സ്വകാര്യ ആശുപത്രികള് തുറന്നു പ്രവര്ത്തിക്കണമെന്ന് മന്ത്രി കെ.കെ. ശൈലജ
കോവിഡ് പകരുന്ന സാഹചര്യത്തില് സംസ്ഥാനത്തെ ഒട്ടേറെ ആശുപത്രികള് കോവിഡ് സ്പെഷ്യാലിറ്റി ആശുപത്രികളായി മാറ്റിയിട്ടുണ്ട്. ഇവിടെ സാധാരണ ചികിത്സകള്ക്കായി രോഗികള്ക്കു വരാനുള്ള പ്രയാസം അനുഭവപ്പെടും. അതിനാല് സര്ക്കാര് ആശുപത്രികളോടൊപ്പം സ്വകാര്യ ആശുപത്രികളും തുറന്നു പ്രവര്ത്തിക്കണമെന്ന് ആരോഗ്യമന്ത്രി കെ.കെ.ശൈലജ അറിയിച്ചു. മറ്റെല്ലാ ആശുപത്രികളും തുറന്നു പ്രവര്ത്തിക്കേണ്ടത് അത്യാവശ്യമാണെന്നും അവര് വ്യക്തമാക്കി.
സാധാരണനിലയില് രോഗികള്ക്ക് ആശുപത്രികളില് എത്തിച്ചേരാന് ലോക്ഡൗണ് ആയതിനാല് പ്രയാസമുണ്ടാകും. അങ്ങനെയുള്ള ഘട്ടങ്ങളില് ടെലിഫോണ് മുഖേന രോഗികള്ക്കു ബന്ധപ്പെടാനുള്ള സൗകര്യം ഉണ്ടായിരിക്കണം. ആവശ്യമായ ഘട്ടത്തില് ആരോഗ്യ പ്രവര്ത്തകരും ജനപ്രതിനിധികളും പൊലീസിന്റെ സഹായത്തോടെ രോഗികളെ ആശുപത്രികളിലെത്തിച്ച് ആവശ്യമായ ചികിത്സ നല്കേണ്ടതാണെന്നും മന്ത്രി ആവശ്യപ്പെട്ടു.
സര്ക്കാര് ആശുപത്രികള് മാത്രമല്ല എല്ലാ സ്വകാര്യ ആശുപത്രികളും ചികിത്സ ഉറപ്പു വരുത്തണമെന്നു മുഖ്യമന്ത്രി നിര്ദേശിച്ചിട്ടുണ്ട്. കോവിഡേതര രോഗങ്ങള്ക്കെല്ലാം കൃത്യമായ ചികിത്സ ഉറപ്പു വരുത്തണം. ജീവിതശൈലീ രോഗങ്ങള്, മറ്റു പലതരത്തിലുള്ള രോഗങ്ങള് തുടങ്ങി ഒന്നിനും ചികിത്സ കിട്ടാത്ത അവസ്ഥ പാടില്ല. അവശ്യസര്വീസ് എന്ന നിലയില് സര്ക്കാര്-സ്വകാര്യ ആശുപത്രികളെല്ലാം പ്രവര്ത്തനക്ഷമമാണെന്ന് ഉറപ്പുവരുത്താന് എല്ലാവരും തയാറാകണം.
സ്വകാര്യ ആശുപത്രികളുടെ പ്രവര്ത്തനം ഉറപ്പുവരുത്താന് ഐഎംഎ അടക്കമുള്ള സംഘടനകള് മുന്കയ്യെടുക്കുമെന്ന് അറിയിച്ചിട്ടുണ്ട്. ഈ ആശുപത്രികളെല്ലാം ആരോഗ്യ വകുപ്പിന്റെ മാര്ഗനിര്ദേശങ്ങളനുസരിച്ച് പ്രവര്ത്തിക്കേണ്ടതാണ്. പകര്ച്ചവ്യാധികളുടെ കാലത്ത് പരിശോധനയും ചികിത്സയും നടത്തേണ്ട രീതിയെക്കുറിച്ചുള്ള മാനദണ്ഡങ്ങള് എല്ലാവരും പാലിക്കേണ്ടതാണെന്നും മന്ത്രി വ്യക്തമാക്കി.
https://www.facebook.com/Malayalivartha