അശ്ലീല വീഡിയോ ഇട്ടെന്ന് പറഞ്ഞ് വിജയ് പി നായരെ വീട്ടില്‍ കയറി തല്ലി ലൈവ് വീഡിയോയിട്ട് പോലീസില്‍ പരാതിയും നല്‍കി ചാനലുകളില്‍ ഞെളിഞ്ഞിരുന്ന് സ്ത്രീ സുരക്ഷയ്ക്കായി വേണ്ടത് ചെയ്‌തെന്ന് പറഞ്ഞ് നിയമത്തേയും സര്‍ക്കാരിനേയും വെല്ലുവിളിച്ച ഭാഗ്യലക്ഷിയും ദിയ സനയും ശ്രീലക്ഷ്മി അറയ്ക്കലും ഒരിക്കലും ഇങ്ങനെയൊരു തിരിച്ചടി പ്രതീക്ഷിച്ചില്ല. വിജയ് പി നായരെ വീട്ടില്‍ കയറി തല്ലുകയും മുണ്ട് പറിച്ച് ചൊറിയണം തിരുകി കയറ്റുകയും കരിയോയില്‍ ഒഴിക്കുകയും തെറിവിളിക്കുകയും മൊബൈലും ലാപോടോപ്പും മോഷ്ടിക്കുകയും മാപ്പും പറയിച്ചതും ആരും അറിയില്ലായിരുന്നു. പക്ഷെ ചെയ്യുന്നത് നാട്ടുകാരെ അറിയിക്കാന്‍ എല്ലാം ലൈവായി കാണിച്ചു. ഇത്രയും പ്രകോപനമുണ്ടാക്കിയിട്ടും വിജയ് പി നായരാകട്ടെ മാഡം മാഡം എന്നല്ലാതെ ഒന്നും വിളിച്ചില്ല. ഇത് പൊതു സമൂഹവും കണ്ടതോടെയാണ് പൊല്ലാപ്പായത്.

അവസാനം വിജയ് പി നായര്‍ പോലീസില്‍ പരാതി കൊടുത്തതോടെ ഭാഗ്യ ലക്ഷ്മിയും കൂട്ടരും ചാനലുകളിലൂടെ പൊട്ടിക്കരഞ്ഞ് അകത്തായാല്‍ അഭിമാനപൂര്‍വം ജയിലില്‍ പോകുമെന്നാണ് പറഞ്ഞത്. എന്നാല്‍ ചാനല്‍ ചര്‍ച്ചയില്‍ കൈയ്യടിക്ക് കൊള്ളാമെങ്കിലും ജയില്‍ അത്ര സുഖമല്ലാത്തതിനാല്‍ മുന്‍കൂര്‍ ജാമ്യത്തിന് പോയി. കൊള്ളാവുന്ന വക്കീലിനേയും വച്ചു. പോലീസും കണ്ണടച്ചു, ഉടന്‍ അറസ്റ്റ് ചെയ്തില്ല. അതോടെ മുന്‍കൂര്‍ ജാമ്യം ദാ ലഭിച്ചു ചാനല്‍ ചര്‍ച്ച കൊഴുപ്പിക്കാമെന്ന് കാത്തിരുന്നതാണ്.

എന്നാല്‍ മെന്‍ റൈറ്റ് സംഘടനയും പോലീസും സര്‍ക്കാരും കോടതിയില്‍ ഒന്നൊന്നര വെളിപ്പെടുത്തല്‍ നടത്തിയതോടെ ഇവരുടെ ജാമ്യം ദേ കിടക്കുന്നു. 12 മിനിറ്റ് വീഡിയോയില്‍ എല്ലാം വ്യക്തമാണെന്നാണ് മെന്‍ റൈറ്റ് വാദിച്ചത്. അറസ്റ്റും റിമാന്‍ഡും ഒഴിവാക്കാനാകില്ലെന്ന് പോലീസ് പറഞ്ഞതോടെ എല്ലാം ശുഭം.

