ ഉദ്യോഗസ്ഥരെ സര്‍ക്കാരിന് വേണ്ടത്ര വിശ്വാസമില്ല. പ്രളയത്തില്‍ പിരിക്കാന്‍ തീരുമാനിച്ചപ്പോള്‍ സുപ്രീം കോടതി വരെ പോയവരാണ് കേരളത്തിലെ ഉദ്യോഗസ്ഥര്‍. പ്രളയത്തിലെ അവസ്ഥ കോവിഡിനും വന്നു ചേരുമോ എന്ന സംശയം സര്‍ക്കാരിനുണ്ട്. മാത്രവുമല്ല പ്രളയത്തിലെ പിരിവ് വ്യാപകമായ അഴിമതിക്കും കാരണമായി. അഴിമതി വാര്‍ത്തകള്‍ പുറത്തുവന്നു കൊണ്ടിരിക്കെയാണ് കൊറോണ വൈറസ് രാജ്യത്തെ കടന്നാക്രമിച്ചത്. കേരളത്തിലും സ്ഥിതി ഗുരുതരമായി.

തെലുങ്കാന സര്‍ക്കാര്‍ ഉത്തരവ് കോടതിയില്‍ ചോദ്യം ചെയ്യപ്പെടാന്‍ സാധ്യതയുണ്ടെന്ന റിപ്പോര്‍ട്ടുകള്‍ സജീവമാണ്. അത്തരമൊരു ഉത്തരവ് കേരളത്തിലും ഇറക്കാനുള്ള ഒരു തടസ്സം കോടതി വ്യവഹാരത്തെ കുറിച്ചുള്ള സംശയങ്ങളാണ്.

സാലറി ചാലഞ്ച് അടിച്ചേല്‍പ്പിക്കരുതെന്നെ ചെന്നിത്തലയുടെ പ്രസ്താവനയോടെ പ്രതിപക്ഷം ഇതുമായി മനസാ സഹകരിക്കില്ലെന്ന് വ്യക്തമായി. ദുരിതാശ്വാസ നിധിക്ക് പ്രത്യേക അക്കൗണ്ട് വേണമെന്നും ചെന്നിത്തല ആവശ്യപ്പെട്ടു.

അതേസമയം നിര്‍ബന്ധിത പിരിവ് സുപ്രീം കോടതിയില്‍ എത്തിയാല്‍ സംഗതി ഗുരുതരമാകും. കാരണം പരമോന്നത കോടതിയിലെ ഉയര്‍ന്ന ഉദ്യോഗസ്ഥര്‍ പ്രധാനമന്ത്രിയുടെ ഫണ്ടിലേക്ക് നല്‍കുന്നത് മൂന്നു ദിവസത്തെ ശമ്പളം മാത്രമാണ് . അതും മനസുണ്ടെങ്കില്‍ മാത്രം.