ഓണത്തിനു മുന്‍പ് കണ്ണൂരിലെ എല്ലാ പഞ്ചായത്തുകളിലും 20 രൂപയ്ക്ക് ഉച്ചയൂണ്‍ ലഭിക്കുന്ന കുടുംബശ്രീ ഹോട്ടലുകള്‍ തുടങ്ങും. ഇതിനകം 30 സ്ഥലങ്ങളില്‍ ഹോട്ടലുകള്‍ തുടങ്ങി. സംസ്ഥാന സര്‍ക്കാര്‍ കുടുംബശ്രീ വഴി ജനകീയ ഹോട്ടലുകള്‍ തുടങ്ങാന്‍ തീരുമാനിച്ചത് വിശപ്പ് രഹിത കേരളം എന്ന ലക്ഷ്യവുമായാണ്.

പഞ്ചായത്തിലും നഗരസഭകളിലും ഒന്നു വീതവും വലിയ നഗരസഭകളില്‍ 10 വാര്‍ഡുകള്‍ക്ക് ഒന്നെന്ന തോതിലുമാണ് പദ്ധതി. ദിവസം 200 പേര്‍ക്കുള്ള ഭക്ഷണമെങ്കിലും ചെലവായാല്‍ മാത്രമേ സംരംഭം പിടിച്ചു നിര്‍ത്താന്‍ കഴിയുകയുള്ളുവെന്നാണു വിലയിരുത്തല്‍. ഊണിനു 30 രൂപ കുടുംബശ്രീക്കു ലഭിക്കും. 10 രൂപ സര്‍ക്കാര്‍ സബ്‌സിഡി നല്‍കും. കഴിഞ്ഞ ബജറ്റില്‍ ഇതു സംബന്ധിച്ച പ്രഖ്യാപനം ഉള്‍പ്പെടുത്തിയിരുന്നു.

ജില്ലയില്‍ മാലൂര്‍, കൊളച്ചേരി, പിണറായി, മുഴക്കുന്ന്, ചപ്പാരപ്പടവ്, ഇരിട്ടി, ധര്‍മടം, പെരളശ്ശേരി, കടന്നപ്പള്ളി-പാണപ്പുഴ, ആന്തൂര്‍, ചെറുതാഴം, പേരാവൂര്‍, കല്യാശ്ശേരി, പന്ന്യന്നൂര്‍, കണ്ണപുരം, ശ്രീകണ്ഠപുരം, തലശ്ശേരി, ചൊക്ലി, ഉദയഗിരി, കരിവെള്ളൂര്‍-പെരളം, മുഴപ്പിലങ്ങാട്, നാറാത്ത്, പയ്യന്നൂര്‍, കാങ്കോല്‍-ആലപ്പടമ്പ്, നടുവില്‍, കൂത്തുപറമ്പ്, കുറ്റിയാട്ടൂര്‍, കതിരൂര്‍, പാനൂര്‍, മുഴക്കുന്ന് എന്നിവിടങ്ങളിലാണ് കുടുംബശ്രീ ഹോട്ടലുകള്‍ തുടങ്ങുന്നത്.

സാധാരണക്കാരായ ജനങ്ങള്‍ക്കു ന്യായമായ നിരക്കില്‍ ഭക്ഷണത്തിന് ആശ്രയിക്കാവുന്ന സ്ഥിരം സംവിധാനമാണിതെന്നും സര്‍ക്കാരിന്റെ മികച്ച സംരംഭങ്ങളില്‍ ഒന്നായതിനാല്‍ ഇത് കൂടുതല്‍ ജനകീയമാകും എന്നുറപ്പുണ്ടെന്നും കുടുംബശ്രീയുടെ ജില്ലാ മിഷന്‍ കോ ഓര്‍ഡിനേറ്റര്‍ ഡോ.എം.സുര്‍ജിത്ത് പറഞ്ഞു.

കൂത്തുപറമ്പിലെ ജനകീയ ഹോട്ടലില്‍ ദിവസവും 175- മുതല്‍ 220 ഊണ്‍ വരെ പോകുന്നുണ്ട്. ആവശ്യക്കാര്‍ക്കു മിതമായ നിരക്കില്‍ സ്‌പെഷലും നല്‍കുന്നുണ്ട്. ജനങ്ങളില്‍ നിന്നു നല്ല പ്രതികരണവും സഹകരണവുമാണ്. നേരത്തേ സമൂഹ അടുക്കള നടത്തിയിരുന്നതും ഞങ്ങളുടെ സ്വരലയ കുടുംബശ്രീ യൂണിറ്റ് തന്നെയാണ്. 8 പേര്‍ ചേര്‍ന്നുള്ള സംഘമാണിത്. കെ.പി.രജില (സെക്രട്ടറി, സ്വരലയ കുടുംബശ്രീ കൂത്തുപറമ്പ്) വ്യക്തമാക്കി.