മുഖ്യമന്ത്രി പിണറായി വിജയന്‍ ഇന്ന് 3.30-ന്, എല്ലാ ഗ്രാമീണ വീടുകളിലും ശുദ്ധജല കണക്ഷന്‍ നല്‍കുന്ന ജലജീവന്‍ മിഷന്‍ പദ്ധതിയുടെ സംസ്ഥാനതല പ്രവര്‍ത്തനോദ്ഘാടനം വിഡിയോ കോണ്‍ഫറന്‍സ് വഴി നിര്‍വഹിക്കും. മന്ത്രി കെ.കൃഷ്ണന്‍കുട്ടി അധ്യക്ഷത വഹിക്കും. മന്ത്രിമാരായ എ.സി.മൊയ്തീന്‍, തോമസ് ഐസക് എന്നിവര്‍ പങ്കെടുക്കും. പ്രാദേശികതല ഉദ്ഘാടനങ്ങളും നടക്കും.

ശുദ്ധജല ലഭ്യത ഏറ്റവും കുറവായ ഗ്രാമീണ മേഖലയില്‍ 2024 ആകുമ്പോഴേക്കും മുഴുവന്‍ കുടുംബങ്ങള്‍ക്കും പൈപ്പിലൂടെ ശുദ്ധജലം ലഭ്യമാക്കുന്ന പദ്ധതിക്കാണു തുടക്കം കുറിക്കുന്നതെന്നു മന്ത്രി കെ.കൃഷ്ണന്‍കുട്ടി പറഞ്ഞു. കേന്ദ്ര ജലശക്തി മന്ത്രാലയവുമായി സഹകരിച്ച് കേരളത്തിലെ 49.65 ലക്ഷം കുടുംബങ്ങള്‍ക്ക് പൈപ്പ് കണക്ഷന്‍ നല്‍കുന്നതാണ് പദ്ധതി. തദ്ദേശ സ്ഥാപനങ്ങളുടെ പങ്കാളിത്തത്തോടെ നടപ്പാക്കുന്ന പദ്ധതിയിലൂടെ 100% വീടുകളിലും വെളളം എത്തിക്കാനാകുമെന്നും അദ്ദേഹം പറഞ്ഞു.

കേരളത്തില്‍ ആകെ 67.15 ലക്ഷം ഗ്രാമീണ വീടുകളാണുള്ളത്. നിലവില്‍ 17.50 ലക്ഷം വീടുകള്‍ക്കു ശുദ്ധജല കണക്ഷനുണ്ട്. പദ്ധതി വഴി കണക്ഷന്‍ ലഭിക്കാന്‍ ആധാര്‍ കാര്‍ഡ് മാത്രമാണു രേഖയായി നല്‍കേണ്ടത്. പൊതുടാപ്പുകളെ മാത്രം ആശ്രയിക്കുന്നവര്‍ക്കും ശുദ്ധജലം എത്തിക്കാന്‍ ബുദ്ധിമുട്ടേറിയ പ്രദേശങ്ങളില്‍ ഉള്ളവര്‍ക്കും പട്ടിക വര്‍ഗ കോളനികള്‍ക്കുമാണു മുന്‍ഗണന.

കേന്ദ്ര,സംസ്ഥാന സര്‍ക്കാരുകള്‍ തുല്യ ചെലവു വഹിക്കുന്ന ഈ പദ്ധതിയില്‍ 15% വിഹിതം പഞ്ചായത്തുകളാണു വഹിക്കുക. 10% ഗുണഭോക്തൃ വിഹിതമാണ്. ആദ്യ ഘട്ട പ്രവൃത്തികളുടെ അടങ്കല്‍ 4343.89 കോടി രൂപയാണ്. സര്‍ക്കാരിന്റെ 100 ദിന പരിപാടികളുടെ ഭാഗമായി 1.6 ലക്ഷം കണക്ഷനുകള്‍ നല്‍കാനും നടപടി സ്വീകരിച്ചതായി മന്ത്രി കൃഷ്ണന്‍കുട്ടി പറഞ്ഞു. നടപ്പു സാമ്പത്തിക വര്‍ഷം 21.42 ലക്ഷം കണക്ഷന്‍ നല്‍കും. ആദ്യ ഘട്ടത്തില്‍ 716 പഞ്ചായത്തുകളിലായി 16.48 ലക്ഷം വീടുകള്‍ക്കു കണക്ഷനുള്ള ഭരണാനുമതി ലഭിച്ചു. 701 പഞ്ചായത്തുകളിലെ 774 പ്രവൃത്തികള്‍ ടെന്‍ഡര്‍ ചെയ്തു. 93 നിയമസഭാ മണ്ഡലങ്ങളിലായി 243 പഞ്ചായത്തുകളിലെ 1.78 ലക്ഷം ഗാര്‍ഹിക കണക്ഷനുകള്‍ ഉള്‍പ്പെടുന്ന 250 പ്രവൃത്തികള്‍ക്കു പ്രവര്‍ത്തനാനുമതി നല്‍കി.