സദുദ്ദേശ്യപരമായി നടപ്പാക്കാന് ആലോചിക്കുന്ന കാര്യങ്ങള് തെറ്റിദ്ധരിപ്പിക്കുന്ന തരത്തില് പുറത്തു പറയുന്നത് ഉചിതമല്ലെന്ന് റൂള്സ് ഓഫ് ബിസിനസ് ഭേദഗതി നീക്കം പുറത്തായതിനെ കുറിച്ച് മുഖ്യമന്ത്രി
സദുദ്ദേശ്യപരമായി നടപ്പാക്കാന് ആലോചിക്കുന്ന കാര്യങ്ങള് തെറ്റിദ്ധരിപ്പിക്കുന്ന തരത്തില് പുറത്തു പറയുന്നത് ഉചിതമല്ലെന്ന്, മന്ത്രിമാരുടെ അധികാരം കുറച്ചു വകുപ്പു സെക്രട്ടറിമാരുടെയും മുഖ്യമന്ത്രിയുടെയും അധികാരം വര്ധിപ്പിക്കാനുള്ള റൂള്സ് ഓഫ് ബിസിനസ് ഭേദഗതി നീക്കം പുറത്തായതിനെ സംബന്ധിച്ച് മന്ത്രിസഭാ യോഗത്തില് മുഖ്യമന്ത്രി.
ആശയക്കുഴപ്പം നീക്കാന് എ.കെ.ബാലന് കണ്വീനറായ മന്ത്രിസഭാ ഉപസമിതി എത്രയും വേഗം യോഗം ചേര്ന്നു ഭേദഗതി ശുപാര്ശ കൈമാറണമെന്നും വിവാദമായ തരത്തിലുള്ള അധികാര കേന്ദ്രീകരണമൊന്നും ഉദ്ദേശിച്ചിട്ടില്ലെന്നും മുഖ്യമന്ത്രി പിണറായി വിജയന് പറഞ്ഞു.
മന്ത്രിമാര്ക്ക് കുറെ മാറ്റങ്ങള് ചട്ടഭേദഗതിയില് നിര്ദേശിക്കാനുള്ളതിനാല് ഉപസമിതി വീണ്ടും ചേര്ന്ന് അന്തിമ റിപ്പോര്ട്ട് തയാറാക്കേണ്ടതുണ്ടെന്നു മന്ത്രി എ.കെ.ബാലന് പറഞ്ഞു. രണ്ടാഴ്ചയെങ്കിലും വേണം. അതു കഴിഞ്ഞു റിപ്പോര്ട്ട് മന്ത്രിസഭയില് സമര്പ്പിക്കുമെന്നും അദ്ദേഹം അറിയിച്ചു. കഴിഞ്ഞ ഉപസമിതി യോഗത്തില് വിവാദ നിര്ദേശങ്ങളെ എതിര്ത്ത ഇ.ചന്ദ്രശേഖരനും കെ.കൃഷ്ണന്കുട്ടിയും മന്ത്രിസഭാ യോഗത്തില് ഇതേക്കുറിച്ചു മിണ്ടിയില്ല.
ഫയല് നീക്കം വൈകുന്നത് ഒഴിവാക്കാനുള്ള നിര്ദേശങ്ങള് ഉപസമിതി അംഗീകരിച്ചേക്കും. യോഗങ്ങള് ഓണ്ലൈനായി ചേരുന്നതിനു നിയമസാധുത നല്കുകയും ചെയ്യും. എന്നാല് മുഖ്യമന്ത്രി, ചീഫ് സെക്രട്ടറി, സെക്രട്ടറിമാര് എന്നിവരിലേക്കു കൂടുതല് അധികാരം എത്തുന്ന തരത്തിലുള്ള ഭേദഗതികള് ഉപസമിതി ഒഴിവാക്കുമെന്നാണു സൂചന.
കരട് തയാറാക്കിയത് ചീഫ് സെക്രട്ടറിയുടെ നേതൃത്വത്തിലുള്ള അഞ്ചംഗ സെക്രട്ടറിതല സമിതിയാണ്. മുഖ്യമന്ത്രിയുടെ പ്രിന്സിപ്പല് സെക്രട്ടറിയായിരുന്ന എം.ശിവശങ്കറും ഈ സമിതിയില് ഉണ്ടായിരുന്നു.
https://www.facebook.com/Malayalivartha
