സി.ബി.ഐ ചുമത്തിയ കുറ്റങ്ങള്‍ ഒറ്റക്കാഴ്ചയില്‍ നിലനില്‍ക്കുന്നതല്ല; മുഖ്യമന്ത്രി
ലൈഫ് മിഷന്‍ ഇടപാടുമായി ബന്ധപ്പെട്ട സി.ബി.ഐ അന്വേഷണം തുടരട്ടെ എന്ന കേരള ഹൈക്കോടതിയുടെ പരാമര്‍ശത്തിന്റെ പശ്ചാത്തലത്തില്‍ വിഷയത്തില്‍ പ്രതികരണവുമായി മുഖ്യമന്ത്രി പിണറായി വിജയന്‍. നിയമപരമായ സഹായം തേടുമ്ബോള്‍ എതിര്‍പ്പുയര്‍ത്തുന്നത് പരിഹാസ്യമാണെന്നും സര്‍ക്കാര്‍ ഹര്‍ജിയില്‍ കോടതി തീരുമാനമെടുക്കട്ടെ എന്നും മുഖ്യമന്ത്രി പ്രതികരിച്ചു. ലൈഫ് മിഷന്‍ കേസുമായി ബന്ധപ്പെട്ടുള്ള സി.ബി.ഐയുടെ എഫ്.ഐ.ആര് നിലനില്‍ക്കുന്നതല്ലെന്നും മുഖ്യമന്ത്രി പറയുന്നു.
സി.ബി.ഐ ചുമത്തിയ കുറ്റങ്ങള്‍ ഒറ്റക്കാഴ്ചയില്‍ നിലനില്‍ക്കുന്നതല്ല. ലൈഫ് മിഷനുമായി ബന്ധപ്പെട്ട് സര്‍ക്കാര്‍ ഒരു സഹായവും വിദേശത്തുനിന്നും സ്വീകരിച്ചിട്ടില്ല. കോടതിയില്‍ പോയത് തെറ്റായ നടപടിയല്ല. കോടതിയുടെ വാക്കാലുള്ള പരാമര്‍ശം തിരിച്ചടി എന്ന രീതിയില്‍ വ്യാഖ്യാനിക്കരുത്. എഫ്.സി.ആര്.എ ആക്‌ട് 2010ന്റെ ലംഘനം വടക്കാഞ്ചേരിയിലെ ലൈഫ് മിഷന്‍ നിര്‍മാണ പദ്ധതിയില്‍ ഉണ്ടായിട്ടില്ല. ലൈഫ് മിഷന്‍ ഒരു വിദേശസംഭാവനയും സ്വീകരിച്ചിട്ടുമില്ല. വടക്കാഞ്ചേരിയില്‍ ലൈഫ് മിഷന്‍ പദ്ധതിയുമായി ബന്ധപ്പെട്ട് 140 ഫ്ലാറ്റിന്റെയും ഒരു ഹെല്‍ത്ത് സെന്ററിന്റെയും നിര്‍മാണവുമായി ബന്ധപ്പെട്ട കരാര്‍ യു.എ.ഇ കോണ്‍സുലേറ്റും യൂണിടാക് ബില്‍ഡേഴ്സുമായി തമ്മിലുള്ളതാണ്. ലൈഫ് മിഷന്‍ ഒരു തുകയും വിദേശസംഭാവനയായി സ്വീകരിച്ചിട്ടില്ല. കരാര്‍ പ്രകാരം കൈമാറ്റം ചെയ്യപ്പെടുന്ന തുക ഇതിന്‍റെ പരിധിയില്‍ വരില്ല എന്നാണ് കിട്ടിയ നിയമോപദേശം. ഇതുകൊണ്ടുതന്നെ, സി.ബി.ഐ നല്‍കിയ എഫ്.ഐ.ആറിന് എതിരായാണ് സംസ്ഥാന സര്‍ക്കാര്‍ കോടതിയില്‍ പോയത്.' എന്നും മുഖ്യമന്ത്രി പ്രതികരിച്ചു.
https://www.facebook.com/Malayalivartha
