കരിപ്പൂര് വിമാന ദുരന്തം: പ്രമുഖ നേതാക്കള് ദുഃഖവും നടുക്കവും രേഖപ്പെടുത്തി, ദുരന്തനിവാരണ സംഘം ഡല്ഹിയില്നിന്നും മുംബൈയില്നിന്നും പുറപ്പെട്ടിട്ടുണ്ടെന്ന് വ്യോമയാനമന്ത്രി
പ്രമുഖ നേതാക്കള് കരിപ്പൂര് വിമാന ദുരന്തത്തില് ദുഃഖവും നടുക്കവും രേഖപ്പെടുത്തി . കോഴിക്കോട് വിമാനത്താവളത്തില് ഉണ്ടായ വിമാനാപകടത്തില് അതീവ ദുഃഖം രേഖപ്പെടുത്തുന്നതായും സംഭവത്തെ കുറിച്ച് ഗവര്ണര് ആരിഫ് മുഹമ്മദ് ഖാനുമായി സംസാരിച്ചെന്നും രാഷ്ട്രപതി റാം നാഥ് കോവിന്ദ് അറിയിച്ചു.
അപകടത്തില് മരിച്ചവരുടെ കുടുംബാംഗങ്ങളുടെ ദുഃഖത്തില് പങ്കുചേരുന്നതായി അറിയിച്ച പ്രധാനമന്ത്രി പരുക്കേറ്റവര് എത്രയും പെട്ടെന്ന് സുഖം പ്രാപിക്കട്ടെ എന്നാശംസിച്ചു. നിലവിലെ സാഹചര്യത്തെ കുറിച്ച് മുഖ്യമന്ത്രി പിണറായി വിജയനുമായി ചര്ച്ച നടത്തി. ദുരിതബാധിതര്ക്ക് എല്ലാ സഹായങ്ങളും നല്കിക്കൊണ്ട് അധികൃതര് സ്ഥലത്തുണ്ട്.
അപകടത്തില് മരിച്ചവരുടെ കുടുംബാംഗങ്ങളോട് ഉപരാഷ്ട്രപതി വെങ്കയ്യ നായിഡുവും അനുശോചനം രേഖപ്പെടുത്തി. പരുക്കേറ്റവര് എത്രയും പെട്ടെന്ന് സുഖം പ്രാപിക്കട്ടെയെന്നു പ്രാര്ഥിക്കുന്നതായും അദ്ദേഹം വ്യക്തമാക്കി.
വ്യോമയാനമന്ത്രി ഹര്ദീപ് സിങ് പുരി കോഴിക്കോട് വിമാനാപകടത്തില് അനുശോചനം രേഖപ്പെടുത്തി. സര്ക്കാരുമായി നിരന്തരം ബന്ധപ്പെടുകയാണെന്ന് അദ്ദേഹം പറഞ്ഞു. എയര് ഇന്ത്യ, എയര്പോര്ട്ട് അതോറിറ്റി ഓഫ് ഇന്ത്യ എന്നിവയുടെ ദുരന്തനിവാരണ സംഘം ഡല്ഹിയില്നിന്നും മുംബൈയില്നിന്നും പുറപ്പെട്ടിട്ടുണ്ട്.
യാത്രക്കാരെ സഹായിക്കാന് എല്ലാ സംവിധാനങ്ങളും ഒരുക്കിയതായും മന്ത്രി പറഞ്ഞു. സംഭവത്തെക്കുറിച്ച് എയര് ആക്സിഡന്റ്സ് ഇന്വെസ്റ്റിഗേഷന് ബ്രാഞ്ചിനോട് (എഎഐബി) അന്വേഷണത്തിന് ഉത്തരവിട്ടതായും അദ്ദേഹം പറഞ്ഞു.
അപകടത്തില് മരിച്ചവരുടെ കുടുംബാംഗങ്ങള്ക്ക് അനുശോചനം രേഖപ്പെടുത്തുന്നതായി കോണ്ഗ്രസ് നേതാവ് രാഹുല് ഗാന്ധി ട്വീറ്റ് ചെയ്തു. കോഴിക്കോട് ഉണ്ടായ അപകടത്തിന്റെ നടുക്കത്തിലാണ് താനെന്നും പരുക്കേറ്റവര് വേഗം സുഖം പ്രാപിക്കാന് പ്രാര്ഥിക്കുന്നതായും അദ്ദേഹം അറിയിച്ചു.
പ്രതിപക്ഷ നേതാവ് രമേശ് ചെന്നിത്തല കരിപ്പൂരില് ഉണ്ടായ വിമാനാപകടത്തില് അഗാധമായ ദുഃഖവും നടുക്കവും രേഖപ്പെടുത്തി. മൂന്നാറില് മണ്ണിടിഞ്ഞ് വീണ് നിരവധി പേര് മരിച്ചതിന്റെ ഞെട്ടല് മാറും മുമ്പാണ് കേരളത്തെ നടുക്കിയ ഈ ദുരന്തവും ഉണ്ടായത്. കരിപ്പൂര് ദുരന്തത്തെക്കുറിച്ച് ഉന്നതതല അന്വേഷണം നടത്തണമെന്നും പ്രതിപക്ഷ നേതാവ് ആവശ്യപ്പെട്ടു.
കോഴിക്കോട് വിമാനത്താവളത്തിലുണ്ടായ അപ്രതീക്ഷിത അപകടത്തില് ആഴത്തില് നടുക്കം രേഖപ്പെടുത്തുന്നതായി സിപിഎം ദേശീയ ജനറല് സെക്രട്ടറി സീതാറാം യച്ചൂരി പറഞ്ഞു. മുഖ്യമന്ത്രി പിണറായി വിജയന്റെ ട്വീറ്റ് റീട്വീറ്റ് ചെയ്ത അദ്ദേഹം മരിച്ചവരുടെ ബന്ധുക്കളോടുള്ള അനുശോചനവും അറിയിച്ചു.
ലാന്ഡിങ്ങിനിടെ തകര്ന്ന വിമാനത്തില് ഉണ്ടായിരുന്നവരുടെ സുരക്ഷയ്ക്കായി പ്രാര്ഥിക്കുന്നുവെന്ന് ക്രിക്കറ്റ് ഇതിഹാസം സച്ചിന് തെന്ഡുല്ക്കര് ട്വീറ്റ് ചെയ്തു. മരിച്ചവരുടെ പ്രിയപ്പെട്ടവരോട് അദ്ദേഹം അനുശോചനം അറിയിച്ചു.
കേരളത്തില് ഒരു ദിവസം രണ്ട് വലിയ അപകടങ്ങളാണുണ്ടായത്. ഇടുക്കിയിലെ രാജമല സംഭവത്തിന്റെ നടുക്കം മാറും മുമ്പാണ് രാജ്യത്തെ ഞെട്ടിച്ച കരിപ്പൂര് ദുരന്തം ഉണ്ടായത്. വിമാനാപകടത്തില് ബിജെപി സംസ്ഥാന പ്രസിഡന്റ് കെ.സുരേന്ദ്രന് ദുഃഖവും നടുക്കവും രേഖപ്പെടുത്തി. മരിച്ചവരുടെ കുടുംബാംഗങ്ങളുടെ ദുഃഖത്തില് പങ്കു ചേരുന്നതായും സുരേന്ദ്രന് പറഞ്ഞു.
https://www.facebook.com/Malayalivartha
