തെളിവെവിടെ തെളിവെവിടെ എന്ന് മാത്രമാണ് കോടതി ചോദിക്കൂ. അത് കൊണ്ട് മാത്രമാണ് സര്‍ക്കാര്‍ മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കറിനെ അന്വേഷണ സംഘം അറസ്റ്റ് ചെയ്യാത്തത്. ശിവശങ്കര്‍ പല കുറ്റകൃത്യങ്ങളിലും നേരിട്ടും അല്ലാതെയും പങ്കെടുത്തെങ്കിലും തന്റെ ഐഎഎസ് ബുദ്ധിയില്‍ അത് തെളിവില്ലാതാക്കി. സ്വപ്‌നയ്ക്കായി ശിവശങ്കറിന്റേത് വഴിവിട്ട ഇടപെടല്‍ തന്നെയാണെന്ന് അന്വേഷണ സംഘത്തിന് ബോധ്യമായി. സ്വപ്‌നയുമായി ഉദ്യോഗതലത്തിലും ശിവശങ്കര്‍ വഴിവിട്ട നിരവധി നീക്കങ്ങള്‍ നടത്തിയിട്ടുണ്ട്. തന്ത്രപരമായ നീക്കങ്ങള്‍ നടത്തിയതു കൊണ്ട് മാത്രമാണ് ശിവശങ്കറിനെതിരെ വ്യക്തമായ തെളിവ് ലഭിക്കാത്തത്. തുടര്‍ച്ചയായി രണ്ടു ദിവസമായി 23 മണിക്കൂര്‍ ചോദ്യം ചെയ്യലിന് ശേഷം ശിവശങ്കറിനെ വിട്ടയച്ചതും അതുകൊണ്ടാണ്. പക്ഷെ ഒരു അന്വേഷണ ഏജന്‍സിയും ശിവശങ്കറിന് ക്ലീന്‍ ചിറ്റ് നല്‍കിയിട്ടില്ല. ശിവശങ്കറിനെ വീണ്ടും ചൊവ്വാഴ്ച ചോദ്യം ചെയ്യും.

ശിവശങ്കര്‍ ഉദ്യോഗസ്ഥര്‍ക്ക് നിര്‍ദേശം നല്‍കിയത് വാക്കാല്‍ മാത്രമാണ്. അതിനാല്‍ തന്നെ അതിന് സാക്ഷികളോ തെളിവുകളോ ഉണ്ടാകില്ല. ഇതെല്ലാം മറ്റാരും കേള്‍ക്കാതെ പറയുന്നതിനാല്‍ അത് തെളിയിക്കാനും സാധിക്കില്ല. ഇതോടെ ശിവശങ്കര്‍ മിസ്റ്റര്‍ ക്ലീനും ഒപ്പിട്ട് നടപ്പിലാക്കിയവര്‍ വെട്ടിലുമായി. ഈ കേസിന്റെ ആദ്യം മുതലേ ഇത് വ്യക്തമാണ്. സ്വപ്നയ്ക്ക് ഫ്‌ളാറ്റെടുക്കാന്‍ പറഞ്ഞതും ബാങ്ക് ലോക്കറെടുക്കാന്‍ പറഞ്ഞതും ജോലി നല്‍കാന്‍ പറഞ്ഞതും ഈന്തപ്പഴം നല്‍കാന്‍ പറഞ്ഞതും വാക്കാലാണ്. വാക്കിന് കോടതിയില്‍ പുല്ല് വിലയായതിനാല്‍ ശിവശങ്കര്‍ ഇപ്പോഴും പയറുപോലെ നില്‍ക്കുന്നത്.

തുടര്‍ച്ചയായ ചോദ്യം ചെയ്യല്‍ നടന്നിട്ടും ശിവശങ്കര്‍ രക്ഷപ്പെട്ടത് ഇതിനാലാണ്. എന്നാല്‍ അന്നത്തെ സാമൂഹ്യനീതി സെക്രട്ടറി ടിവി അനുപമ ഇക്കാര്യം വ്യക്തമായി തുറന്ന് പറഞ്ഞതോടെയാണ് ശിവശങ്കറിന് അല്‍പമെങ്കിലും കുരുക്ക് മുറുകിയത്.

