1978-ലെ കേരള ചുമട്ടുതൊഴിലാളി നിയമം ഭേദഗതി ചെയ്യാനും ഒരു ചുമട്ടുതൊഴിലാളിക്ക് എടുക്കാവുന്ന ചുമടിന്റെ പരമാവധി ഭാരം 75 കിലോഗ്രാമില്‍ നിന്ന് 55 കിലോഗ്രാം ആക്കാനും മന്ത്രിസഭ തീരുമാനിച്ചു. 15-18 പ്രായക്കാരും സ്ത്രീകളും എടുക്കുന്ന ചുമടിന്റെ പരമാവധി ഭാരം 35 കിലോ ആയും നിജപ്പെടുത്തും. രാജ്യാന്തര തൊഴില്‍ ധാരണ പ്രകാരമാണിത്.

സംസ്ഥാനത്ത് ഇപ്പോള്‍ തന്നെ ഒരു ചാക്കിലെ വസ്തുക്കളുടെ പരമാവധി ഭാരം 50 കിലോ ആയി മിക്ക ഉല്‍പാദകരും കുറച്ചിട്ടുണ്ട്. പച്ചക്കറി മാത്രമാണ് 50 കിലോയിലേറെ ഒരു ചാക്കില്‍ കൊള്ളിക്കുന്നത്. ഇനി ഇതും 55 കിലോയില്‍ താഴെയാകും.

കേരള ചുമട്ടുതൊഴിലാളി ക്ഷേമ ബോര്‍ഡിലെ വിരമിച്ചവര്‍ ഉള്‍പ്പെടെ സ്ഥിരം ജീവനക്കാര്‍ക്ക് വിരമിക്കല്‍ ആനുകൂല്യം ലഭ്യമാക്കുന്നതിനും നിയമം ഭേദഗതി ചെയ്യും.

55 കിലോ ആയി ചുമടുഭാരം നിജപ്പെടുത്തുന്നതോടെ ഇതിലേറെ ഭാരമുള്ളവ യന്ത്രസഹായത്തോടെ നീക്കണമെന്ന വാദം ഉയരുമെന്ന ആശങ്ക തൊഴിലാളികള്‍ക്കുണ്ട്. 55 കിലോയിലേറെ ഭാരം 2 പേര്‍ ചേര്‍ന്നാണ് ഇപ്പോള്‍ ചുമക്കുന്നത്. യന്ത്രം ഉപയോഗിച്ചാല്‍ തൊഴിലാളിക്കു കൂലി ലഭിക്കില്ല.