തിരുവനന്തപുരം നയതന്ത്ര ചാനല്‍ വഴിയുള്ള സ്വര്‍ണക്കടത്ത് കേസ് അന്വേഷണവുമായി ബന്ധപ്പെട്ട് സെക്രട്ടേറിയറ്റിലെ സിസിടിവി ദൃശ്യങ്ങള്‍ കൈമാറാന്‍ നടപടിയുമായി സര്‍ക്കാര്‍. 2019 ജൂലെ 1 മുതല്‍ 2020 ജൂലൈ 12 വരെയുള്ള ദൃശ്യങ്ങള്‍ അന്വേഷണ ഏജന്‍സിക്ക് കൈമാറാനാണ് തീരുമാനം. ഇതിനായി ഹാര്‍ഡ് ഡിസ്‌ക്കും അനുബന്ധ ഉപകരണങ്ങളും വാങ്ങാന്‍ ടെണ്ടര്‍ വിളിക്കാനും തീരുമാനിച്ചു. 400 ടെറാബൈറ്റ് ഹാര്‍ഡ് ഡിസ്‌ക്കിനും അനുബന്ധ ഉപകരണങ്ങള്‍ക്കുമായാണ് ടെണ്ടര്‍ വിളിക്കുന്നത്. സ്വര്‍ണക്കടത്ത് കേസ് അന്വേഷണത്തിന്റെ ഭാഗമായി കേസുമായി ബന്ധപ്പെട്ട് കഴിഞ്ഞ വര്‍ഷം ജൂണ്‍ ഒന്നു മുതല്‍ 2020 ജൂലൈ 10വരെയുള്ള ദൃശ്യങ്ങളാണ് എന്‍ഐഎ ആവശ്യപ്പെട്ടിരുന്നത്. എന്നാല്‍ ഒരു വര്‍ഷത്തെ ദൃശ്യങ്ങള്‍ പകര്‍ത്തി നല്‍കുന്നതില്‍ സാങ്കേതിക പ്രശ്‌നങ്ങള്‍ ഉണ്ടെന്നായിരുന്നു പൊതുഭരണ വകുപ്പിന്റെ നിലപാട്.ദൃശ്യങ്ങള്‍ പകര്‍ത്തി നല്‍കാന്‍ 400 ടെറാബൈറ്റ് ഹാര്‍ഡ് ഡിസ്‌ക്ക് അടക്കമുള്ള സംവിധാനങ്ങള്‍ വേണം.