ചോദ്യം ചെയ്യല്‍ സമയത്ത് പലപ്പോഴും അന്വേഷണ സംഘത്തെ ശിവശങ്കര്‍ കുഴയ്ക്കുന്നുണ്ട്. ചില ചോദ്യങ്ങള്‍ക്ക് നോ കമന്റ്‌സെന്നാണ് മറുപടി. അതിനാല്‍ വ്യക്തമായ മറുപടിയും തെളിവുകളുണ്ടെങ്കില്‍ ഹാജരാക്കാനുമായി ചൊവ്വാഴ്ച ഹാജരാകാനായി നിര്‍ദേശിച്ച് തുടര്‍ച്ചയായ രണ്ടു ദിവസമായുള്ള 23 മണിക്കൂര്‍ ചോദ്യംചെയ്യലിനൊടുവില്‍ ശിവശങ്കറിനെ വിട്ടയച്ചു.

യു.എ.ഇ കോണ്‍സുലേറ്റ് വഴി എത്തിയ 17,000 കിലോ ഈന്തപ്പഴം പുറത്തുവിതരണം ചെയ്തത് സ്വപ്‌നയുടെ താത്പര്യപ്രകാരമായിരുന്നു. ഇതിനായി അന്നത്തെ സാമ്യഹ്യക്ഷേമനീതി വകുപ്പ് സെക്രട്ടറി ടി.വി.അനുപമയ്ക്ക് ശിവശങ്കര്‍ നിര്‍ദ്ദേശം നല്‍കിയതും വാക്കാല്‍ മാത്രമായിരുന്നു. ഈ പരിപാടി സര്‍ക്കാരിന്റെ നേതൃത്വത്തിലാക്കിയത് ശിവശങ്കറിന്റെ ഇടപെടലാണ്. ഈന്തപ്പഴം വിതരണവുമായി ബന്ധപ്പെട്ട് യു.എ.ഇ കോണ്‍സുലേറ്റുമായി കത്തിടപാടുകളോ ആശയവിനിമയമോ നടന്നിട്ടില്ലെന്ന് ഇന്നലത്തെ ചോദ്യം ചെയ്യലില്‍ കസ്റ്റംസിനോട് ശിവശങ്കര്‍ പറഞ്ഞു. ഇന്നലെ പന്ത്രണ്ട് മണിക്കൂര്‍ ചോദ്യംചെയ്യലിന് ശേഷം രാത്രി പത്തുമണിയോടെയാണ് വിട്ടയച്ചത്. നേരത്തെ രണ്ട് തവണകളിലായി 17 മണിക്കൂര്‍ കസ്റ്റംസ് ചോദ്യംചെയ്തിരുന്നു.

യു.എ.ഇ. കോണ്‍സുലേറ്റിന്റെ മതഗ്രന്ഥവിതരണവും ഈന്തപ്പഴവിതരണവും ശിവശങ്കറിന് അറിയാമായിരുന്നു. മന്ത്രി ജലീല്‍ മതഗ്രന്ഥം സ്വീകരിക്കുന്നതിനുമുമ്പ് സര്‍ക്കാരില്‍ നിന്ന് ഒരുതരത്തിലുള്ള അനുമതിയും ചോദിച്ചിട്ടില്ലായിരുന്നുവെന്ന് ശിവശങ്കര്‍ മൊഴി നല്‍കി. ഇത് ജലീലിന് കുരുക്കാകുകയാണ്. അനുമതി വാങ്ങിയില്ലായിരുന്നെന്ന് മൊഴി വന്നതോടെ വിഷയത്തില്‍ മന്ത്രി ജലീലിനെ കസ്റ്റംസ് ചോദ്യം ചെയ്‌തേക്കുമെന്നാണ് സൂചന.

അതേസമയം ഈന്തപ്പഴവിതരണത്തിലും മതഗ്രന്ഥം സ്വീകരിച്ച വിഷയത്തിലും ശിവശങ്കറിന്റെ മൊഴിയില്‍ വ്യക്തതവരുത്താന്‍ മുഖ്യമന്ത്രിയുടെ ഓഫീസിലെ ചില ഉദ്യോഗസ്ഥരോട് വിശദീകരണം ചോദിക്കാന്‍ കസ്റ്റംസ് തീരുമാനിച്ചു. എന്തായാലും ചൊവ്വാഴ്ച വരെ കാത്തിരിക്കാം.