അങ്ങനെ യൂട്യൂബ് ചാനലില്‍ അശ്ലീല വിഡിയോ ഇട്ട വിജയ് പി.നായരെ കൈകാര്യം ചെയ്തതെന്ന കേസില്‍ ഭാഗ്യലക്ഷ്മി ഉള്‍പ്പെടെയുള്ളവരുടെ മുന്‍കൂര്‍ ജാമ്യാപേക്ഷ തിരുവനന്തപുരം ജില്ലാ കോടതി തള്ളി. ഭാഗ്യലക്ഷ്മിക്ക് പുറമെ ദിയ സന, ശ്രീലക്ഷ്മി അറയ്ക്കല്‍ എന്നിവരുടെ ജാമ്യാപേക്ഷയാണ് കോടതി തള്ളിയത്.

ഭാഗ്യലക്ഷമിക്കും സുഹൃത്തുക്കള്‍ക്കും കോടതിയുടെ രൂക്ഷ വിമര്‍ശവുമുണ്ടായി. കായികബലം കൊണ്ട് നിയമത്തെ നേരിടാന്‍ കഴിയില്ല. ഒട്ടും സംസ്‌കാരമില്ലാത്ത പ്രവൃത്തിയാണ് പ്രതികള്‍ ചെയ്തത്. സമാധാനവും നിയമവും കാത്തുസൂക്ഷിക്കേണ്ട ബാധ്യത കോടതിക്കുണ്ട്. ഈ ബാധ്യതയില്‍ നിന്ന് കോടതിക്ക് പിന്മാറാനാവില്ലെന്നും കോടതി ഉത്തരവില്‍ പറഞ്ഞു

മുന്‍കൂര്‍ ജാമ്യം നല്‍കുന്നതിനെ എതിര്‍ത്ത സര്‍ക്കാര്‍ വാദം അംഗീകരിച്ചാണ് കോടതിയുടെ നടപടി. കൈയേറ്റം ചെയ്യല്‍, മോഷണം തുടങ്ങി അഞ്ച് വര്‍ഷം വരെ തടവ് ശിക്ഷ ലഭിക്കാവുന്ന കുറ്റങ്ങളാണ് ഇവര്‍ക്കെതിരെയുള്ളത്.

കഴിഞ്ഞ ദിവസം അപേക്ഷ പരിഗണിച്ചപ്പോള്‍ ജാമ്യം നല്‍കുന്നതിനെ പ്രോസിക്യൂഷന്‍ എതിര്‍ത്തിരുന്നു. മുന്‍കൂര്‍ ജാമ്യം അനുവദിക്കുന്നത് ഒരു തെറ്റായ കീഴ്‌വഴക്കമാകും. അത് നിയമം കയ്യിലെടുക്കുന്നനവര്‍ക്ക് പ്രചോദനമാകുമെന്നു ചൂണ്ടിക്കാട്ടിയാണ് എതിര്‍ത്തത്.

ഈ വാദമാണ് കോടതി അംഗീകരിച്ചത്. ജാമ്യമില്ലാ വകുപ്പ് പ്രകാരമാണ് ഇവര്‍ക്കെതിരെ കേസ്. നിലവില്‍ ഇതുവരെ പോലീസ് ഇവരെ അറസ്റ്റ് ചെയ്തിട്ടില്ല.

കോടതിയില്‍ മുന്‍കൂര്‍ ജാമ്യാപേക്ഷ പരിഗണനയിലിരുന്നത് ചൂണ്ടിക്കാട്ടിയാണ് പോലീസ് അറസ്റ്റ് നടപടികളിലേക്ക് കടക്കാതിരുന്നത്. നിലവില്‍ ജാമ്യാപേക്ഷ തള്ളിയതിനാല്‍ ഇവര്‍ക്ക് ഹൈക്കോടതിയെ സമീപിക്കാനാകും. എന്നാല്‍ അതുവരെ പോലീസ് കാത്തിരിക്കുമോയെന്ന് കണ്ടറിയാം.