സ്ത്രീത്വത്തെ അപമാനിച്ച് അശ്ലീല വീഡിയോകള്‍ തന്റെ യൂ ടൂബ് ചാനലിലൂടെ പോസ്റ്റ് ചെയ്ത വിജയ് പി നായരെ ആക്രമിച്ച സംഭവത്തില്‍ ഭാഗ്യലക്ഷ്മി അടക്കമുള്ള മൂവര്‍സംഘത്തിനു എട്ടിന്റെ പണി കിട്ടിയിരിക്കുകയാണ് .നാലാളുകള്‍ കാണിക്കാന്‍ മടിക്കുന്നത് തനിക്ക് കഴിയും എന്നാണോ ഇവരുടെ ഈ ആക്രമണത്തിലൂടെ ലക്ഷ്യമിട്ടത് എന്നതും ചോദ്യത്തിന് വിധേയപ്പെടേണ്ടിയിരിക്കുന്നു .സമൂഹത്തില്‍ സ്ത്രീകള്‍ക്കെതിരെ നടക്കുന്ന ആക്രമണങ്ങളെ തടുക്കാനായുള്ള ശക്തമായ നിയമനിര്‍മാണം വേണമെന്ന് ഭാഗ്യലക്ഷ്മി ഉന്നയിച്ചിരുന്നു .

യൂ ടൂബിലൂടെ മാന്യമായി സമൂഹത്തില്‍ ജീവിക്കുന്ന സ്ത്രീകളെ അപമാനിച്ചു എന്നതിനാലാണ് തനിക്ക് പ്രതികരിക്കേണ്ടി വന്നതെന്നാണ് ഭാഗ്യലക്ഷ്മിയുടെ വാദം .എന്നാല്‍ തിരുവനന്തപുരം ഗാന്ധാരി അമ്മാന്‍ കോവിലിനടുത്തുള്ള തന്റെ ലോഡ്ജ് മുറിയില്‍ കയറി വന്ന് ദേഹോപദ്രവം ഏല്പിക്കുകയും കടന്നാക്രമിക്കുകയും തന്റെ മുറിയിലുള്ള സാധനങ്ങള്‍ അപഹരിക്കുകയും ചെയ്തു എന്നാണ് വിജയ് പി നായരുടെ പരാതി .സിനിമ സ്‌റ്റൈലില്‍ ഭവനഭേദനം നടത്തിയ ഭാഗ്യലക്ഷ്മി പരാക്രമം സോഷ്യല്‍ മീഡിയയില്‍ കൂടി പുറത്തുവിട്ടതാണ് ഇപ്പോള്‍ മുന്‍കൂര്‍ ജാമ്യം നഷ്ടമാകുന്നതിനു പ്രധാനകാരണമായി മാറിയത് .

കോടതിക്ക് മുന്നില്‍ സിനിമ മേഖലയിലെ പ്രമുഖയാണോ അല്ലയോ എന്ന ചോദ്യത്തിനല്ല മറിച്ച് കുറ്റം ചെയ്തിട്ടുണ്ടോ ഇല്ലയോ എന്നത് മാത്രമാണ് പരിഗണിക്കുന്നത് .സ്ത്രീത്വത്തിന്റെ പേരും പറഞ്ഞു അതിക്രമം നടത്താനോ നിയമം കയ്യിലെടുക്കാനോ അവകാശമില്ല എന്നത് ഓര്‍മിപ്പിക്കുകയാണ് കോടതി ചെയ്തത് .നിയമപരമായായിരുന്നു വിജയിക്കെതിരെ ഭാഗ്യലക്ഷ്മി നീങ്ങിയിരുന്നത് എങ്കില്‍ കേസ് മറ്റൊരു വിധത്തില്‍ നീങ്ങിയേനെ എന്നാണ് കണക്കാക്കപ്പെടുന്നത്

കഴിഞ്ഞ 26ന് ആണ് ഇവര്‍ വിജയ് പി.നായര്‍ താമസിച്ചിരുന്ന സ്റ്റാച്യുവിനു സമീപത്തെ ലോഡ്ജ് മുറിയിലെത്തി കരി ഓയില്‍ ഒഴിക്കുകയും മര്‍ദിക്കുകയും ചൊറിയണം പ്രയോഗിക്കുകയും ചെയ്തത്. ലാപ്‌ടോപ്പും മൊബൈല്‍ ഫോണും കൈക്കലാക്കി തമ്പാനൂര്‍ പൊലീസ് സ്റ്റേഷനില്‍ ഏല്‍പിക്കുകയും ചെയ്തു.

താമസ സ്ഥലത്ത് അതിക്രമിച്ചു കയറി, സാധനങ്ങള്‍ മോഷ്ടിച്ചു എന്നീ കുറ്റങ്ങള്‍ ചുമത്തിയാണു തമ്പാനൂര്‍ പൊലീസ് ഇവര്‍ക്കെതിരെ കേസ് എടുത്തിരിക്കുന്നത്. 5 വര്‍ഷം വരെ തടവ് ലഭിക്കാവുന്ന കുറ്റങ്ങളാണിവ. ഇവരുടെ പരാതിയില്‍ വിജയ്‌ക്കെതിരെയും കേസ് എടുത്തെങ്കിലും ഇയാള്‍ക്കു കോടതി ജാമ്യം അനുവദിച്ചിരുന്നു. വിജയ് നായര്‍ക്കെതിരെ പല പരാതികള്‍ നല്‍കിയിട്ടും നടപടി സ്വീകരിക്കാത്തതിനാലാണു തങ്ങള്‍ നേരിട്ടു കൈകാര്യം ചെയ്തതെന്നായിരുന്നു ഭാഗ്യലക്ഷ്മിയുടെയും കൂട്ടരുടെയും വാദം. സെഷന്‍സ് കോടതി വിധിക്കെതിരെ ഹൈക്കോടതിയെ സമീപിക്കാനാണു ഭാഗ്യലക്ഷ്മിയുടെ നീക്കം.

കേരളത്തിലും ലോകത്താകമാനവുമുള്ള എല്ലാ സ്ത്രീകള്‍ക്കും വിജയിയെ പോലുള്ള ഞരമ്പുരോഗികള്‍ ഭീഷണി ഉയര്‍ത്തുന്നതിനാല്‍ തന്നെ ഇവരെ നിയന്ത്രിക്കാന്‍ ശക്തമായ നിയമനിര്‍മാണം വേണമെന്ന വാദമാണ് ഭാഗ്യലക്ഷ്മി ഉയര്‍ത്തുന്നത് .കേരളത്തില്‍ കൂടുതല്‍ നിയമനിര്‍മ്മാണം വേണമെന്ന് പറഞ്ഞുകൊണ്ട് മുഖ്യമന്ത്രി പിണറായി വിജയന് കത്തയച്ചത് സാമൂഹ്യശ്രദ്ധ പിടിച്ചുപറ്റിയ സംഭവമായിരുന്നു .അക്രമണരീതിയാണ് ഭാഗ്യലക്ഷ്മി നടത്തിയതെന്ന് വാദിക്കുന്നവരോട് ഇവനെപ്പോലുള്ളവരോട് പിന്നെ എങ്ങനെ പെരുമാറണം എന്ന വാദവുമായി ഒട്ടനവധി പേരാണ് ഭാഗ്യലക്ഷ്മിക്ക് പിന്തുണ അറിയിച്ച് എത്തിയത് .