ഇനി കായലിലും ടാക്‌സി ഓടും. രാജ്യത്തെ ആദ്യത്തെ വാട്ടര്‍ ടാക്‌സി ഇന്നുമുതല്‍ വേമ്ബനാട്ട് കായലില്‍ പായും. 70 ലക്ഷത്തോളം രൂപ ചെലവഴിച്ച് ജലഗതാഗത വകുപ്പാണ് ടാക്‌സി ഇറക്കുന്നത്. ഇന്ന് രാവിലെ 11.30ന് ഓണ്‍ലൈനായി ടാക്‌സി ഉദ്ഘാടനം ചെയ്യും.- ഒരേസമയം 10 പേര്‍ക്ക് യാത്ര ചെയ്യാം. കാറ്റാമറൈന്‍ നിര്‍മാണ രീതിയായതിനാല്‍ യാത്രാ സുഖവും ഏറെയാണ്. സുരക്ഷക്കായി ലൈഫ് ജാക്കറ്റുകള്‍, ലൈഫ് ബോയി, അഗ്‌നി ശമനത്തിനുള്ള യന്ത്രം, ഹള്ളില്‍ വെള്ളം കയറിയാല്‍ പുറം തള്ളാനുള്ള ഓട്ടോമാറ്റിക് സംവിധാനം എന്നിവയുമുണ്ട്.

ഫാന്‍, ലൈറ്റ് എന്നിവ സൗരോര്‍ജ്ജത്തിലാണ് പ്രവര്‍ത്തിപ്പിക്കുന്നത്. സുരക്ഷ സൗകര്യങ്ങള്‍ക്ക് പുറമെ സഹായത്തിന് ഒരാള്‍കൂടി ബോട്ടിലുണ്ടാകും. മണിക്കൂറിന് 1500 രൂപയാണ് നിരക്ക്. ശേഷിക്കുന്ന സമയത്തിന് മിനിറ്റുകള്‍ കണക്കാക്കി തുകയീടാക്കും. പതിനഞ്ചു നോട്ടിക്കല്‍ മൈലാണ് മണിക്കൂറിലെ വേഗത. പൊതുജനങ്ങള്‍ക്കും വിനോദ സഞ്ചാരികള്‍ക്കും വാട്ടര്‍ ടാക്സിയുടെ സേവനം പ്രയോജനപ്പെടുത്താം. കൊച്ചി കേന്ദ്രീകരിച്ച് പ്രവര്‍ത്തിക്കുന്ന നവഗതി മറൈന്‍ ആണ് ബോട്ട് നിര്‍മ്മിച്ചത്. 175 കുതിര ശക്തിയുള്ള ഡീസല്‍ എഞ്ചിനാണ് ബോട്ടിന്റെത്. വൈകാതെ മൂന്ന് വാട്ടര്‍ ടാക്സികള്‍ കൂടി ജലഗതാഗത വകുപ്പ് നീറ്റീലിറക്കും.

യാത്രാബോട്ടുകളെ അപേക്ഷിച്ച് കൂടുതല്‍ വേഗത്തില്‍ ലക്ഷ്യസ്ഥാനത്തേക്ക് എത്തിച്ചേരാന്‍ കഴിയുമെന്നതാണ് വാട്ടര്‍ ടാക്സിയുടെ പ്രത്യേകത. അതിവേഗ എഞ്ചിനുകളാണ് ബോട്ടിനുള്ളത്. ജില്ലവിട്ടും യാത്രക്കാര്‍ വിളിക്കുന്ന എവിടേക്കും വാട്ടര്‍ ടാക്സിയെത്തും. ഇപ്പോള്‍ ഒരു ടാക്സിയാണ് സര്‍വീസ് നടത്തുക. നവംബറില്‍ ഒരു ടാക്സിയും ഡിസംബറില്‍ രണ്ടു ടാക്സികളും സര്‍വീസാരംഭിക്കും.

എറണാകുളം-വൈക്കം, ആലപ്പുഴ-കോട്ടയം തുടങ്ങിയ മേഖലകളിലാണ് അതുവരുക. ആലപ്പുഴ സ്റ്റേഷന്‍ കേന്ദ്രീകരിച്ചാകും പ്രവര്‍ത്തനം. വാട്ടര്‍ ടാക്സി സേവനത്തിനായി 9400050325, 9400050322 എന്നീ നമ്ബരുകളില്‍ വിളിക്കാം. കൂടുതല്‍ ടാക്സികള്‍ വരുമ്‌ബോള്‍ പ്രത്യേകം നമ്ബരുകളാവും. ഓണ്‍ലൈന്‍ ടാക്സി സംവിധാനം പോലെയാക്കുന്നതും പരിഗണിക്കുന്നുണ്ട്.