സ്വര്‍ണക്കടത്ത് കേസില്‍ എം.ശിവശങ്കറിന്റെ പങ്ക് സംബന്ധിച്ച് ശക്തമായ തെളുവുകള്‍ കസ്റ്റംസിന് ലഭിച്ചതായി സൂചന. ഇതിന്റെ അടിസ്ഥാനത്തില്‍ ഉടന്‍ തന്നെ ശിവശങ്കറിനെ കസ്റ്റംസ് അന്വേഷണ സംഘം ചോദ്യം ചെയ്യുമെന്നാണ് പുറത്തു വരുന്ന വിവരം. കഴിഞ്ഞ ദിവസം സ്വര്‍ണക്കടത്തുകേസിലെ പ്രതികളുടെ വീടുകളിലും എം. ശിവശങ്കറിന്റെ ഫഌറ്റിലും കസ്റ്റംസ് അധികൃതര്‍ നടത്തിയ റെയ്ഡില്‍ സ്വര്‍ണം കടത്താനുപയോഗിച്ചതെന്ന് കരുതുന്ന ആറുബാഗുകള്‍ കണ്ടെത്തിയിരുന്നു. മൂന്നെണ്ണത്തില്‍ ഡിപ്ലോമാറ്റിക് സ്റ്റിക്കര്‍ അടര്‍ത്തിമാറ്റിയെന്നുതോന്നിക്കുന്ന ഭാഗമുണ്ട്. രണ്ടെണ്ണത്തില്‍ ഇത് പൂര്‍ണമായും പൊളിച്ചുമാറ്റിയിട്ടുണ്ട്. പുതിയ ബാഗുകളായതിനാല്‍ പശ ഒട്ടിയനിലയില്‍ത്തന്നെയാണ്. ഇത് ഫൊറന്‍സിക് പരിശോധനയ്ക്ക് അയക്കുമെന്ന് കസ്റ്റംസിലെ ഉന്നതകേന്ദ്രങ്ങള്‍ പറഞ്ഞു.

സെക്രട്ടേറിയറ്റ് കന്റോണ്‍മെന്റ് ഗേറ്റിന് സമീപമുള്ള ഹെദര്‍ ടവറിലെ ശിവശങ്കറിന്റെ സ്വകാര്യഫഌറ്റായ എഫ്6 എഫില്‍നിന്ന് ഇതേതരത്തിലുള്ള ഒരു ബാഗ് ലഭിച്ചു. എന്നാലിത് സ്വര്‍ണക്കടത്തുകാര്‍ ഉപയോഗിച്ചതാണോ എന്ന് വ്യക്തമായിട്ടില്ല. സന്ദീപ് നായരുടെയും സരിത്തിന്റെയും വീടുകളില്‍നിന്നാണ് മറ്റുബാഗുകള്‍ കിട്ടിയത്. സി.സി.ടി.വി. ക്യാമറയില്‍ക്കണ്ട ബാഗുകള്‍ ഇതുതന്നെയാണോ എന്ന് ശാസ്ത്രീയമായി ഉറപ്പിക്കേണ്ടതുണ്ട്.

ശിവശങ്കറിന്റെ ഫഌറ്റിലെത്തിയ കസ്റ്റംസ് ഉദ്യോഗസ്ഥര്‍ സന്ദര്‍ശകരജിസ്റ്ററും ക്യാമറാദൃശ്യങ്ങളും ശേഖരിച്ചു. ഇന്നലെ ഫഌറ്റിലെ കെയര്‍ടേക്കറെ മൊഴിയെടുക്കുകയും ചെയ്തിരുന്നു. ജൂലായ് ആറിന് വൈകീട്ടാണ് ശിവശങ്കര്‍ അവസാനമായി ഫഌറ്റില്‍ എത്തിയതെന്ന് സുരക്ഷാജീവനക്കാരന്‍ പ്രഭാകരന്‍ പറഞ്ഞു. രാത്രി ഏറെ വൈകിയാണ് മിക്കപ്പോഴും അദ്ദേഹം ഫഌറ്റില്‍ എത്തിയിരുന്നത്. രാത്രി ഒരുമണിക്ക് വരുകയും രാവിലെ പോകുകയുംചെയ്യും. സ്വപ്‌നയുള്‍പ്പെടെ സ്വര്‍ണക്കടത്തിലെ പ്രതികള്‍ അദ്ദേഹത്തിനൊപ്പം വന്നതായി കണ്ടിട്ടില്ലെന്നും ഇയാള്‍ പറഞ്ഞു. ഇതിന്റെ എല്ലാം അടിസ്ഥാനത്തിലാണ് കസ്റ്റംസ് ഉദ്യോഗസ്ഥര്‍ ശിവശങ്കറിനെ ചോദ്യം ചെയ്യാന്‍ ഒരുങ്ങതെന്നാണ് വിവരം.

ശിവശങ്കറിനെ ചോദ്യം ചെയ്യുമ്പോള്‍ സര്‍ക്കാരും പ്രതികൂട്ടിലാകുകയാണ്. മുഖ്യമന്ത്രിയുടെ പ്രിന്‍സിപ്പള്‍ സെക്രട്ടറിയായിരുന്ന ഇദ്ദേഹം മുഖ്യമന്ത്രിയുടെ ഓഫീസ് ദുരുപയോഗം ചെയ്തുവെന്ന ആരോപണത്തിന് ശക്തി പകരുന്നതാണ് പുതിയ നീക്കം. ഇതോടെ മുഖ്യമന്ത്രി എന്തിന് ഈ ഉദ്യോഗസ്ഥനെ സംരക്ഷിച്ചുവെന്നതിനും വ്യക്തമായ മറുപടി സര്‍ക്കാര്‍ നല്‍കേണ്ടി വരും.