ദുര്ഗന്ധമുള്ള ചെളിയില് മുങ്ങിക്കിടക്കുന്നവര്ക്ക് അതുപോലെ മറ്റുള്ളവരും ആയിക്കാണണം; തിപക്ഷത്തിനെതിരെ ആഞ്ഞടിച്ച് മുഖ്യമന്ത്രി
സ്വര്ണക്കടത്തുമായി ബന്ധപ്പെട്ട ആരോപണങ്ങളില് പ്രതിപക്ഷത്തിനെതിരെ ആഞ്ഞടിച്ച് മുഖ്യമന്ത്രി പിണറായി വിജയന്. ദുര്ഗന്ധമുള്ള ചെളിയില് മുങ്ങിക്കിടക്കുന്നവര്ക്ക് അതുപോലെ മറ്റുള്ളവരും ആയിക്കാണണം എന്ന് ആഗ്രഹമുണ്ടാകുമെന്നും മുഖ്യമന്ത്രി പ്രതികരിച്ചു.. സ്വര്ണക്കടത്ത് കേസില് ആരോപണ വിധേയയായ സ്വപ്നയുമായുള്ള ചിത്രം വച്ചുകൊണ്ട് മുഖ്യമന്ത്രി സ്വകാര്യം പറയുന്നുവെന്ന് പ്രചരിപ്പിച്ച പ്രതിപക്ഷ നേതാവിനെയും ബി.ജെ.പി സംസ്ഥാന അദ്ധ്യക്ഷനെയും എന്താണ് ചെയ്യേണ്ടതെന്നും അദ്ദേഹം ചോദിച്ചു.
'എന്താ നിങ്ങള് കരുതിയത്? നിങ്ങളെപ്പോലെയുള്ള മാനസികാവസ്ഥയാണ് എല്ലാവര്ക്കും ഉള്ളത് എന്നാണോ? പല പഴയതും ഓര്മ്മയില് വരുന്നുണ്ടാകുമല്ലേ? അതിനെ, ഇപ്പൊ ഉള്ളവരെ കണ്ടിട്ട് കളിക്കേണ്ട എന്ന് മാത്രമേ എനിക്ക് പറയാനുള്ളൂ. കളങ്കപ്പെടുത്താന് വലിയ ശ്രമമാണ്. വസ്തുതകളുണ്ടെങ്കില് വസ്തുതകള് അവതരിപ്പിക്കാം. പക്ഷെ വസ്തുതകളുമായല്ല മുന്നോട്ട് വരുന്നത്. ഇതിനെ സോളാറിനോട് താരതമ്യപ്പെടുത്താനാണ് ചിലര് നോക്കുന്നത്.' എന്നും മുഖ്യമന്ത്രി പറഞ്ഞു.
സോളാര് കേസിന്റെ കാലത്തെക്കുറിച്ച് നാം കൂടുതലായി പരിശോധിക്കാന് പുറപ്പെടണോയെന്നും തിരഞ്ഞെടുപ്പ് ലക്ഷ്യം വച്ചുകൊണ്ടുള്ള നീക്കങ്ങളാണ് ഇപ്പോള് നടക്കുന്നതെന്നും മുഖ്യമന്ത്രി പറഞ്ഞു. ഇടതുപക്ഷ ജനാധിപത്യ മുന്നണിയുടെ സംസ്കാരം യു.ഡി.എഫിന്റേതല്ല. തത്ക്കാലം പ്രതിപക്ഷത്തിന്റെ 'അത്യാഗ്രഹം' സാധിച്ചുതരാന് കഴിയില്ല. കാരണം തങ്ങള് അത്തരത്തിലുള്ള 'കളരിയിലല്ല' പഠിച്ചുവളര്ന്നത്. അതിനായി കാത്തിരിക്കുന്നവരോട് ഇതാണ് തനിക്ക് പറയാനുള്ളതെന്നും മുഖ്യമന്ത്രി പറഞ്ഞു.
https://www.facebook.com/Malayalivartha